ଇଟାମାଳ ଫୁଲ ଚାଷ

ଆଜିକାଲି ଇଟାମାଳ ଫୁଲର ବ୍ୟବହାର ବଢ଼ିବାରେ ଲାଗିଛି । ଏହି ଫୁଲ ଅଧିକ ଦିନ ପର୍ଯ୍ୟନ୍ତ ସତେଜ ରହିଥାଏ । ଏହାକୁ ସ୍ତ୍ରୀଲୋକମ।।ନେ ମୁଣ୍ଡରେ ସଜାଇବାକୁ ପସନ୍ଦ କରନ୍ତି । ଦକ୍ଷିଣ ଭାରତରେ ଏହା ବିଶେଷ ଭାବେ ଚାଷ କରାଯାଏ ।
ବିଭିନ୍ନ ପ୍ରକାରର ମାଟିରେ ଏହି ଫୁଲ ଚାଷ କରାଯାଇ ପାରିବ । ତେବେ ଦୋରସା ବା ବାଲି ଦୋରସା ମାଟିରେ ଏହା ଭଲ ହୁଏ । ଜମି ଉର୍ବର ଏବଂ ନିଗିଡ଼ା ହେବା ଆବଶ୍ୟକ । ମାଟିର ଅମ୍ଳ ପରିମାପକ ମୂଲ୍ୟ ୬ରୁ ୭ ମଧ୍ୟରେ ରହିଲେ ଅଧିକ ଫୁଲ ଅମଳ ହୋଇଥାଏ । ଅଧିକ ଶୀତ ପଡ଼ିଲେ ଗଛ ବଢ଼ିପାରେ ନାହିଁ । ବାୟୁମଣ୍ଡଳର ତାପମାତ୍ରା ୩୦ରୁ ୩୫ ଡିଗ୍ରୀ ସେଲସିଅସ୍ ମଧ୍ୟରେ ରହିଲେ ଗଛ ଭଲ ବିଥାଏ । ଆମ ରାଜ୍ୟରେ ଜୁନ୍‌-ଜୁଲାଇ ଓ ସେପ୍ଟେମ୍ବର-ଅକ୍ଟୋବର ମାସରେ ଏହା ଲଗାଯାଇଥାଏ ।
ଇଟାମାଳର ଅନେକ ଉନ୍ନତ କିସମ ରହିଛି । ସେସବୁ ମଧ୍ୟରୁହ ସେବାକୁଲିସ୍ ରେଡ଼, ଲୁଟିଆ ଏଲୋ, ଦିଲ୍ଲୀ ଆଦି ଚାଷ କଲେ ଭଲ ଫୁଲ ମିଳିଥାଏ । କଲମୀ କରି ବା ମଞ୍ଜିରୁ ଚାରା ଉତାରି ଏହି ଗଛ ଲଗାଯାଏ । ଏକ ଏକର ଜମି ପାଇଁ ପ୍ରାୟ ୨ କିଲୋଗ୍ରାମ ମଞ୍ଜି ଆବଶ୍ୟକ ହୋଇଥାଏ ।
ଲଗାଇବା ପୂର୍ବରୁ ଜମିକୁ ଚାଷ କରି ମାଟି ଗୁଣ୍ଡ କରିଦେବା ଆବଶ୍ୟକ । ଶେଷ ଓଡ଼ ଚାଷ ବେଳେ ଏକର ପ୍ରତି ୪୦-୫୦ କ୍ୱିଣ୍ଟାଲ ସଢ଼ା ଖତ ପ୍ରୟୋଗ କରିବା ଉଚିତ । ଧାଡ଼ିକୁ ଧାଡ଼ି ୬୦ ସେଣ୍ଟିମିଟର ଓ ଗଛକୁ ଛ ୩୦ ସେଣ୍ଟିମିଟର ଦୂରତାରେ ଗଛ ଲଗାଯାଏ । ଏହି ହିସାବରେ ଏକର ପ୍ରତି ପ୍ରାୟ ୨୨୦୦୦ ଗଛ ରହିପାରିବ । ଲଗାଇଲାବେଳୋ ଏକର ପ୍ରତି ୧୦ କିଲୋଗ୍ରାମ ଯବକ୍ଷାର, ୮ କିଲୋଗ୍ରାମ ଫସଫରସ ଓ ୮ କିଲୋଗ୍ରାମ ପଟାସ ପ୍ରୟୋଗ କରିବାକୁ ହୋଇଥାଏ । ଏହି ସାର ପାଇବା ପାଇଁ ଏକର ପିଛା ୨୨ କିଲୋଗ୍ରାମ ୟୁରିଆ, ୫୦ କିଲୋଗ୍ରାମ ସିଙ୍ଗଲ ସୁପର ଫସଫେଟ୍ ଓ ୧୩ କିଲୋଗ୍ରାମ ମ୍ୟୁରେଟ୍ ଅଫ୍ ପଟାସ ଦରକାର । ଏହା ବଦଳରେ ଏକର ପ୍ରତି ୩୧ କିଲୋଗ୍ରାମ ଏନ୍‌ପିକେ (୧୦-୨୬-୨୬) ଓ ୧୫ କିଲୋଗ୍ରାମ ୟୁରିଆ ଦରକାର ହେବ । ଏହା ବଦଳରେ ୫୩ କିଲୋଗ୍ରାମ ଶ୍ୟାମଳା (୧୫-୧୫-୧୫) ଓ ୪ କିଲୋଗ୍ରାମ ୟୁରିଆ ଦରକାର ପଡ଼ିବ । ଏହି ପରିମାଣର ସାରକୁ ଗଛ ଲଗାଇବାର ୬ ମାସ ଓ ଏକ ବର୍ଷ ପରେ ପୁଣି ଥରେ ଦେବାକୁ ପଡ଼ିବ ।
ଏକରୁ ଦେଢ଼ ମାସ ବ୍ୟବଧାନରେ କିଆରିକୁ ଖୁସାଇ ଦେବା ଆବଶ୍ୟକ । ଏହାଦ୍ୱାରା ଘାସ ମରିଯାଏ । ମାଟିର ଆବଶ୍ୟକତାକୁ ଚାହିଁ ଜଳସେଚନ କରିବା ଉଚିତ ।
ଏହି ଫସଲକୁ ସୂତ୍ରକୃମି ଆକ୍ରମଣ କରିଥାନ୍ତି । ଫଳରେ ପତ୍ରଗୁଡ଼ିକ ହଳଦିଆ ହୋଇ ମୋଡ଼ି ହୋଇଯାଏ । ଗଛ ରୁଗ୍‌ଣ ହୋଇଯାଏ । ଚେରରେ ଗଣ୍ଠି ଗଣ୍ଠି ହୋଇଯାଏ । ଜମି ପ୍ରସ୍ତୁତିବେଳେ ଏକର ପ୍ରତି ୧୦-୧୨ କିଲୋଗ୍ରାମ ଫୁରାଡନ୍ ପ୍ରୟୋଗ କଲେ ଏହି ରୋଗରୁ ରକ୍ଷା ମିଳିଥାଏ । ଗୋଟିଏ ଜମିରେ ବାରମ୍ବାହର ଇଟାମାଳ ଚାଷ କରିବା ଉଚିତ ନୁହେଁ । ଏହି ଗଛରେ ମୂଳସଢ଼ା ରୋଗ ହୋଇଥାଏ । ଏହି ରୋଗ ହେଲେ ମାଟି ଉପରେ ଥିବା କାଣ୍ଡରେ ପଚା ଦାଗ ଦେଖାଯାଏ । ପତ୍ରରେ ବାଦାମୀ ରଙ୍ଗର ଚିହ୍ନ ଦେଖାଯାଏ । ଗଛ ଝାଉଁଳିପଡ଼େ । ପ୍ରତି ଲିଟର ପାଣି ସହିତ ୩ ଗ୍ରାମ ବ୍ଲାଇଟକସ୍‌-୫୦ ବା ଧନୁକପ ବା ଇଣ୍ଡେଫିଲ ଏମ୍‌-୪୫ ମିଶାଇ ଗଛ ମୂଳକୁ ସ୍ପ୍ରେ କଲେ ଏହି ରୋଗ ଦମନ ହୋଇଥାଏ ।
ଏହି ଗଛକୁ ଧଳାମାଛି ଆକ୍ରମଣ କରିଥାଆନ୍ତି । ଏମାନେ ପତ୍ର ତଳୋ ରହି ରସ ଶୋଷି ଖାଇଦିଅନ୍ତି । ତେଣୁ ପତ୍ର ହଳଦିଆ ପଡ଼ିଯାଏ । ଗଛ ବଢ଼ି ନ ପାରି ରୁଗ୍‌ଣ ହୋଇଯାଏ । ବେଳେବେଳେ କାତି ପୋକ ମଧ୍ୟ ଲାଗିଥାନ୍ତି । ଏମାନେ ପତ୍ର ଓ ଡାଳରୁ ରସ ଶୋଷି ଖାଇଦିଅନ୍ତି । ଫଳରେ ଗଛ ଭଲ ବଢ଼ିପରେ ନାର୍ହି । ଏହି ପୋକମାନଙ୍କ ଦାଉରୁ ରକ୍ଷା ପାଇବା ପାଇଁ ପ୍ରତି ଲିଟର ପାଣି ସହିତ ୨ ମିଲିଲିଟର ରୋଗର ବା ପ୍ୟାରିଡିମେଟ୍ ବା କ୍ଲୋରୋପାଇରିଫସ ମିଶାଇ ଗଛରେ ସ୍ପ୍ରେ କରାଯାଇପାରିବ ।
ଚାରା ଲଗାଇବାର ତିନି ମାସ ପରେ ଫୁଲ ଫୁଟିଥାଏ । ଗୋଟିଏ ପେନ୍ଥାରେ ୭୦-୮୦ ଫୁଲ ଥାଏ । ଫୁଲକୁ ସକାଳ ବେଳା ହାତରେ ତୋଳି ଅମଳ କରାଯାଏ । ଏକ ଏକର ଜମିରୁ ପ୍ରାୟ ୨୦-୨୫ କ୍ୱିଣ୍ଟାଲ ଫୁଲ ଅମଳ ହୋଇଥାଏ ।