ପିଏଫ୍ ନିୟମରେ ବଡ଼ ପରିବର୍ତ୍ତନ: ଏଣିକି ଉଠାଇହେବ ୯୦% ଟଙ୍କା

ନୂଆଦିଲ୍ଲୀ: କର୍ମଚାରୀ ଭବିଷ୍ୟନିଧି ପାଣ୍ଠି (ଇପିଏଫ୍) ଟଙ୍କା ଉଠାଣ ନିୟମରେ କର୍ମଚାରୀ ଭବିଷ୍ୟନିଧି ସଂଗଠନ (ଇପିଏଫ୍ଓ) ପକ୍ଷରୁ ଏକ ଗୁରୁତ୍ୱପୂର୍ଣ୍ଣ ପରିବର୍ତ୍ତନ କରାଯାଇଛି। ନୂଆ ନିଷ୍ପତ୍ତି ଅନୁଯାୟୀ, ଏଣିକି ପିଏଫ୍ ଖାତାରେ ପୂର୍ବଭଳି ୨୫ ପ୍ରତିଶତ ନୁହେଁ, ବରଂ ସର୍ବନିମ୍ନ ୧୦ ପ୍ରତିଶତ ଜମା ରାଶି ରଖି ଅବଶିଷ୍ଟ ୯୦ ପ୍ରତିଶତ ପର୍ଯ୍ୟନ୍ତ ଯୋଗ୍ୟ ଟଙ୍କା ଉଠାଯାଇପାରିବ। ନଭେମ୍ବର ୧୯ ତାରିଖରେ ଅନୁଷ୍ଠିତ ଇପିଏଫ୍ଓର କେନ୍ଦ୍ରୀୟ ଟ୍ରଷ୍ଟି ବୋର୍ଡ (ସିବିଟି) ବୈଠକରେ ଏହି ପ୍ରସ୍ତାବକୁ ଅନୁମୋଦନ ମିଳିଛି। ଏହି ପଦକ୍ଷେପ ଦ୍ୱାରା ଜରୁରୀ ଆର୍ଥିକ ଆବଶ୍ୟକତା ସମୟରେ କର୍ମଚାରୀମାନେ ନିଜ ସଞ୍ଚିତ ପାଣ୍ଠିରୁ ଅଧିକ ଅର୍ଥ ଉଠାଇବାର ସୁବିଧା ପାଇପାରିବେ। ତେବେ ଏହି ଆଂଶିକ ଉଠାଣ ସୁବିଧା ବିନା ସର୍ତ୍ତରେ ସମସ୍ତଙ୍କ ପାଇଁ ଲାଗୁ ହେବ ନାହିଁ; ଏଥିପାଇଁ ପୂର୍ବ ନିର୍ଦ୍ଧାରିତ ନିୟମ ଓ ଯୋଗ୍ୟତା ପୂରଣ କରିବା ବାଧ୍ୟତାମୂଳକ ରହିବ। ଚାକିରି ହରାଇବା ପରେ ପିଏଫ୍ ଟଙ୍କା ଉଠାଣ ନିୟମରେ ମଧ୍ୟ ଆଶ୍ୱସ୍ତି ମିଳିଛି। ପୂର୍ବରୁ ସମ୍ପୂର୍ଣ୍ଣ PF ରାଶି ଉଠାଇବା ପାଇଁ ୧୨ ମାସ ଅପେକ୍ଷା କରିବାକୁ ପଡ଼ୁଥିବା ବେଳେ ଏବେ ଏହି ଅବଧିକୁ ୨ ମାସକୁ ହ୍ରାସ କରାଯାଇଛି। ଅର୍ଥାତ୍ ଚାକିରି ହରାଇବା ପରେ ନିର୍ଦ୍ଧାରିତ ସର୍ତ୍ତ ପୂରଣ କଲେ ଦୁଇ ମାସ ପରେ କର୍ମଚାରୀ ନିଜର ସମ୍ପୂର୍ଣ୍ଣ PF ରାଶି ଉଠାଇପାରିବେ। ତେବେ ପେନସନ୍ ପାଣ୍ଠି ବା EPS ଉଠାଣ ପାଇଁ ୩୬ ମାସର ଅପେକ୍ଷା ସମୟ ରହିବ। ଏହି କ୍ଷେତ୍ରରେ EPF ଓ EPSର ନିୟମକୁ ପୃଥକ୍ ଭାବେ ବୁଝିବା ଜରୁରୀ।