ପଡୋଶୀଙ୍କ ଘରେ ସିଲିଣ୍ଡର ବିସ୍ଫୋରଣ : କାନ୍ଥ ଭୁଶୁଡି ୪ ମୃତ , ୨ ଜଣ ଗୁରୁତର ଆହତ

ଶନିବାର ଆନ୍ଧ୍ରପ୍ରଦେଶର ଅନନ୍ତପୁର ଜିଲ୍ଲାରେ ଘଟି ଯାଇଛି ଏକ ଅଭାବନୀୟ ଘଟଣା I ଆଜି ସକାଳେ ଜିଲ୍ଲାର ମୁଲକେଡୁ ଗାଁରେ ପଡୋଶୀ ଙ୍କ ଘରେ ସିଲିଣ୍ଡର ବିସ୍ଫୋରଣ ହେବା ଯୋଗୁଁ କାନ୍ଥ ଭୁଶୁଡି ପଡିଥିଲା I ଫଳରେ ୪ ଜଣଙ୍କ ଜୀବନ ଯାଇଛି। ମୃତକଙ୍କ ମଧ୍ୟରେ ୨ ଜଣ ମହିଳା ଓ ଜଣେ ୩ ବର୍ଷୀୟ ଶିଶୁ ରହିଛନ୍ତି। ଏହି ଘଟଣାରେ ୨ ଜଣ ଗୁରୁତର ଆହତ ହୋଇଛନ୍ତି। ସେମାନଙ୍କ ଶରୀରର ପ୍ରାୟ ଅଧା ଭାଗ ପୋଡ଼ି ଯାଇଛି। ଏଥିପାଇଁ ସେମାନଙ୍କୁ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଛି। କିନ୍ତୁ ଅବସ୍ଥା ସଙ୍କଟାପନ୍ନ ରହିଛି Iଏହି ସମୟରେ ନିକଟସ୍ଥ ଘରଗୁଡିକ ମଧ୍ୟ ଏହି ବିସ୍ଫୋରଣରେ କ୍ଷତିଗ୍ରସ୍ତ ହୋଇଛି I
ବିସ୍ଫୋରଣର ଖବର ପାଇ ପୁଲିସ୍‌ ଓ ଉଦ୍ଧାରକାରୀ ଦଳ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲେ। ସେମାନେ ଧ୍ୱଂସାବଶେଷ ତଳେ ଫସିଥିବା ଲୋକଙ୍କୁ ଉଦ୍ଧାର କରିବା ପାଇଁ ଚେଷ୍ଟା କରିଥିଲେ। ମୃତକ ମାନଙ୍କ ମଧ୍ୟରେ ୬୦ ବର୍ଷୀୟ ଜାଇନ ବାଇ, ୩୬ ବର୍ଷୀୟ ଡାବୁ, ୨୮ ବର୍ଷୀୟ ଶାର୍ଫୁନି ଓ ଜଣେ ୩ ବର୍ଷୀୟ ଶିଶୁ ପ୍ରାଣ ହରାଇଥିବା ପୁଲିସ୍‌ କହିଛି। ପୋଲିସ ପକ୍ଷରୁ ସମସ୍ତ ମୃତଦେହକୁ ବ୍ୟବଚ୍ଛେଦ ପାଇଁ ପଠାଇଛି। ଏହି ମର୍ମନ୍ତୁଦ ଘଟଣାରେ ଆଖ ପାଖ ଅଂଚଳରେ ଶୋକ ର ଛାୟା ଖେଳିଯାଇଛି I