ଆୟୁର୍ବେଦ ଉପଚାର ପଦ୍ଧତି ସମ୍ପର୍କରେ ଅଧିକ ଗବେଷଣା ପାଇଁ ଛାତ୍ରଛାତ୍ରୀମାନଙ୍କୁ ଆହ୍ବାନ ଦେଲେ ରାଷ୍ଟ୍ରପତି

ଭୁବନେଶ୍ଵର: ଲୋକଲୋଚନକୁ ଆସିପାରିନଥିବା ଆୟୁର୍ବେଦ ଉପଚାର ପଦ୍ଧତି ସମ୍ପର୍କରେ ଅଧିକ ଗବେଷଣା ପାଇଁ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଛାତ୍ରଛାତ୍ରୀମାନଙ୍କୁ ଆହ୍ବାନ ଦେଇଛନ୍ତି। ଗବେଷଣା ଯେ କୌଣସି ପଦ୍ଧତିର ବୈଜ୍ଞାନିକ ଭିତ୍ତିକୁ ପ୍ରମାଣ କରିବାକୁ ସକ୍ଷମ ହୋଇଥାଏ। ଏହି ପ୍ରମାଣ ଜନସାଧାରଣରେ ଆସ୍ଥା ବୃଦ୍ଧି କରେ ଏବଂ ଆସ୍ଥା ଗ୍ରହଣୀୟତାର ମାର୍ଗକୁ ପ୍ରଶସ୍ତ କରିଥାଏ ବୋଲି ରାଷ୍ଟ୍ରପତି କହିଛନ୍ତି। ଆଜି ପୁରୀ ଗୋପବନ୍ଧୁ ଆୟୁର୍ବେଦ ମହାବିଦ୍ୟାଳୟର ହିରକ ଜୟନ୍ତୀ ସମାରୋହକୁ ସମ୍ବୋଧିତ କରି ରାଷ୍ଟ୍ରପତି କହିଛନ୍ତି, ଅଧିକ ଗବେଷଣା ଦ୍ବାରା ପ୍ରାଚୀନ ଆୟୁର୍ବେଦ ଚିକିତ୍ସା ପଦ୍ଧତି ବିଶ୍ବରେ ଅଧିକ ମାତ୍ରାରେ ଆଦୃତ ହୋଇପାରିବ। ଆଦିବାସୀ ସମ୍ପ୍ରଦାୟରେ ମଧ୍ୟ ଏକ ଚିକିତ୍ସା ପଦ୍ଧତି ପ୍ରଚଳିତ ଅଛି। ସେହିସବୁ ପଦ୍ଧତି ସମ୍ପର୍କରେ ତାଙ୍କର କିଞ୍ଚିତ ପରିଚୟ ରହିଛି ବୋଲି ରାଷ୍ଟ୍ରପତି କହିଛନ୍ତି। ଏହିସବୁ ଚିକିତ୍ସା ଜ୍ଞାନ ଧୀରେ ଧୀରେ ଲୋପ ପାଇବାରେ ଲାଗିଛି। ସେହି ଚିକିତ୍ସା ପଦ୍ଧତିର ବୈଜ୍ଞାନିକ ଭିତ୍ତି ଅନ୍ବେଷଣ ପାଇଁ ସେ ଛାତ୍ରଛାତ୍ରୀମାନଙ୍କ ଆହ୍ବାନ ଦେଇଛନ୍ତି। ଏହି ଅବସରରେ ସେ କହିଛନ୍ତି, ରାଜ୍ୟ ସଂଗ୍ରହାଳୟରେ ଅନେକ ତାଳପତ୍ର ପୋଥି ରହିଛି। ସେହିସବୁ ପୋଥିରେ ସାହିତ୍ୟ ବ୍ୟତୀତ ଚିକିତ୍ସା ଶାସ୍ତ୍ର ସମ୍ପର୍କରେ ମଧ୍ୟ ଅବତାରଣା କରାଯାଇଛି। ସେସବୁକୁ ମଧ୍ୟ ଲୋକଲୋଚନକୁ ଆଣିବା ପାଇଁ ରାଷ୍ଟ୍ରପତି ଆହ୍ବାନ ଦେଇଛନ୍ତି।