ପ୍ରକାଶିତ ଖବର ଉପରେ ନିଜ ଆଡ଼ୁ ମାମଲା ଦାଏର କଲେ ଓଡ଼ିଶା ରାଜ୍ୟ ମାନବାଧିକାର କମିଶନର:ତ୍ୱରିତ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ କେନ୍ଦ୍ରାପଡ଼ା ଜିଲ୍ଲାପାଳଙ୍କୁ ନିର୍ଦ୍ଦେଶ

ଭୁବନେଶ୍ୱର: ଦୈନିକ ଖବରକାଗଜ ‘ପ୍ରମେୟ’ରେ ୨୦୨୬ ନଭେମ୍ବର ୧୯ ତାରିଖ ଦିନ ପ୍ରକାଶିତ ‘ଭତ୍ତା ଓ ରାସନ୍‌ ଅପେକ୍ଷାରେ ଦିବ୍ୟାଙ୍ଗ ମହିଳା, ଦିନେ ଖାଇଲେ ଆର ଦିନକୁ ଉପାସ’ ଶୀର୍ଷକ ଖବର ଉପରେ ଓଡ଼ିଶା ମାନବାଧିକାର କମିଶନର ନିଜ ଆଡ଼ୁ ସଂଜ୍ଞାନ ନେଇଛନ୍ତି । ଓଡ଼ିଶା ରାଜ୍ୟ ମାନବାଧିକାର କମିଶନର ଆୟୁକ୍ତ ନ୍ୟାୟମୂର୍ତ୍ତି ଶ୍ରୀ ଶତ୍ରୁଘ୍ନ ପୂଜାହାରୀ ଓ ସଦସ୍ୟ ଶ୍ରୀ ବିରଜା ଶଙ୍କର ମିଶ୍ର ନିଜ ଆଡ଼ୁ ମାମଲା ଦାଏର କରି କେନ୍ଦ୍ରାପଡ଼ାର ଜିଲ୍ଲାପାଳଙ୍କୁ ଘଟଣାର ତଦନ୍ତ କରି ସବିଶେଷ ତଥ୍ୟ ଦେବା ପାଇଁ ତାରିଖ ଧାର୍ଯ୍ୟ କରିଛନ୍ତି । ପ୍ରକାଶିତ ଖବର ଅନୁଯାୟୀ କେନ୍ଦ୍ରାପଡ଼ା ଜିଲ୍ଲା ଡେରାବିସ ବ୍ଲକ୍‌ ଅନ୍ତର୍ଗତ ଖାମୋଲା ଗ୍ରାମର ଦିବ୍ୟାଙ୍ଗ ମହିଳା ମିନତି ଦାସ ଶାରୀରିକ ଅକ୍ଷମ ହୋଇ ଚାଲିବାକୁ ସକ୍ଷମ ନୁହନ୍ତି । ସେ ନିଜ ପିତାମାତାଙ୍କୁ ହରାଇ ଥିବାରୁ ନିଜର ପଡ଼ୋଶୀ ଏବଂ ଆଖପାଖ ଲୋକଙ୍କ ଉପରେ ନିର୍ଭରଶୀଳ ଅଟନ୍ତି । ତାଙ୍କର ଆଧାର କାର୍ଡଟି ପୁନଃପଞ୍ଜିକରଣ ହୋଇପାରି ନଥିବାରୁ ସେ ବିଗତ ତିନିମାସ ଧରି ରାସନ୍‌ ପାଇବାରୁ ବଞ୍ଚିତ ହୋଇଛନ୍ତି । ଏ ସଂପର୍କରେ ଡେରାବିସ୍‌ ବ୍ଲକ୍‌ କର୍ତ୍ତୃପକ୍ଷଙ୍କୁ ସେ ବାରମ୍ବାର ଅବଗତ କରାଇଥିଲେ ମଧ୍ୟ କୌଣସି ସୁଫଳ ମିଳିପାରି ନଥିଲା । ଓଡ଼ିଶା ରାଜ୍ୟ ମାନବାଧିକାର କମିଶନର ତାଙ୍କ ନିର୍ଦ୍ଦେଶନାମାରେ କହିଛନ୍ତି ଯେ କୌଣସି ବୈଷୟିକ ତ୍ରୁଟି ଯୋଗୁଁ ଜଣେ ନାଗରିକଙ୍କୁ ସରକାରଙ୍କ ଜନକଲ୍ୟାଣକାରୀ ଯୋଜନାରୁ ବଞ୍ଚିତ କରିବା ଏକ ଗୁରୁତର ମାନବାଧିକାର ଉଲ୍ଲଂଘନ । କେନ୍ଦ୍ରାପଡ଼ାର ଜିଲ୍ଲାପାଳ ମିନତି ଦାସଙ୍କୁ ତୁରନ୍ତ ଜିଲ୍ଲା ଜରୁରୀ ପାଣ୍ଠି କିମ୍ବା ରେଡ୍‌କ୍ରସ୍‌ ଶାଖା ପକ୍ଷରୁ ସହାୟତା ଯୋଗାଇଦେବା ପାଇଁ କମିଶନର ସୁପାରିଶ କରିଛନ୍ତି ।