ନୂଆଦିଲ୍ଲୀ: ତାମିଲନାଡ଼ୁର ପ୍ରଗତି ଏବଂ ଜନସାଧାରଣଙ୍କ ସେବା ପାଇଁ କେନ୍ଦ୍ର ସରକାର ସଦାସର୍ବଦା ପ୍ରତିବଦ୍ଧ ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପ୍ରକାଶ କରିଛନ୍ତି। ରାଜ୍ୟରେ ଯେତେ ସରକାର ବଦଳିଲେ ବି ତାମିଲନାଡ଼ୁର ସର୍ବାଙ୍ଗୀନ ଉନ୍ନତି ପାଇଁ ତାଙ୍କ ସଂକଳ୍ପ ଅପରିବର୍ତ୍ତିତ ରହିଛି ବୋଲି ଦର୍ଶାଇବା ସହ ଦେଶର ବିକାଶ ନିମନ୍ତେ ରାଜ୍ୟଗୁଡ଼ିକୁ ସଶକ୍ତ କରିବା ଜରୁରୀ ବୋଲି ସେ ଗୁରୁତ୍ୱାରୋପ କରିଛନ୍ତି। ରବିବାର ତାମିଲନାଡ଼ୁ ଗସ୍ତ ଅବସରରେ ପ୍ରଧାନମନ୍ତ୍ରୀ ପ୍ରାୟ ୧୩,୦୦୦ କୋଟି ଟଙ୍କା ବ୍ୟୟବରାଦରେ ନିର୍ମିତ ବିଭିନ୍ନ ଗୁରୁତ୍ୱପୂର୍ଣ୍ଣ ଭିତ୍ତିଭୂମି ପ୍ରକଳ୍ପର ଶୁଭାରମ୍ଭ ଓ ଲୋକାର୍ପଣ କରିଛନ୍ତି। ଏହି ପ୍ରକଳ୍ପଗୁଡ଼ିକ ମଧ୍ୟରେ ଚେନ୍ନାଇ ମେଟ୍ରୋ ରେଳର ଦ୍ୱିତୀୟ ପର୍ଯ୍ୟାୟ ଅନ୍ୟତମ। ଏହି ଅବସରରେ ଉଦ୍ବୋଧନ ଦେଇ ସେ କହିଛନ୍ତି ଯେ ନୂତନ ମେଟ୍ରୋ ସେବା ଓ ପରିବହନ ଭିତ୍ତିଭୂମି ଦ୍ୱାରା ଯାତାୟାତ ସୁଗମ ହେବା ସହ ବ୍ୟବସାୟ-ବାଣିଜ୍ୟ ବୃଦ୍ଧି ପାଇବ ଏବଂ ଯୁବପିଢ଼ିଙ୍କ ପାଇଁ ବ୍ୟାପକ ନିଯୁକ୍ତି ସୁଯୋଗ ସୃଷ୍ଟି ହେବ। ଗତ ୧୨ ବର୍ଷ ମଧ୍ୟରେ ଦେଶରେ ମେଟ୍ରୋ ସେବାର ଅଭୂତପୂର୍ବ ସମ୍ପ୍ରସାରଣ ଘଟିଛି, ଯାହା ସହରାଞ୍ଚଳ ଜୀବନଧାରାକୁ ଆହୁରି ସହଜ କରିଛି। ଏତଦ୍ବ୍ୟତୀତ ‘ମେକ୍ ଇନ୍ ଇଣ୍ଡିଆ’ ଓ ‘ଭୋକାଲ୍ ଫର ଲୋକାଲ୍’ ଯୋଜନା ଜରିଆରେ ତାମିଲନାଡ଼ୁ ବିଶେଷ ଭାବେ ଲାଭାନ୍ୱିତ ହେଉଛି ବୋଲି ସେ ସ୍ପଷ୍ଟ କରିଛନ୍ତି।