ଭୁବନେଶ୍ବର: ସାଇବର ଠକେଇର ଶିକାର ହୋଇଛନ୍ତି ବ୍ରହ୍ମପୁର ବିଶ୍ୱବିଦ୍ୟାଳୟ କୁଳପତି ପ୍ରଫେସର୍ ଗୀତାଞ୍ଜଳି ଦାସ। ଡିଜିଟାଲ୍ ଆରେଷ୍ଟ କହି ସାଇବର ଠକ ଲୁଟିନେଇଛନ୍ତି ଲକ୍ଷାଧିକ ଟଙ୍କା। ଲୁଟ୍ର ଶିକାର ହୋଇଥିବା ଜାଣିବା ପରେ କୁଳପତି ପ୍ରଫେସର୍ ଶ୍ରୀମତୀ ଦାସ ବ୍ରହ୍ମପୁର ସାଇବର ଥାନାର ଦ୍ୱାରସ୍ଥ ହୋଇଥିବା ନେଇ ବ୍ରହ୍ମପୁର ଏସ୍ପି ଡା. ସର୍ବଣା ବିିବେକ୍ ଏମ୍ ସୂଚନା ଦେଇଛନ୍ତି। ଜଣେ ଉଚ୍ଚଶିକ୍ଷିତା ହୋଇଥିବା ବେଳେ ସାଇବର ଠକେଇର ଶିକାରକୁ ନେଇ ଏବେ ସବୁଠି ଚର୍ଚ୍ଚା ଜୋର୍ ଧରିଛି। ପୁଲିସଠାରୁ ଆରମ୍ଭ କରି ପ୍ରତ୍ୟେକ ଫୋନ୍ କଲ୍ରେ ସରକାର ସାଇବର ଠକେଇକୁ ନେଇ ସଚେତନତା ସୃଷ୍ଟି କରୁଥିବା ବେଳେ କିଭଳି ସେ ସାଇବର ଠକଙ୍କ ଶିକାର ହୋଇଗଲେ, ତାକୁ ନେଇ ଏବେ ଉଠିଛି ବଡ଼ ପ୍ରଶ୍ନ। ସୂଚନା ପ୍ରକାରେ ଜଣେ ଦୁର୍ବୃତ୍ତ ଗତ ୧୨ତାରିଖରୁ କୁଳପତି ଶ୍ରୀମତୀ ଦାସଙ୍କୁ ଫୋନ୍କରି ଡିଜିଟାଲ୍ ଆରେଷ୍ଟରେ ଫସାଇଥିଲା। ଦୁର୍ବୃତ୍ତ ଜଣକ ନିଜକୁ ଇଡି ଅଫିସର୍ ବୋଲି ନିଜକୁ ପରିଚୟ ଦେଇଥିଲା। ସୁପ୍ରିମକୋର୍ଟରେ ଚାଲିଥିବା ଏକ ମାମଲାରେ ଅଭିଯୁକ୍ତଙ୍କ ସହ କୁଳପତିଙ୍କ ଲିଙ୍କ୍ ରହିଥିବା ଏବଂ କୋଟି, କୋଟି ଟଙ୍କାର ହୋଇଥିବା ଦୁର୍ନୀତିରେ କୁଳପତିଙ୍କ ସଂପୃକ୍ତି ରହିଥିବା କହିଥିଲା। ଏଭଳି ତଥ୍ୟ ଦୁର୍ବୃତ୍ତ ଦେବା ପରେ ଡିଜିଟାଲ୍ ଆରେଷ୍ଟ ହୋଇଛନ୍ତି ବୋଲି କୁଳପତିଙ୍କୁ କୁହାଯାଇଥିଲା। ଡିଜିଟାଲ୍ ଆରେଷ୍ଟ ଭୟରେ କୁଳପତି ନିଜର ସମସ୍ତ ତଥ୍ୟ ପ୍ରଦାନ କରିଥିଲେ। ଏହାର କିଛି ସମୟ ପରେ କୁଳପତି ୧୪ ଲକ୍ଷ ଟଙ୍କାର ଚେକ୍ ଦୁର୍ବୃତ୍ତଙ୍କ ଆକାଉଣ୍ଟରେ ଜମା କରିଥିଲେ। ପରେ ସେ ସାଇବର ଠକଙ୍କ ଦ୍ୱାରା ଶିକାର ହୋଇଥିବା ଜାଣିବାକୁ ପାଇଥିଲେ। ଡିଜିଟାଲ୍ ଆରେଷ୍ଟର ଶୀକାର ହେବା ପରେ କୁଳପତି ବ୍ରହ୍ମପୁର ସାଇବର ଥାନାର ଦ୍ୱାରସ୍ଥ ହୋଇଥିବା ଜଣାପଡ଼ିଛି। ଠକେଇର ତଦନ୍ତ ଜାରି ଥିବା ବ୍ରହ୍ମପୁର ଏସ୍ପି ଡା. ସର୍ବଣା ବିବେକ ଏମ୍ ସୂଚନା ଦେଇଛନ୍ତି।
Comments are closed, but trackbacks and pingbacks are open.