ସଠିକ ପ୍ରଣାଳୀ ରେ ଚିନାବାଦାମ ଚାଷ କରନ୍ତୁ ,ଲାଭ ବାନ ହୁଅନ୍ତୁ

ଆମ ଦେଶରେ ଚାଷ ହେଉଥିବା ତୈଳବୀଜ ଜାତୀୟ ଫସଲମାନଙ୍କ ମଧ୍ୟରେ ଚିନାବାଦାମର ସ୍ଥାନ ଉଲ୍ଲେଖଯୋଗ୍ୟ । ଚିନାବାଦାମ ଚାଷ ପ୍ରଥମେ ବ୍ରାଜିଲ ଦେଶରେ ଆରମ୍ଭ ହୋଇଥିବାର ଅନୁମାନ କରାଯାଏ । ଏହା ଷୋଡ଼ଶ ଶତାବ୍ଦୀରେ ପର୍ତ୍ତୁଗୀଜମାନଙ୍କ ଦ୍ୱାରା ଭାରତରେ ପ୍ରବେଶ କରିଛି । ଓଡ଼ିଶାରେ ପ୍ରାୟ ୨ ଲକ୍ଷ ୪୩ ହଜାର ହେକ୍ଟର ଜମିରେ ଚିନାବାଦାମ ଚାଷ ହୋଇଥାଏ । ଆମ ରାଜ୍ୟର ହାରାହାରି ଅମଳ ହେକ୍ଟର ପିଛା ୧୪୬୧ କିଲୋଗ୍ରାମ ଅଟେ ।
ଚିନାବାଦାମ ତେଲକୁ ଖାଇବା ତେଲ ଭାବେ ବ୍ୟବହାର କରାଯାଏ । ଏହାର ମଞ୍ଜିରୁ ଚେନାଚୁର ଓ ବିଭିନ୍ନ ପ୍ରକାରର ମିଠାଇ ପ୍ରସ୍ତୁତ କରାଯାଇଥାଏ । ଏହାର ଗଛ ଗୋଖାଦ୍ୟ ରୂପେ ବ୍ୟବହୃତ ହୋଇଥାଏ । ଚିନାବାଦାମରେ ବହୁ ପ୍ରକାରର ଖାଦ୍ୟ ଉପାଦାନ ରହିଥାଏ । କଞ୍ଚା ବାଦାମ ଓ ଭଜା ବାଦାମ ମଧ୍ୟରେ ଥିବା ଖାଦ୍ୟ ଉପାଦାନର ପରିମାଣରେ ସାମାନ୍ୟ ପ୍ରଭେଦ ଥାଏ ।
ଖାଦ୍ୟ ଉପାଦାନ (%) କଞ୍ଚାବାଦାମ ମଞ୍ଜି ଭଜା ବାଦାମ ମଞ୍ଜି
ଶ୍ୱେତସାର ୨୬.୦ ୨୬.୦
ପୁଷ୍ଟିସାର ୪୭.୫ ୪୮.୭
ସ୍ନେହସାର ୧୮.୬ ୨୦.୬
ଏହାଛଡ଼ା ଚିନାବାଦାମ ମଞ୍ଜିରେ ଯଥେଷ୍ଟ ପରିମାଣର କାଲସିୟମ୍‌, ଲୌହ, ଫସଫରସ ଓ ଭିଟାମିନ୍ ରହିଥାଏ । ଚିନାବାଦାରୁ ତେଲ ବାହାର କରିବା ପରେ ଯେଉଁ ପିଡ଼ିଆ ବାହାରେ ତାକୁ ଜୈବିକ ଖତ ହିସାବରେ ବ୍ୟବହାର କରାଯାଇଥାଏ । ଏଥିରେ ଶତକଡ଼ା୭-୮ ଭାଗ ଯବକ୍ଷାର, ୧.୫ ଭାଗ ଫସଫରସ୍ ଓ ୧.୫ ଭାଗ ପଟାସ ସାର ରହିଥାଏ ।
ନିଗିଡ଼ା, ବାଲି ଦୋରସା ମାଟିରେ ଚିନାବାଦାମ ଭଲ ହୋଇଥାଏ । ମାଟି ହାଲୁକା ହୋଇଥିଲେ ଅଧିକ ଅମଳ ମିଳେ । ମାଯିର ଅମ୍ଳ ପରିମାପକ ମୂଲ୍ୟ ୫.୫ ରୁ ୭.୦ ମଧ୍ୟରେ ରହିଥିଲେ ଭଲ ଅମଳ ମିଳିଥାଏ । ଅଧିକ ଅମ୍ଳୀୟ ବା କ୍ଷାରୀୟ ମାଟିରେ ଏହା ଭଲ ହୁଏନାହିଁ । ଚିନାବାଦାମ ଚାଷ ପାଇଁ ଉଷ୍ଣ ଜଳବାୟୁ ଦରକାର ହୋଇଥାଏ । ବାୟୁମଣ୍ଡଳାର ଉତ୍ତାପ ୨୧ରୁ ୨୬.୫ ଡିଗ୍ରୀ ସେଲସିୟର ମଧ୍ୟରେ ରହିଲେ ଏହି ଫସଲ ଭଲ ଅମଳ ଦେଇଥାଏ । ଆମ ରାଜ୍ୟରେ ଖରିଫ, ରବି ଓ ଗ୍ରୀଷ୍ମ ଋତୁରେ ଏହା ଚାଷ କରାଯାଇ ପାରିବ । ଖରିଫ ଋତୁରେ ଚାଷ ପାଇଁ ଜମି ନିଗିଡ଼ା ହେବା ନିହାତି ଦରକାର । ଖରିଫ ଋତୁ ପାଇଁ ଜୁନ୍ ମାସ, ରବି ପାଇଁ ଅକ୍ଟୋବର – ନଭେମ୍ବର ମାସ ଓ ଗ୍ରୀଷ୍ମଋତୁ ପାଇଁ ଜାନୁଆରୀ ମାସରେ ବିହନ ବୁଣାଯାଇଥାଏ ।
ଚିନାବାଦାମର ଅନେକ ଉନ୍ନତ ବିହନ ରହିଛି । ସେସବୁ ହେଲା ଏକେ ୧୨-୨୪, ଜେଏଲ୍ -୨୪, ଜୱାନ, ଜେ ୧୧, କାଦ୍ରି -୩, ଜିଜି -୨, ଆଇସିଜିଏସ୍‌-୧୧, ଆଇସିିଜିଏସ୍‌-୪୪, ଟିଏମ୍‌ଭି-୨, ସ୍ମତି ଇତ୍ୟାଦି । ଏସବୁ କିସମ ୯୫ରୁ ୧୨୦ ଦିନ ମଧ୍ୟରେ ଅମଳ ହୋଇଥାଏ । ଏହାଛଡ଼ା ଦେବୀ, ଜେଏଏଲ୍‌-୪୨, ଟିଏଜି-୨୪, ଟିଜି-୩୮ ଆଦି କିସମ ମଧ୍ୟ ଚାଷ କରାଯାଇପାରିବ । ଏକ ଏକର ଜମିରେ ବୁଣିବା ପାଇଁ ପ୍ରାୟ ୭୦ କିଲୋଗ୍ରାମ ଗୋଟା ବାଦାମ ଦରକାର ହୋଇଥାଏ । ଏହାକୁ ଛଡ଼ାଇଲେ ପାଖାପାଖି ୫୦ କିଲୋଗ୍ରାମ ମଞ୍ଜି ମିଳିବ । ବୁଣିବା ପୂର୍ବରୁ ବାଦାମରୁ ଚୋପା ଛଡ଼ାିବାକୁ ହୋଇଥାଏ । ଚୋପା ଛଡ଼ାଇବା ବେଳେ ଦେଖିବା କଥା ଯେମିତି ଦାନାରେ କ୍ଷତହ ନ ହୁଏ । ଚୋପା ଛଡ଼ାଇ ମଞ୍ଜିକୁ ଅଧିକ ସମୟ ସାଇତି ରଖିବା ଉଚିତ ନୁହେଁ । ବୁଣିବା ପୂର୍ବରୁ ପ୍ରତି କିଲୋଗ୍ରାମ ବିହନ ସହିତ ୩ ଗ୍ରାମ ଥିରାମ ବା ଦେଢ଼ଗ୍ରାମ ବାଭିଷ୍ଟିନ୍ ମିଶାଇ ବିଶୋଧନ କରାଯାଇପାରିବ । ବିହନ ସହିତ ଜୀବାଣୁ କଲଚର ଗୋଳାଇ ବୁଣିଲେ ଅଧିକ ଅମଳ ମିଳିଥାଏ ।
ପ୍ରଥମେ ଜମିକୁ ଭଲ ଭାବେ ହଳ କରି ମାଟି ଗୁଣ୍ଡ କରିଦେବା ଭଲ । ମାଟି ଯେତେ ଫପ୍‌ସା ହେବ ସେତେ ଭଲ । ଏହାଦ୍ୱାରା ଓହଳା ସୁବିଧାରେ ମାଟିରେ ପ୍ରବେଶ କରିପାରିବ । ଶେଷ ଓଡ଼ ଚାଷ ବେଳେ ଏକର ପ୍ରତି ୨୦-୨୫ କ୍ୱିଣ୍ଟାଲ ସଢ଼ା ଗୋବର ଖତ ବା କମ୍ପୋଷ୍ଟ ପ୍ରୟୋଗ କରିବାକୁ ପଡ଼ିବ । ଧାଡ଼ିକୁ ଧାଡ଼ି ୨୫-୩୦ ସେଣ୍ଟିମିଟର ଓ ଗଛକୁ ଗଛ ୧୦ ସେଣ୍ଟିମିଟର ଦୂରତାରେ ବିହନ ବୁଣିବା ଉଚିତ । ମଞ୍ଜିଗୁଡ଼ିକ ମାଟି ତଳେ ପ୍ରାୟ ୫ ସେଣ୍ଟିମିଟର ଗଭୀରରେ ପୋହତିବା ଉଚିତ ।
ଏକ କ୍ୱିଣ୍ଟାଳ ଚିନାବାଦାମ ଅଳ ହେବାପାଇଁ ପ୍ରାୟ ୫.୮୧ କି.ଗ୍ର।।. ଯବକ୍ଷାର, ୧.୯୬ କି.ଗ୍ରା. ଫସଫରସ ଓ ୩.୦୧ କି.ଗ୍ରା. ପଟାସ ସାର ଦରକାର ହୋଇଥାଏ । କିନ୍ତୁ ଚେରରେ ଥିବା ଭାତୁଡ଼ି ଦ୍ୱାରା ବାୟୁମଣ୍ଡଳରୁ ଯବକ୍ଷାହର ସାର ଗଛକୁ ମିଳିଥାଏ । ଚିନାବାଦାମ ବୁଣିବା ବେଳେ ଏକର ପ୍ରତି ୮ କି.ଗ୍ରା. ଯବକ୍ଷାର, ୧୬ କି.ଗ୍ରା. ଫସଫରସ୍ ଓ ୧୬ କି.ଗ୍ରା. ପଟାସ ସାର ପ୍ରୟୋଗ କରିବାକୁ ହେବ ।ହ ଏଥିପାଇଁ ଏକର ପ୍ରତି ୧୭ କି.ଗ୍ରା. ୟୁରିଆ, ୧୦୦ କି.ଗ୍ରା. ସିଙ୍ଗଲ ସୁପର ଫସଫେଟ୍ ଓ ୨୭ କି.ଗ୍ରା. ମ୍ୟୁରେଟ୍ ଅଫ୍ ପଟାସ ଆବଶ୍ୟକ ହେବ । ଏହା ବଦଳରେ ଏକର ପ୍ରତି ୬୨ କି.ଗ୍ରା. ଏନ୍‌ପିକେ (୧୦-୨୬-୨୬) ଓ ୪ କି.ଗ୍ରା. ୟୁରିଆ ସାର ପ୍ରୟୋଗ କରାଯାଇପାରିବ । ଏହା ବଦଳାରେ ଏକର ପ୍ରତି ୩୫ କି.ଗ୍ରା. ଡିଏପି, ୨୭ କି.ଗ୍ରା. ମ୍ୟୁରେଟ୍ ଅଫ୍ ପଟାସ ଓ ୪ କି.ଗ୍ରା. ୟୁରିଆ ପ୍ରୟୋଗ କରିବାକୁ ହେବ । ଏହାହ ବଦଳରେ ଏକର ପ୍ରତି ୨୯ କି.ଗ୍ରା. ଗ୍ରୋମୋର (୨୮-୨୮-୦), ୫୦ କି.ଗ୍ରା. ସିଙ୍ଗଲ ସୁପର ଫସଫେଟ୍ ଓ ୨୭ କି.ଗ୍ରା. ମ୍ୟୁରେଟ୍ ଅଫ୍ ପଟାସ ପ୍ରୟୋଗ କରିବାକୁ ପଡ଼ିବ । ଏହା ବଦଳରେ ହିସାବ କରି ଅନ୍ୟାନ୍ୟ ସାର ମଧ୍ୟ ପ୍ରୟୋଗ କରାଯାଇପାରିବ ।
ବେଳେବେଳେ ଚୂନ ଓ ଗନ୍ଧକ ଅଭାବ ଯୋଗୁଁ ଚିନାବାଦାମ ଅମଳ ହ୍ରାସ ପାଇଥାଏ । ଜିପ୍‌ସମ ବ୍ୟବହାର କଲେ ଏହି ଅସୁବିଧା ରହିବ ନାହିଁ । ଏଥିପାଇଁ ବୁଣିବାର ୨୦-୨୫ ଦିନ ପରେ ଏକର ପ୍ରତି ୧୦୦ କି.ଗ୍ରା. ଜିପ୍‌ସମ୍‌କୁ ମାଟିରେ ପ୍ରୟୋଗ କରିବା ଉଚିତ ।
ଖରିଫ ଋତୁରେ ଚିନାବାଦାମ ଫସଲରେ ଅଧିକ ଘାସ ଦେଖାଯାଇଥାଏ । ଜମିକୁ ଖୁସାଇଦେଲେ ଘାସ ମରିଯାଇଥାଏ । ରାସାୟନିକ ଔଷଧ ବ୍ୟବହାର କରି ମଧ୍ୟ ଘାସ ନିୟନ୍ତ୍ରଣ କରାଯାଇପାରିବ । ଏଥିପାଇଁ ବିହନ ବୁଣିବା ପରଦିନ ଏକର ପ୍ରତି ୧୬୦୦ ମିଲିଲିଟର ରୋନଷ୍ଟାର କିମ୍ବା ୮୦୦ ମିଲିଲିଟର ଲାସୋ ବା ଡୁଆଲ ବା ସାଟର୍ଣ୍ଣ କିମ୍ବା ୧୦୦୦ ମିଲିଲିଟର ଷ୍ଟମ୍ପ ଔଷଧକୁ ୪୦୦ ଲିଟର ପାଣି ସହ ମିଶାଇ ମାଟିରେ ପ୍ରୟୋଗ କରିବାକୁ ହେବ । ମାଟିରେ ବତର ଥିଲେ ଘାସମରା ଔଷଧ ଭଲ କାମ କରିଥାଏ । ବୁଣିବାର ୨୦ ଦିନ ପରେ ଏକର ପ୍ରତି ୨୦ ଗ୍ରାମ୍ କୁଇଜାଲଫଫ ଇଥାଇଲ ଔଷଧ ପ୍ରୟୋଗ କରାଯାଇପାରେ ।
ଚିନାବାଦାମ ଗଛର ଡାଳରେ ଫୁଲ ଆସେ । ଫୁଲ ମଉଳିଯିବା ପରେ ସେଠାରୁ ଏକ ଓହଳ ବାହାରେ । ଓହଳ ମାଟି ଭିତରେ ପ୍ରବେଶ କରି ଫୁଲିବାକୁ ଲାଗେ । ପରେ ଏଥିରୁ ଚିନାବାଦା ମିଳିଥାଏ । ଗଛ ମୂଳକୁ ଖୁସାଇଦେଲେ ଏହା ହାଲୁକା ହୁଏ । ଫଳରେ ସହଜରେ ଓହଳ ମାଟି ଭିତରେ ପ୍ରବେଶ କରି ଫୁଲିପାରେ । ତେବେ ଏହି କାର୍ଯ୍ୟ ଗଛରେ ଫୁଲ ଆସିବା ପୂର୍ବରୁ ସାରିଦେବା ଭଲ । ଫୁଲ ଆସିବା ପରେ କୋଡ଼ାଖୁସା କଲେ ଫୁଲ ଝଡ଼ିଯାଏ ଓ ଓହଳ ଭାଙ୍ଗିଯିବାର ଆଶଙ୍କା ଥାଏ । ଏଥିଯୋଗୁଁ ଅମଳ ମଧ୍ୟ ହ୍ରାସ ପାଏ । ତେଣୁ ବିହନ ବୁଣିବାରେ ୨୦-୨୫ ଦିନ ମଧ୍ୟରେ ଜମିକୁ ଖୁସାଇ ଦେବାହ ଉଚିତ । ଶୀତ ଓ ଖରାଦିନେ ମଝିରେ ମଝିରେ ପାଣି ମଡ଼ାଇଦେବା ଉଚିତ । ଖରାଦିନେ ଚିନାବାଦାମ ଫସଲରେ ପ୍ରାୟ ୮ ଥର ପାଣି ମଡ଼ାଇବା ଦରକାର । ଏଥିପାଇଁ ହାରାହାରି ୫୫ ସେଣ୍ଟିମିଟର ଜଳ ଆବଶ୍ୟକ କରିଥାଏ । ସେହିପରି ଶୀତଦିନେ ଏହି ଫସଲରେ ୫-୬ ଥର ପାଣି ମଡ଼ାଇବା ଦରକାହର । ଏଥିପାଇଁ ହାରାହାରି ୪୮ ସେଣ୍ଟିମିଟର ଜଳ ଆବଶ୍ୟକ ହୋଇଥାଏ । ଏହାହେଲେ ସୁବିଧାରେ ଓହଳ ମାଟିରେ ପ୍ରବେଶ କରିପାରେ ।
ଚିନାବାଦାମ ଫସଲରେ ଟୀକାରୋଗ, କଳଙ୍କି ରୋଗ ଏବଂ ମୁକୁଳ ପୋଡ଼ା ରୋଗ ଦେଖାଯାଏ । ଟୀକା ରୋଗ ହେଲେ ପତ୍ରରେ ଛୋଟଛୋଟ ଗୋଲାକାର ବା ଅନିୟପି ଆକାରର ବାଦାମୀ ବା କଳା ରଙ୍ଗର ଦାଗ ଦେଖାଯାଏ । ଏହି ରୋଗର ଲକ୍ଷଣ ପ୍ରଥମେ ତଳ ପତ୍ରରେ ଦେଖାଯାଏ । ଅଧିକ ଆକ୍ରାନ୍ତ ପତ୍ରଗୁଡ଼ିକ ହଳଦିଆ ପଡ଼ି ଝଡ଼ିଯାଏ । ଏହି ରୋଗ ଦମନ ପାଇଁ ଏକର ପ୍ରତି ୭୫୦ ଗ୍ରାମ ଇଣ୍ଡୋଫିଲ୍‌-ଏମ୍ ୪୫ ବା ୧ କି.ଗ୍ରା. ବ୍ଲାଇଟକ୍‌ସ ୫୦ ଔଷଧକୁ ୨୦୦ ଲିଟର ପାଣି ସହ ମିଶାଇହ ସ୍ପ୍ରେ କରିବାକୁ ହେବ ।
କଳଙ୍କି ରୋଗ ଲାଗିଲେ ପତ୍ରର ତଳ ପାଖରେ ଧଳା ରଙ୍ଗର ଛୋଟଛୋଟ ଦାଗ ଦେଖାଯାଏ । ଏହା ପରେ ପତ୍ରର ଉପର ଭାଗରେ ହଳଦିଆ ରଙ୍ଗର ଫୋଟକା ଦେଖାଯାଏ । ଅଧିକ ଆକ୍ରାନ୍ତ ପତ୍ରଗୁଡ଼ିକ ଶୁଖି ଝଡ଼ିପଡ଼େ । ଏହି ରୋଗ ଦାଉରୁ ଫସଲକୁ ରକ୍ଷା କରିବା ପାଇଁ ଏକର ପ୍ରତି ୨୦୦ ଗ୍ରାମ ଟପସିନ୍ ଏମ୍ ବା ବାଭିଷ୍ଟିନ୍ ବା ଧନୁଷ୍ଟିନ୍‌କୁ ୨୦୦ ଲିଟର ପାଣି ସହ ମିଶାଇ ସ୍ପ୍ରେ କରିବାକୁ ପଡ଼ିବ । ଏହାଛଡ଼ା ଏକର ପ୍ରତି ୧୨ କି.ଗ୍ରା.ା ଗନ୍ଧକ ଗୁଣ୍ଡ ମଧ୍ୟ ବ୍ୟବହାର କରାଯାଇପାରେ । ମୁକୁଳ ପୋଡ଼ା ରେଗ ଦେଖାଗଲେ ଆକ୍ରାନ୍ତ ଗଛର ଅଗ୍ର ମୁକୁଳ କଳାପଡ଼ି ପୋଡ଼ିଗଲା ପରି ଦିଶେ । ପତ୍ରଗୁଡ଼ିକ ଛୋଟଛୋଟ ହୋଇଥାଏ । ସଂକ୍ରମିତ ଗଛ ବଢ଼ି ନ ପାରି ରୁଗ୍‌ଣ ଦେଖାଯାଏ । ବେଳେବେଳେ ଗଛ ମଧ୍ୟ ମରିଯାଏ । ଏହା ଉକୁଣିଆ ପୋକ ଦ୍ୱାରା ବ୍ୟାପୁଥିବା ଏକ ଭୂତାଣୁଜନିତ ରୋଗ । ଏହି ରୋଗ ଦାଉରୁ ଫସଲକୁ ରକ୍ଷା କରିବା ପାଇଁ ଏକର ପ୍ରତି ୪୦୦ ମିଲିଲିଟର କ୍ଲୋରୋପାଇରିଫସକୁ ୨୦୦ ଲିଟର ପାଣି ସହ ମିଶାଇ ସ୍ପ୍ରେ କରିବାକୁ ପଡ଼ିବ ।
ଉଇ ଚିନାବାଦାମ ଫସଲର ପ୍ରଧାନ ଶତ୍ରୁ । ଏମାନେ ଗଛର ମୂଳକୁ କାଟିଦେବା ଯୋଗୁଁ ଗଛ ମରିଯାଇଥାଏ । ବେଳେବେଳେ ଏମାନେ ଚିନାବାଦାମ ଚୋପା ମଧ୍ୟ ଖାଇଦିଅନ୍ତି । ଏହାକୁ ନିୟନ୍ତ୍ରଣ କରିବା ପାଇଁ ଶେଷ ଓଡ଼ ଚାଷ ବେଳେ ଏକର ପିଛା ୧୦ କି.ଗ୍ରା. କ୍ଲୋରୋପାଇରିଫସ ଗୁଣ୍ଡକୁ ମାଟିରେ ମିଶାଇବାକୁ ପଡ଼ିବ । ଫସଲ କିଆରିଆରେ ଉଇ ଲାଗିଲେ ଏକର ପ୍ରତି ୧୬୦୦ ମିଲିଲିଟର କ୍ଲୋରୋପାଇରିଫସ ଔଷଧକୁ ୪୦୦ ଲିଟର ପାଣି ସହ ମିଶାଇ ମାଟିରେ ସ୍ପ୍ରେ କରିବାକୁ ପଡ଼େ ।
ଖରିଫ ଋତୁରେ ଧବଳ ଭୃଙ୍ଗ ଶାବକ ଏହି ଫସଲକୁ ଅଧକ ଆକ୍ରମଣ କରନ୍ତି । ଏମାନେ ଗଛର ଚେରକୁ ଖାଇ ନଷ୍ଟ କରି ଦେଉଥିବାରୁ ଗଝ ଝାଉଁଳି ପଡ଼େ । ଏମାନେ ସାଧାରଣତଃ ମାଟି ତଳେ ରହି ଚେରକୁ ଖାଆନ୍ତି । ଏମାନେ ଦମନ କରିବା ପାଇଁ ଏକର ପ୍ରତି ୧୦ କି.ଗ୍ରା. କ୍ଲୋରୋପାଇରିଫସ ଗୁଣ୍ଡକୁ ଶେଷ ଓଡ଼ ଚାଷ ବେଳେ ମାଟିରେ ମିଶାଇ ଦେବା ଆବଶ୍ୟକ । ଆକ୍ରାନ୍ତ କିଆରିରେ ଏକର ପ୍ରତି ୪ କି.ଗ୍ରା. ଫୋରେଟ୍ ୧୦ ଜି ପ୍ରୟୋଗ କରିବା ଉଚିତ ।
ଗଛରେ ପତ୍ର ହଳଦିଆ ପଡ଼ି ଶୁଖିଗଲେ ଚିନାବାଦାମ ଅମଳ କରାଯାଏ । ବର୍ଷାଦିନେ ଏକର ପିଛା ୬-୮ କ୍ୱିଣ୍ଟାଲ ଅମଳ ମିଳେ । ଶୀତଦିନେ ଚାଷକଲେ ଏକର ପିଛା ୮-୧୦ କ୍ୱିଣ୍ଟାଲ ଅମଳ ମିଳିଥାଏ ।