ଜନ୍ମିତ ଶିଶୁର ହେବ ଆଧାର କାର୍ଡ

ଦେଶର ସମସ୍ତ ନାଗରିକଙ୍କ ପାଇଁ ଆଧାର କାର୍ଡ କରିବା ଭାରତ ସରକାର ବାଧ୍ୟତାମୂଳକ କରିଛନ୍ତି । ସେହିଭଳି ବର୍ତ୍ତମାନ ଛୋଟ ଶିଶୁମାନଙ୍କ ପାଇଁ ଆଧାର କାର୍ଡ ତିଆରି କରିବା ବାଧ୍ୟତାମୂଳକ କରାଯାଇଛି । ବର୍ତ୍ତମାନ ୫ ବର୍ଷ ଏବଂ ତାଠାରୁ କମ୍ ପିଲାମାନଙ୍କ ପାଇଁ ଆଧାର ମଧ୍ୟ ପ୍ରସ୍ତୁତ କରାଯିବ । ବାଲ ଆଧାର କାର୍ଡର ରଙ୍ଗ ନୀଳ ହେବ, ଯେଉଁଥିପାଇଁ ଏହାକୁ ବ୍ଲୁ ଚାଇଲ୍ଡ ଆଧାର କାର୍ଡ ମଧ୍ୟ କୁହାଯାଇପାରେ । ବର୍ତ୍ତମାନଠାରୁ ଏହି ଶିଶୁ ଆଧାର କାର୍ଡ ଏକ ଜରୁରୀ ଦଲିଲ ଭାବରେ ମଧ୍ୟ ଜଣାଶୁଣା ହେବ । ଏହା ବର୍ତ୍ତମାନ ଶିଶୁର ଜନ୍ମ ପ୍ରମାଣପତ୍ର ପାଇବା ଠାରୁ ଆରମ୍ଭ କରି ବିଦ୍ୟାଳୟରେ ଆଡମିଶନ ସ୍ଥାନ ପର୍ଯ୍ୟନ୍ତ ବ୍ୟବହୃତ ହେବ । ୟୁନିକ୍ ଆଇଡେଣ୍ଟିଫିକେସନ୍ ଅଥରିଟି ଅଫ୍ ଇଣ୍ଡିଆ ୫ ବର୍ଷରୁ କମ୍ ପିଲାମାନଙ୍କ ପାଇଁ ଆଧାର କାର୍ଡ କରିବାକୁ ଘୋଷଣା କରିଛି । ଏହି ନୀଳ କାର୍ଡଗୁଡ଼ିକ କେବଳ ୫ ବର୍ଷ ବୟସ ପର୍ଯ୍ୟନ୍ତ ବୈଧ ରହିବ । ଏହା ପରେ ସେମାନଙ୍କୁ ନୂତନ କାର୍ଡ ତିଆରି କରିବାକୁ ପଡିବ ।

ଯେଉଁଥିରେ ସେମାନଙ୍କର ବାୟୋମେଟ୍ରିକ୍ ବିବରଣୀ ମଧ୍ୟ ଯୋଡାଯିବ । ଏହା ପୂର୍ବରୁ ପିଲାମାନଙ୍କର ଆଧାର କେବଳ ପିତାମାତାଙ୍କ ଆଧାର ସହିତ ସଂଯୁକ୍ତ ହେବ । ଯଦି ଆପଣ ମଧ୍ୟ ଶିଶୁର ଆଧାର କାର୍ଡ ତିଆରି କରିବାକୁ ଚାହୁଁଛନ୍ତି, ତେବେ ଆପଣଙ୍କୁ ୟୁନିକ୍ ଆଇଡେଣ୍ଟିଫିକେସନ୍ ଅଥରିଟି ଅଫ୍ ଇଣ୍ଡିଆର ୱେବସାଇଟ୍ ମାଧ୍ୟମରେ ଆବେଦନ କରିବାକୁ ପଡିବ । ତେବେ ଆବେଦନ ପାଇଁ ଆପଣଙ୍କୁ, ଶିଶୁର ଜନ୍ମ ପ୍ରମାଣପତ୍ର, ଶିଶୁର ପିତାମାତାଙ୍କର ଆଧାର କାର୍ଡ କପି, ପିତାମାତା-ଶିଶୁ ସମ୍ପର୍କ ସମ୍ବନ୍ଧିତ ସମସ୍ତ ପ୍ରମାଣପତ୍ର, ଆବାସିକ ଠିକଣା ପ୍ରମାଣ, ମୋବାଇଲ୍ ନମ୍ବର ତା ସହ ଶିଶୁର ପାସପୋର୍ଟ ସାଇଜ୍ ଫଟୋଗ୍ରାଫ୍ ଦେବାକୁ ପଡିବ । ତା ଛଡା ଆପଣମାନେ ଚାହିଁଲେ ଅଫଲାଇନରେ ମଧ୍ୟ ଆବେଦନ କରିପାରିବେ ।

ଏଥିପାଇଁ ଆପଣଙ୍କୁ ପ୍ରଥମେ ଆଧାର କେନ୍ଦ୍ରକୁ ଯିବାକୁ ପଡିବ । ସମସ୍ତ ଆବଶ୍ୟକୀୟ ଡକ୍ୟୁମେଣ୍ଟ୍ ନେବା ସହ ଯେଉଁ ଶିଶୁର ଆଧାର କାର୍ଡ ତିଆରି ହେବ, ତାକୁ ମଧ୍ୟ ସାଙ୍ଗରେ ନେବାକୁ ପଡିବ । ଆବେଦନ ସରିବା ପରେ ଆପଣଙ୍କ ପିଲାଙ୍କ ଆଧାର କାର୍ଡ ୨ ମାସ ମଧ୍ୟରେ ପ୍ରସ୍ତୁତ ହୋଇଯିବ । ତେବେ ଆଜି ଠାରୁ ଆମ ରାଜ୍ୟରେ ଶିଶୁ ଜନ୍ମ ପରେ ଆଧାର ସଂଯୁକ୍ତ ଜନ୍ମ ପ୍ରମାଣପତ୍ର ଉପଲବ୍ଧ କରାଇବା ପାଇଁ ‘ବାଲ୍ ଆଧାର’ ଅଭିଯାନର ଶୁଭାରମ୍ଭ କରାଯାଇଛି ।