କିମ୍‍ସରେ ବାଇଲାଟେରାଲ ରୋବୋଟିକ୍ ଆଣ୍ଠୁ ପ୍ରତିରୋପଣ

ଭୁବନେଶ୍ୱର, ୮ । ୫: କିମସରେ ଉଭୟ ଆଣ୍ଠୁରେ ଗମ୍ଭୀର ଅଷ୍ଟିଓଆର୍ଥ୍ରାଇଟିସ୍ ରୋଗରେ ପୀଡ଼ିତ ଜଣେ ୬୭ ବର୍ଷୀୟା ମହିଳାଙ୍କଠାରେ ବାଇଲାଟେରାଲ ରୋବୋଟିକ୍ ଆଣ୍ଠୁ ସଫଳ ପ୍ରତିରୋପଣ କରାଯାଇଛି। ଅସ୍ତ୍ରୋପଚାରର ପରଦିନଠାରୁ ରୋଗୀ ଭଲ ଭାବେ ଚାଲିବା ଆରମ୍ଭ କରିଛନ୍ତି। କିମ୍‍ସର ବିଶିଷ୍ଟ ଅସ୍ଥିଶଲ୍ୟ ସର୍ଜନ ଡା ବସନ୍ତ ବେହେରାଙ୍କ ନେତୃତ୍ୱରେ ଏହି ସଫଳ ଅସ୍ତ୍ରୋପଚାର କରାଯାଇଛି। ପୂର୍ବରୁ ରୋଗୀ ଆଣ୍ଠୁ ପ୍ରତିରୋପଣ ପାଇଁ ବିଭିନ୍ନ ହସ୍ପିଟାଲର ଅନେକ ସର୍ଜନଙ୍କ ସହିତ ପରାମର୍ଶ କରିଥିଲେ ମଧ୍ୟ ଉଭୟ ଆଣ୍ଠୁ ଅସ୍ତ୍ରୋପଚାର ଏକାଠି କରିବା ସମ୍ଭବ ହୋଇପାରି ନଥିଲା। କିମ୍‍ସରେ ରୋବୋଟିକ୍ ଆଣ୍ଠୁ ପ୍ରତିରୋପଣର ମାତ୍ର ୫ ଦିନରେ ରୋଗୀ ସୁସ୍ଥ ହୋଇ ଘରକୁ ଫେରିଛନ୍ତି। 

‘ରୋବୋଟିକ୍ ସହାୟତାରେ ଆଣ୍ଠୁ ପ୍ରତିରୋପଣ ଅତ୍ୟନ୍ତ ଠିକ୍ ଅସ୍ତ୍ରୋପଚାର ଯୋଜନା ଏବଂ ଉତ୍ତମ ରୋଗୀ ସନ୍ତୁଷ୍ଟି ସୁନିଶ୍ଚିତ କରେ। ଏହା ସହ ଏହି ପ୍ରକ୍ରିୟାରେ ଅସ୍ତ୍ରୋପଚାର କଲେ ରୋଗୀ ଶୀଘ୍ର ସୁସ୍ଥ ହେବାରେ ସକ୍ଷମ କରିଥାଏ ବୋଲି ଡା ବେହେରା କହିଛନ୍ତି। କିମସ ସୁପର ସ୍ପେଶାଲିଟି ହସ୍ପିଟାଲରେ ସ୍ମିଥ୍ ଏବଂ ନେଫିଉଙ୍କ ଦ୍ୱାରା ଉନ୍ନତ ରୋବୋଟିକ୍‌-ସହାୟତାପ୍ରାପ୍ତ ସଂପୂର୍ଣ୍ଣ ଆଣ୍ଠୁ ପ୍ରତିରୋପଣ ବ୍ୟବସ୍ଥା ସ୍ଥାପନ ଦ୍ୱାରା ଏହି ସଫଳ ଅସ୍ତ୍ରୋପଚାର ସମ୍ଭବ ହୋଇପାରିଛି। ଅତ୍ୟାଧୁନିକ ରୋବୋଟିକ୍ ପ୍ରଯୁକ୍ତି ସଠିକ୍ ହାଡ଼କୁ ଠିକ ଭାବେ ଅସ୍ତ୍ରୋପଚାର କରିବା ସହ ଉପଯୁକ୍ତ ଇମ୍‍ପ୍ଲାଣ୍ଟ ଲଗାଇବା ଓ ପ୍ରାକୃତିକ ଆଣ୍ଠୁ ଶରୀର ଗଠନର ଉତ୍ତମ ପୁନରୁଦ୍ଧାରକୁ ସକ୍ଷମ କରିଥାଏ। ଅନେକ ରୋବୋଟିକ୍ ସିଷ୍ଟମ୍ ପରି, ସ୍ମିଥ୍ ଏବଂ ନେଫିଉ ପ୍ରଯୁକ୍ତିବିଦ୍ୟା ପାଇଁ ଅସ୍ତ୍ରୋପଚାର ପୂର୍ବରୁ ସିଟି ସ୍କାନ୍ କିମ୍ବା ବ୍ୟାପକ ଅସ୍ତ୍ରୋପଚାର ପୂର୍ବରୁ ଯୋଜନା ଆବଶ୍ୟକ ହୁଏ ନାହିଁ ବୋଲି ଡା. ବେହେରା ପ୍ରକାଶ କରିଛନ୍ତି।