ଦୁଷ୍ମନ୍ତ ଦାସଙ୍କ ମୃତ୍ୟୁ ଘଟଣା ରେ ବିଜେପିର ସାମ୍ବାଦିକ ସମ୍ମିଳନୀ
କୁଜଙ୍ଗର ଦୁଷ୍ମନ୍ତ ଦାସ ମୃତ୍ୟୁ ଘଟଣା ଅତ୍ୟନ୍ତ ଦୁଃଖଦାୟକ ଓ ସମ୍ବେଦନଶୀଳ ଘଟଣା ,ଏହି ଘଟଣାର ସିବିଆଇ ତଦନ୍ତ କରାଯାଉ ବୋଲି ଆଜି ସାମ୍ବାଦିକ ସମ୍ମିଳନୀରେ ବିଜେପିର ବରିଷ୍ଠ ନେତା ମନମୋହନ ସାମଲ ଏହି ଦାବି କରିଛନ୍ତି।
ସେ କହିଛନ୍ତି, ଯଦି ସରକାର ଦୁଷ୍ମନ୍ତଙ୍କ ପାଇଁ ସବୁ ପ୍ରକାର ଚିକିତ୍ସାର ବ୍ୟବସ୍ଥା କରିଥିଲେ, ରାତିରେ ପୋଷ୍ଟମର୍ଟମ କଲେ କାହିଁକି? ତାଙ୍କ ଘରକୁ କାହିଁକି ଶବ ନେଲେ ନାହିଁ? ଶବ ସତ୍କାର ବେଳେ ଦୁଷ୍ମନ୍ତଙ୍କ ପରିବାର ପକ୍ଷରୁ ମହିଳାମାନେ ସାମିଲ ହୋଇଥିଲେ। ପୁରୁଷମାନଙ୍କୁ କାହିଁକି ଏଥିରେ ସାମିଲ କରାଗଲା ନାହିଁ? ଏଥି ପାଇଁଦଳ ସିଧାସଳଖ ରାଜ୍ୟ ସରକାରଙ୍କୁ ଟାର୍ଗେଟ କରିଛି । ଦଳ କହିଛି ଯେ ସରକାର ସାମଜିକ ଅପରାଧ କରିଛନ୍ତି। ତାଙ୍କ ଝିଅକୁ ୩୦ ଲକ୍ଷ ଓ ତାଙ୍କ ପରିବାର ସଦସ୍ୟ ଙ୍କୁ ୨୦ ଲକ୍ଷ ଟଙ୍କା ର ଆର୍ଥିକ ସାହାଯ୍ୟ ଦିଆଯାଉ। ଯେଉଁଭଳି ଭାବରେ ତାଙ୍କ ସହ କରାଗଲା ଏହା ନିନ୍ଦନୀୟ । ମନମୋହନ କହିଛନ୍ତି, “ଓଡ଼ିଶାରେ ସ୍ୱାସ୍ଥ୍ୟ ସେବା କ୍ଷେତ୍ରରେ ସରକାର ସମ୍ପୂର୍ଣ୍ଣ ବିଫଳ ହୋଇଛନ୍ତି। ସରକାର ନିଜର ଅହଙ୍କାର ଓ ଗର୍ବ କାରଣରୁ ରାଜ୍ୟରେ ଆୟୁଷ୍ମାନ ଭାରତ ଲାଗୁ କରୁନାହାନ୍ତି। ସ୍ୱାସ୍ଥ୍ୟସେବା କ୍ଷେତ୍ରରେ ରାଜ୍ୟ ସରକାର ମୁହଁରେ ଭୋକ ଓ ପେଟରେ ଲାଜ ଥିବା ଭଳି କାମ କରୁଛନ୍ତି। ସ୍ୱାସ୍ଥ୍ୟ ସେବାରେ ଦଳ, ଜାତି, ଧର୍ମ ନାହିଁ। ଏହା ଜଣକର ମୌଳିକ ଅଧିକାର। ରାଜ୍ୟ ସରକାର ଗର୍ବ ଅହଂକାର ଛାଡ଼ି ରାଜ୍ୟରେ ଆୟୁଷ୍ମାନ ଭାରତ ଲାଗୁ କରନ୍ତୁ।”ସେପଟେ ଏସସିବିର ସାତ ଜଣିଆ ଇଣ୍ଟରନାଲ ଟିମ୍ ସ୍ବାସ୍ଥ୍ୟ ବିଭାଗକୁ ତଦନ୍ତ ରିପୋର୍ଟ ଦେଇଛନ୍ତି । ଏହି ରିପୋର୍ଟରେ ଦୁଷ୍ମନ୍ତଙ୍କ ଚିକିତ୍ସାରେ ଅବହେଳା ହୋଇନଥିବା ଦର୍ଶାଯାଇଛି । ଏହି ବିଷୟ ରେ ଏସସିବି ପକ୍ଷରୁ ଏହି ସୂଚନା ଦିଆଯାଇଛି ।
ମାତ୍ର ଦୁଷ୍ମନ୍ତଙ୍କ ମାଆ ଅଭିଯୋଗ କରିଛନ୍ତି ଯେ ହସ୍ପିଟାଲରେ ମୋ ପୁଅକୁ ନିର୍ଯାତନା ଦିଆଯାଉଥିଲା। ଦୁଷ୍ମନ୍ତଙ୍କୁ ହସ୍ପିଟାଲରେ କିଛି ଔଷଧ ଦିଆଯାଉ ନଥିବା ବେଳେ ବେଡ ଛାଡି ପଳାଇବାକୁ ବାରାମ୍ବାର ଧମକ ଦିଆଯାଉଥିଲା I
ସୂଚନାଯୋଗ୍ୟ, ଗତ ବର୍ଷ ମାର୍ଚ୍ଚ ମାସରେ ସଡ଼କ ଦୁର୍ଘଟଣାରେ ଦୁଷ୍ମନ୍ତଙ୍କ ବାମ ଗୋଡ଼ରେ ଗଭୀର କ୍ଷତ ହୋଇଥିଲା। କଟକ ବଡ଼ ଡାକ୍ତରଖାନାରେ ତାଙ୍କର ଦୁଇ ଥର ଅପରେସନ୍ କରାଯାଇଥିଲା। ତେବେ କରୋନା ଆଳରେ ୨୦୨୦ ଜୁଲାଇ ୧୫ ତାରିଖରୁ ତାଙ୍କୁ ଘରକୁ ପଠାଇ ଦିଆଯାଇଥିଲା। ତା’ ପରଠାରୁ ତାଙ୍କ ଚିକିତ୍ସାରେ ଅବହେଳା କରାଯାଇଥିବା ସେ ଅଭିଯୋଗ କରିଥିଲେ। ଏମିତିକି ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା (ବିଏସ୍କେୱାଇ)ରେ ଚିକିତ୍ସା ପାଇବା ପାଇଁ ସେ ଦୁଇଟି ଘରୋଇ ହସ୍ପିଟାଲ୍କୁ ଯାଇଥିଲେ। କିନ୍ତୁ ସେହି ହସ୍ପିଟାଲ୍ ଗୁଡ଼ିକ ବିଏସ୍କେୱାଇ କାର୍ଡ ଗ୍ରହଣ କରିବାକୁ ମନା କରି ଦେଇଥିଲେ ବୋଲି ସେ ଅଭିଯୋଗ କରିଥିଲେ। ଚିକିତ୍ସା ପାଇଁ ବିଭିନ୍ନ ସ୍ତରରେ ଗୁହାରୀ କରିବା ପରେ ନିରାଶ ହୋଇ ସେ ବୁଧବାର ବିଧାନସଭା ସମ୍ମୁଖରେ ହାତ କାଟି ଦେବା ସହିତ ବିଷ ପିଇ ଦେଇଥିଲେ। ଆଉ ସେହି ସନ୍ଧ୍ୟାରେ କଟକ ବଡ଼ ଡାକ୍ତରଖାନାରେ ତାଙ୍କର ମୃତ୍ୟୁ ହୋଇଯାଇଥିଲା।
ଏହାପରେ ପ୍ରଶାସନ ତରଫରୁ ତରବରିଆ ଭାବେ ରାତାରାତି ତାଙ୍କ ଶବ ବ୍ୟବଚ୍ଛେଦ କରାଯାଇ ପୁରୀ ସ୍ୱର୍ଗଦ୍ୱାରରେ ସତ୍କାର କରାଯାଇଥିଲା। ଏହାକୁ ନେଇ ଅପ୍ରୀତିକର ପରିସ୍ଥିତି ସୃଷ୍ଟି ହେବା ଆଶଙ୍କାରେ ରାତାରାତି କୁଜଙ୍ଗ ବିଡିଓ ମୃତ ଦୁଷ୍ମନ୍ତଙ୍କ ପତ୍ନୀଙ୍କୁ ଲକ୍ଷେ ଟଙ୍କା ପ୍ରଦାନ କରିଥିଲେ। ଏଥିସହ ତାଙ୍କୁ ଆଉ ୧୦ ଲକ୍ଷ ଟଙ୍କା ଓ ସରକାରୀ ଚାକିରି ଦେବାକୁ ମୌଖିକ ପ୍ରତିଶ୍ରୁତି ମଧ୍ୟ ଦେଇଛନ୍ତ। ହେଲେ ବଞ୍ଚିଥିବା ବେଳେ ଚିକିତ୍ସା ପାଇଁ ଗୁହାରୀ କରୁଥିବା ଯୁବକଙ୍କ ଦୁଃଖ ସରକାର ଶୁଣୁ ନ ଥିବା ବେଳେ ମରୁ ମରୁ କିପରି ସହାୟତା ଅଜାଡ଼ି ଦେଲେ ତାକୁ ନେଇ ନାନା ଆଲୋଚନା ହେଉଛି।
