ହାଇଦ୍ରାବାଦ: ସାମାଜିକ ଗଣମାଧ୍ୟମରେ ଖାତା ଉପରେ କଟକଣା ଲଗାଇବା ପ୍ରତିବାଦରେ ତେଲେଙ୍ଗାନା ଯୁବ କଂଗ୍ରେସ କର୍ମୀମାନେ ହାଇଦ୍ରାବାଦସ୍ଥିତ ମେଟା କାର୍ଯ୍ୟାଳୟରେ ପଶି ତୀବ୍ର ହଙ୍ଗାମା କରିଛନ୍ତି। ପ୍ରତିବାଦକାରୀମାନେ କାର୍ଯ୍ୟାଳୟ ପରିସରରେ ଥିବା ଫୁଲଦାନୀ ଭାଙ୍ଗିବା ସହିତ କମ୍ପାନୀ ବିରୋଧରେ ନାରାବାଜି କରିଥିଲେ। ଖାତା ନିଲମ୍ବନକୁ ନେଇ ଉତ୍ତେଜିତ ଥିବା ଯୁବ କଂଗ୍ରେସ ପକ୍ଷରୁ ନିଷିଦ୍ଧ ଖାତା ଓ ପୋଷ୍ଟଗୁଡ଼ିକୁ ପୁନଃସ୍ଥାପିତ କରିବା ପାଇଁ ମେଟାକୁ ସାତ ଦିନର ମହଲତ ଦିଆଯାଇଛି। ଯଦି ଏହି ସମୟ ମଧ୍ୟରେ ଦାବି ପୂରଣ ନ ହୁଏ, ତେବେ ଆନ୍ଦୋଳନକୁ ଆହୁରି ତୀବ୍ର କରାଯିବ ବୋଲି କର୍ମୀମାନେ ଚେତାବନୀ ଦେଇଛନ୍ତି। ତେଲେଙ୍ଗାନା ଯୁବ କଂଗ୍ରେସ ରାଜ୍ୟ ସଭାପତି ଶିବଚରଣ ରେଡ୍ଡୀଙ୍କ ନେତୃତ୍ୱରେ ବହୁ ସଂଖ୍ୟାରେ କର୍ମୀ ମେଟା କାର୍ଯ୍ୟାଳୟରେ ପହଞ୍ଚିଥିଲେ। ସେମାନେ ଅଭିଯୋଗ କରିଛନ୍ତି ଯେ ରାଜନୈତିକ ଚାପରେ ପଡ଼ି ସାମାଜିକ ଗଣମାଧ୍ୟମ ମଞ୍ଚରେ କଂଗ୍ରେସ ନେତାମାନଙ୍କ ଖାତା ଓ ପୋଷ୍ଟଗୁଡ଼ିକୁ ଜାଣିଶୁଣି ଟାର୍ଗେଟ କରାଯାଉଛି। ବିକ୍ଷୋଭ ବେଳେ କର୍ମୀମାନେ କେନ୍ଦ୍ରରେ କ୍ଷମତାସୀନ ଭାରତୀୟ ଜନତା ପାର୍ଟି ସରକାର ଏବଂ ମେଟା ବିରୋଧରେ ସ୍ଲୋଗାନ ଦେଇଥିଲେ।