ନୂଆଦିଲ୍ଲୀ: ସିବିଆଇ ପରେ ବର୍ତ୍ତମାନ ପ୍ରବର୍ତ୍ତନ ନିର୍ଦ୍ଦେଶାଳୟ ଦିଲ୍ଲୀ ଅବକାରୀ ଦୁର୍ନୀତି ମାମଲାରେ ଆପ୍ ମୁଖ୍ୟ ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କୁ ସମନ କରିଥିଲା । ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ପକ୍ଷରୁ ଆସନ୍ତା ନଭେମ୍ବର ୨ ତାରିଖରେ ହାଜର ହେବା ପାଇଁ ତାଙ୍କୁ କୁହାଯାଇଥିଲା । ତେବେ କେଜ୍ରିୱାଲଙ୍କୁ ସମନ ପରେ ଏବେ ଆପ ମୁଣ୍ଡରେ ଚଡକ ପଡିଛି । ପଚରାଉଚରା ବେଳେ ମୁଖ୍ୟମନ୍ତ୍ରୀ କେଜ୍ରିୱାଲଙ୍କୁ ଗିରଫ କରାଯିବାର ଆଶଙ୍କା ପ୍ରକାଶ ପାଇଛି।
ଏହି ପ୍ରସଙ୍ଗରେ ଦିଲ୍ଲୀ ଶିକ୍ଷା ମନ୍ତ୍ରୀ ତଥା ବରିଷ୍ଠ ଆପ ନେତ୍ରୀ ଅତିଶି କହିଛନ୍ତି ଯେ ନଭେମ୍ବର ୨ରେ ଦିଲ୍ଲୀ ମୁଖ୍ୟମନ୍ତ୍ରୀଙ୍କୁ ଗିରଫ କରାଯାଇପାରେ। ଅତିଶି କହିଛନ୍ତି ଯେ ଗତ ଦେଢ଼ ବର୍ଷ ଧରି ଇଡି ଏବଂ ସିବିଆଇ ଅବକାରୀ ଦୁର୍ନୀତି ମାମଲାର ତଦନ୍ତ ଜାରି ରଖିଛନ୍ତି, କିନ୍ତୁ ଏପର୍ୟ୍ୟନ୍ତ ସେମାନେ ଦୁର୍ନୀତିର କୌଣସି ପ୍ରମାଣ ପାଇପାରିନାହାନ୍ତି । ଅତିଶି କହିଛନ୍ତି ଯେ ଦୁର୍ନୀତି ନଥିବା ପ୍ରମାଣ ମିଳିବା ପରେ ଆମ୍ ଆଦମୀ ଦଳର ଜଣଙ୍କ ପରେ ଜଣେ ନେତାଙ୍କୁ ଜେଲରେ ରଖାଯାଉଛି। ସେ ଅଭିଯୋଗ କରିଛନ୍ତି ଯେ ବିଜେପି ଏବଂ ପ୍ରଧାନମନ୍ତ୍ରୀ ଆପ ଏବଂ ଅରବିନ୍ଦ କେଜ୍ରିୱାଲଙ୍କୁ ଭୟ କରୁଛନ୍ତି, ସେଥିପାଇଁ ତାଙ୍କୁ ଗିରଫ କରାଯାଇପାରେ । ଅତିଶି ଦାବି କରିଛନ୍ତି ଯେ ଅରବିନ୍ଦ କେଜ୍ରିୱାଲ ଗିରଫ ହେବା ପରେ ହେମନ୍ତ ସୋରେନ, ତେଜସ୍ୱୀ ଯାଦବ, ମମତା ବାନାର୍ଜୀ ଏବଂ ପିନାରାଇ ବିଜୟନଙ୍କୁ ଗିରଫ କରାଯାଇପାରେ ।
ଉଲ୍ଲେଖ ଥାଉ କି ଗତକାଲି ଇଡି ସମନ ଉପରେ କେଜ୍ରିୱାଲ ପ୍ରତିକ୍ରିୟା ଦେଇନଥିବା ବେଳେ ଦିଲ୍ଲୀ ମନ୍ତ୍ରୀ ସୌରଭ ଭରଦ୍ବାଜ କେନ୍ଦ୍ରକୁ ସମାଲୋଚନା କରିଥିଲେ । ସେ କହିଥିଲେ ଯେ ଏଥିରୁ ଗୋଟିଏ କଥା ସ୍ପଷ୍ଟ ଯେ ଯେକୌଣସି ମତେ ଆପ୍କୁ ଧ୍ବଂସ କରିବା ହେଉଛି କେନ୍ଦ୍ରର ଲକ୍ଷ୍ୟ। ମୁଖ୍ୟମନ୍ତ୍ରୀ କ୍ରେଜିୱାଲଙ୍କୁ ଜେଲ୍ରେ ଭର୍ତ୍ତି କରିବା ଏବଂ ଆପ୍କୁ ଧ୍ବଂସ କରିବା ପାଇଁ ସେମାନେ ଉଦ୍ୟମ ଜାରି ରଖିଛନ୍ତି।
Comments are closed, but trackbacks and pingbacks are open.