ବିଜେଡି ପରେ କେନ୍ଦ୍ରମନ୍ତ୍ରୀ ପିୟୂଷ ଗୋୟଲଙ୍କୁ ବିଜେପି ସାଂସଦଙ୍କ ସ୍ମାରକପତ୍ର: ନକଲି ଚାଷୀ, ଠକ ବେପାରୀ,ମଣ୍ଡି କର୍ମଚାରୀଙ୍କ ହରିଲୁଟ୍

ଭୁବନେଶ୍ୱର: ନକଲି ଚାଷୀ, ଠକ ବେପାରୀମାନେ ମଣ୍ଡି କର୍ମଚାରୀଙ୍କ ସହିତ ଅସାଧୁ ମେଣ୍ଟ କରି ଧାନ ବିକ୍ରି ନିମନ୍ତେ ଟୋକନ ହାତେଇ ସରକାରୀ ଏମ୍‌ଏସ୍‌ପିକୁ ହରିଲୁଟ କରୁଛନ୍ତି । ସାଟେଲାଇଟ୍ ସର୍ଭେରେ ଚଳିତ ଖରିଫ୍ ଋତୁରେ ୫ ଲକ୍ଷ ୫୪ ହଜାର ୬୭୯ ଏକର ଜମି ଭୂତ ଜମି ଥିବା ଜଣାପଡ଼ିଛି । ମାତ୍ର ଏ ବାବଦରେ ୧୭୧୫ କୋଟି ଟଙ୍କାର ଏମ୍‌ଏସ୍‌ପି ସହାୟତା ପାଇବାକୁ ମସୁଧା ହୋଇଛି ବୋଲି ବିଜେପି ପ୍ରଶ୍ନ ଉତ୍ଥାପନ କରିଛି । ମଙ୍ଗଳବାର କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ନେତୃତ୍ୱରେ ଓଡ଼ିଶାର ବିଜେପି ସାଂସଦମାନେ ନୂଆଦିଲ୍ଲୀ ଠାରେ କେନ୍ଦ୍ର ଖାଉଟି ବ୍ୟାପାର, ଖାଦ୍ୟ ଏବଂ ସାଧାରଣ ବଣ୍ଟନ ମନ୍ତ୍ରୀ ପିୟୂଷ ଗୋୟଲଙ୍କୁ ଭେଟି ଏହି ମର୍ମରେ ଏକ ସ୍ମାରକ ପତ୍ର ପ୍ରଦାନ କରିଛନ୍ତି । ଏହି ପ୍ରତିନିଧି ମଣ୍ଡଳୀ ମଧ୍ୟରେ ସାଂସଦ ବସନ୍ତ ପଣ୍ଡା, ପ୍ରତାପ ଷଡଙ୍ଗୀ, ସୁରେଶ ପୂଜାରୀ, ସଙ୍ଗୀତା ସିଙ୍ଗଦେଓ, ନିତିଶ ଗଙ୍ଗଦେବ, ଅପରାଜିତା ଷଡଙ୍ଗୀ ପ୍ରମୁଖ ଉପସ୍ଥିତ ଥିଲେ । ପରେ ଗଣମାଧ୍ୟମକୁ ସାଂସଦ ବସନ୍ତ ପଣ୍ଡା କହିଥିଲେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଚାଷୀଙ୍କ ଆୟକୁ ଦୁଇଗୁଣା କରିବା ପାଇଁ ନିରନ୍ତର ସମର୍ଥନ ସହଯୋଗ ଯୋଗାଇ ଆସୁଛନ୍ତି । ସଠିକ୍ ସମୟରେ ଚାଷୀଙ୍କ ଉତ୍ପାଦିତ କୃଷି ସାମଗ୍ରୀର ଉଚିତ୍ ମୂଲ୍ୟ ପ୍ରଦାନକୁ ସୁନିଶ୍ଚିତ କରାଯାଇଛି । ଭାରତ ସରକାରଙ୍କ ଖାଦ୍ୟ ଓ ସାଧାରଣ ବଣ୍ଟନ ବିଭାଗ(ଡିଏଫପିଡି) ବିକେନ୍ଦ୍ରୀକରଣ କ୍ରୟ ପ୍ରଣାଳୀ ମାଧ୍ୟମରେ ସଂଗ୍ରହ ପ୍ରକ୍ରୟା ଏବଂ ପିଡିଏସ୍ ଦକ୍ଷତା ବଢ଼ାଇ ତୃଣମୂଳ ସ୍ତରରେ ଧାନ କିଣାକୁ ପ୍ରୋତ୍ସାହନ ଦେଉଛି । ଏହା ଦ୍ୱାରା ସ୍ଥାନୀୟ ଚାଷୀମାନେ ଏମ୍‌ଏସ୍‌ପିର ଲାଭ ନେଉଛନ୍ତି । ମାତ୍ର ଓଡ଼ିଶାରେ ରାଜ୍ୟ ସରକାରଙ୍କ ଅବ୍ୟବସ୍ଥା କାରଣରୁ ଧାନ ସଂଗ୍ରହ ପ୍ରକ୍ରିୟା ଓଡ଼ିଶାର ଚାଷୀଙ୍କ ପାଇଁ ମୁଣ୍ଡବ୍ୟଥାର କାରଣ ହୋଇଛି । ୧୬ ମାର୍ଚ୍ଚ ୨୦୨୧ ଏବଂ ୨୨ ଡିସେମ୍ବର ୨୦୨୨ରେ ଆର୍‌ଏମ୍‌ଏସି, ମଣ୍ଡି ସୋସାଇଟି ଚାଲିଥିବା ଦୁର୍ନୀତି ଓ ଅବ୍ୟବସ୍ଥା ସମ୍ପର୍କରେ ଆମ ଦଳ ତରଫରୁ ଭାରତ ସରକାରଙ୍କ ବିଭାଗୀୟ ମନ୍ତ୍ରାଳୟକୁ ବିସ୍ତୁତ ସୂଚନା ଦିଆଯାଇଥିଲା । ଏହି ଦୁର୍ନୀତିକୁ ନେଇ କେନ୍ଦ୍ରୀୟ ଟିମ୍ କରିଥିବା ତଦନ୍ତରେ ମଧ୍ୟ ଉକ୍ତ ବିଷୟରେ ମତ ରଖିଥିଲା । ମାତ୍ର ଦୁର୍ଭାଗ୍ୟଜନକ ଭାବେ ରାଜ୍ୟ ସରକାର କେନ୍ଦ୍ରୀୟ ତଦନ୍ତକାରୀ ଟିମ୍ ଦେଇଥିବା ରିପୋର୍ଟ ଓ ପରାମର୍ଶକୁ ଉପେକ୍ଷା କରିଛନ୍ତି । ଶ୍ରୀ ପଣ୍ଡା କହିଛନ୍ତି ଯେ, ସରକାରୀ ଭାବେ ଖରିଫ୍ ଧାନ କିଣା ବ୍ୟବସ୍ଥା ଅକ୍ଟୋବରରୁ ଆରମ୍ଭ ହୋଇଥାଏ । ଧାନ କିଣାକୁ ବ୍ୟବସ୍ଥିତ କରିବା ପାଇଁ ଏହାର ସମୟ ସୀମା ରହିଛି ୧୫୧ ଦିନ । ମାତ୍ର ଓଡ଼ିଶାରେ କିଛି ଜିଲ୍ଲାକୁ ଛାଡ଼ିିଦେଲେ ଡ଼ିସେମ୍ବର ତୃତୀୟ ସପ୍ତାହ ସୁଦ୍ଧା ମଣ୍ଡି ଖୋଲିନାହିଁ । ନିର୍ଦ୍ଧାରିତ ୧୫୧ ଦିନ ସରକାରୀ ଧାନ କିଣା ସମୟ ସୀମା ପରିବର୍ତ୍ତେ ୪୦-୪୩ ଦିନରେ ଧାନ କିଣା ହେବା ଚାଷୀଙ୍କ ପାଇଁ ଚିନ୍ତାର କାରଣ ହୋଇଛି । ଏକ ନିର୍ଦ୍ଦିଷ୍ଟ ବିକ୍ରି ସମୟ ସୀମା କାରଣରୁ ଚାଷୀମାନେ ସେମାନଙ୍କ ଉତ୍ପାଦିତ ଶସ୍ୟକୁ ମଣ୍ଡିକୁ ଆଣି ବିକ୍ରି କରିବା ଏବଂ ନିଜର କଷ୍ଟ ଉପାର୍ଜିତ ଆୟ କରିବାରେ ଅସମର୍ଥ ହେଉଛନ୍ତି । ନିକଟରେ ହୋଇଥିବା ଡ୍ରୋନ ସର୍ଭେର ରିପୋର୍ଟ ଅନୁସାରେ ପ୍ରାୟ ୩୫% ଚାଷ ଜମିରୁ ଫସଲ ଅମଳ ସରିଛି । ମାତ୍ର ଅଧିକାଂଶ ଉପକୂଳବର୍ତ୍ତୀ ଜିଲ୍ଲାରେ ଏପର୍ଯ୍ୟନ୍ତ ମଣ୍ଡି ଖୋଲିନାହିଁ । ରାଜ୍ୟ ସରକାର ବିକେନ୍ଦ୍ରୀକରଣ ନାଁରେ ଜିଲ୍ଲାସ୍ତରୀୟ ଧାନ କିଣା କମିଟି (ଡିଏଲ୍‌ସିପି) ଉପରେ ଦୋଷ ଲଦୁଛନ୍ତି । ଏହି ସବୁ ପରୋକ୍ଷ ଭାବରେ ଓଡ଼ିଶା ସରକାରଙ୍କ ପ୍ରତିନିଧି ତଥା ଅଧିକାରୀଙ୍କ ଦ୍ୱାରା ନିୟନ୍ତ୍ରିତ ହେଉଛି । ମଣ୍ଡିର ସେକ୍ରେଟାରୀଙ୍କ ଦ୍ୱାରା ଦଳୀୟ ଭିତ୍ତିରେ ଟୋକନ ଦେବାରେ ପକ୍ଷପାତିତା ହେଉଛି । ଅନେକ କ୍ଷୁଦ୍ର ଓ ନାମମାତ୍ର ଚାଷୀଙ୍କ ଟୋକନ ଲାପ୍ସ ହେଉଛି । ଧାନକିଣାରେ ମିଲରଙ୍କ ଦ୍ୱାରା ପ୍ରିୟାପ୍ରୀତି ପୋଷଣର ଶୀକାର ଚାଷୀମାନେ ହେଉଛନ୍ତି । ଚାଷୀଙ୍କୁ ପ୍ରତି କ୍ୱିଣ୍ଟାଲ ଧାନ ସହ ୬ ରୁ୮ କିଲୋ ଧାନ ଦଲାଲ ଏବଂ ଏଜେଣ୍ଟଙ୍କୁ ଦେବା ପାଇଁ ବାଧ୍ୟ କରାଯାଉଛି । ଯାହା ସ୍ଥାନୀୟ କଟନୀ-ଛଟନୀକୁ ପ୍ରୋତ୍ସାହିତ କରୁଛି । କଟନୀ-ଛଟନୀ କାରଣରୁ ଚାଷୀମାନେ ଧାନ ଏମଏସପିର ଧାର୍ଯ୍ୟ ମୂଲ୍ୟ କ୍ୱିଣ୍ଟାଲ ପିଛା ୧୯୪୦ ଟଙ୍କା ପାଇବାରୁ ବଞ୍ଚିତ ହେଉଛନ୍ତି । ଉଷୁନା ଧାନ ଏଫଏକ୍ୟୁ ଦ୍ୱାରା ମାନ ନିର୍ଦ୍ଧାରଣ କରାଯାଉଥିବା ବେଳେ କିଣା ପ୍ରକ୍ରିୟାରେ ସାମିଲ ଥିବା ବ୍ୟକ୍ତିଙ୍କ ଦ୍ୱାରା ମୂଲ୍ୟର ଦୁରୂପଯୋଗ କରାଯାଉଛି । ଯୋଗାଣ ଅଧିକାରୀମାନେ ମିଲରମାନଙ୍କୁ ମଣ୍ଡି ଓ ଧାନ କିଣାର ପରିମାଣ ଧାର୍ଯ୍ୟ କରୁଥିବାରୁ ମିଲରମାନେ ଯୋଗାଣ ଅଧିକାରୀଙ୍କ ଇସାରାରେ କାର୍ଯ୍ୟ କରୁଛନ୍ତି ବୋଲି ସାଂସଦ ଶ୍ରୀ ପଣ୍ଡା ଅଭିଯୋଗ କରିଛନ୍ତି ।