କୋଟାରେ ଭୟଙ୍କର ସଡ଼କ ଦୁର୍ଘଟଣା: ଟ୍ରକ୍‌ ସହ ଭ୍ୟାନ୍‌ ଧକ୍କା, ୯ ମୃତ

ନୂଆଦିଲ୍ଲୀ:  ସିକର ଜିଲ୍ଲାର ପ୍ରସିଦ୍ଧ ଖାଟୁ ଶ୍ୟାମ ମନ୍ଦିର ଦର୍ଶନ ସାରି ନିଜ ଘର ମହାରାଷ୍ଟ୍ରକୁ ଫେରୁଥିବା ଶ୍ରଦ୍ଧାଳୁଙ୍କ ଭ୍ୟାନ୍‌ ଦୁର୍ଘଟଣାଗ୍ରସ୍ତ ହୋଇ ୯ ଜଣଙ୍କ ମୃତ୍ୟୁ ଘଟିଛି। ଏହି ସଡ଼କ ଦୁର୍ଘଟଣାରେ ୮ ଜଣ ଗୁରୁତର ଆହତ ହୋଇଛନ୍ତି। ରବିବାର ବିଳମ୍ବିତ ରାତିରେ ରାଜସ୍ଥାନର କୋଟା-ଉଦୟପୁର ଜାତୀୟ ରାଜପଥର ଶମ୍ଭୁପୁରା ଗ୍ରାମ ନିକଟରେ ଏହି ଦୁର୍ଘଟଣା ଘଟିଛି। ମୃତକଙ୍କ ମଧ୍ୟରେ ଛୋଟ ପିଲା ମଧ୍ୟ ରହିଛନ୍ତି। ସୂଚନା ଅନୁସାରେ, ମହାରାଷ୍ଟ୍ରର ଏକ ପରିବାରର ୧୬ ଜଣ ସଦସ୍ୟ ରାଜସ୍ଥାନ ବୁଲିବାକୁ ଆସି ଖାଟୁ ଶ୍ୟାମଙ୍କ ଦର୍ଶନ ପରେ ଏକ କ୍ରୁଜର ଭ୍ୟାନ୍‌ରେ ଘରକୁ ଫେରୁଥିଲେ। ଅନ୍ୟପକ୍ଷରେ, ମଧ୍ୟପ୍ରଦେଶର ଡ୍ରାଇଭର ମହମ୍ମଦ ହାରୁନ୍‌ ଏକ ଟ୍ରକ୍‌ରେ ଯାନ୍ତ୍ରିକ ତ୍ରୁଟି ଦେଖାଦେବାରୁ ତାହାକୁ ରାସ୍ତାକଡ଼ରେ ଅଟକାଇ ଯାଞ୍ଚ କରୁଥିଲେ। ଏହି ସମୟରେ ଦ୍ରୁତଗତିରେ ଆସୁଥିବା କ୍ରୁଜର ଭ୍ୟାନ୍‌ଟି ଭାରସାମ୍ୟ ହରାଇ ଟ୍ରକ୍‌ ପଛରେ ପ୍ରବଳ ଧକ୍କା ଦେଇଥିଲା। ଧକ୍କା ଏତେ ଜୋରଦାର ଥିଲା ଯେ ଘଟଣାସ୍ଥଳରେ ଓ ପରେ ଚିକିତ୍ସାଧୀନ ଅବସ୍ଥାରେ ମୋଟ ୯ ଜଣଙ୍କ ପ୍ରାଣହାନି ଘଟିଛି।

Horrific road accident in Kota: Van collides with truck