ଭୁବନେଶ୍ୱର: ରାଜଧାନୀ ଭୁବନେଶ୍ୱରରେ ଏକ ବହୁତଳ ବିଶିଷ୍ଟ ଅତ୍ୟାଧୁନିକ ରାଜସ୍ୱ ଭବନ ନିର୍ମାଣ କରାଯିବ। ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଆଜି ଏହି ନିର୍ମାଣ ପ୍ରସ୍ତାବକୁ ଅନୁମୋଦନ ପ୍ରଦାନ କରିଛନ୍ତି। ଏଥିପାଇଁ ମୋଟ ୩୪୭.୮୬ କୋଟି ଟଙ୍କା ବ୍ୟୟବରାଦ କରାଯାଇଛି। ମୁଖ୍ୟମନ୍ତ୍ରୀଙ୍କ ନିଷ୍ପତ୍ତି ଅନୁଯାୟୀ, ଏହି ନୂତନ ରାଜସ୍ୱ ଭବନଟି ୯ ମହଲା ବିଶିଷ୍ଟ ହେବ। ସମସ୍ତ ଅତ୍ୟାଧୁନିକ ସୁବିଧା ଥିବା ଏହି କୋଠାରେ ୯ ମହଲା ବ୍ୟତୀତ ୨ଟି ଭୂତଳ ମହଲା ଏବଂ ଗୋଟିଏ ଚଟାଣ ମହଲା ରହିବ। ଗୋଟିଏ ଛାତ ତଳେ ରାଜସ୍ୱ ବିଭାଗର ସମସ୍ତ ପ୍ରଶାସନିକ କାର୍ଯ୍ୟାଳୟ ରହିବା ଦ୍ୱାରା ବିଭାଗୀୟ କାର୍ଯ୍ୟର ସୁପରିଚାଳନା ହୋଇପାରିବ। ଏହା ସହିତ ସାଧାରଣ ଲୋକଙ୍କ ପାଇଁ ରାଜସ୍ୱ ସେବା ଓ ଆଦାୟ ପ୍ରକ୍ରିୟା ଅଧିକ ସହଜ ଓ ସୁବ୍ୟବସ୍ଥିତ ହୋଇପାରିବ ବୋଲି ମୁଖ୍ୟମନ୍ତ୍ରୀ ଶ୍ରୀ ମାଝୀ ଆଶାବ୍ୟକ୍ତ କରିଛନ୍ତି।