ଓଡ଼ିଶାର ସାଧାରଣ ବଣ୍ଟନ ଓ ଧାନ ସଂଗ୍ରହ ବ୍ୟବସ୍ଥା ଅନୁଧ୍ୟାନ କଲା ନେପାଳ ପ୍ରତିନିଧି ଦଳ

135

ଭୁବନେଶ୍ୱର: ରାଜ୍ୟର ସାଧାରଣ ବଣ୍ଟନ ବ୍ୟବସ୍ଥା (PDS) ଏବଂ ସରକାରୀ ସ୍ତରରେ ଚାଷୀଙ୍କଠାରୁ ଧାନ ସଂଗ୍ରହ ପ୍ରକ୍ରିୟା ସମ୍ପର୍କରେ ପ୍ରତ୍ୟକ୍ଷ ଅନୁଭୂତି ହାସଲ କରିବା ପାଇଁ ନେପାଳର ଏକ ୧୫ ଜଣିଆ ପ୍ରତିନିଧି ଦଳ ଦୁଇ ଦିନିଆ ଓଡ଼ିଶା ଗସ୍ତରେ ଆସିଥିଲେ। ବିଶ୍ୱ ଖାଦ୍ୟ କାର୍ଯ୍ୟକ୍ରମ ଅଧୀନରେ ନେପାଳର ଖାଦ୍ୟ ପ୍ରଯୁକ୍ତି ବିଦ୍ୟା ଓ ଗୁଣବତ୍ତା ନିୟନ୍ତ୍ରଣ ବିଭାଗର ମହାନିର୍ଦ୍ଦେଶକ ସଞ୍ଜୀବ କର୍ଣ୍ଣ ଏହି ପ୍ରତିନିଧି ମଣ୍ଡଳୀର ନେତୃତ୍ୱ ନେଇଥିଲେ। ଗତକାଲି ପ୍ରତିନିଧି ଦଳ ପ୍ରଥମେ ଖୋରଧା ଜିଲ୍ଲାର ଟାଙ୍ଗୀ ବ୍ଲକସ୍ଥିତ ଏକ ଚାଉଳ ଗୋଦାମ ପରିଦର୍ଶନ କରିବା ସହ ଏହାର ପରିଚାଳନା ବ୍ୟବସ୍ଥା ବିଷୟରେ ପଚାରି ବୁଝିଥିଲେ। ଏହାପରେ ମଙ୍ଗଳାଯୋଡ଼ିର ଏକ ବାତ୍ୟା ଆଶ୍ରୟସ୍ଥଳୀକୁ ଯାଇ ସେଠାରେ ବିପର୍ଯ୍ୟୟ ମୁକାବିଲା ପ୍ରସ୍ତୁତି ଦେଖି ସନ୍ତୋଷ ବ୍ୟକ୍ତ କରିଥିଲେ। ସେହିପରି ଦଳଟି ଧଉଳି ପଞ୍ଚାୟତର ସାଧାରଣ ବଣ୍ଟନ କେନ୍ଦ୍ର ଏବଂ ଶିଶୁପାଳଗଡ଼ ସ୍ଥିତ ପ୍ରାଥମିକ କୃଷି ସମବାୟ ସମିତି  ବୁଲି ଦେଖିଥିଲେ। ସେଠାରେ ଉପସ୍ଥିତ ରାଜ୍ୟ ଅଧିକାରୀଙ୍କ ସହ ଧାନ ସଂଗ୍ରହ ବ୍ୟବସ୍ଥା, ସଫ୍ଟୱେରର ଉପଯୋଗ ଏବଂ ୪୮ ଘଣ୍ଟା ମଧ୍ୟରେ ଚାଷୀଙ୍କୁ ପ୍ରାପ୍ୟ ପ୍ରଦାନ ପ୍ରକ୍ରିୟା ନେଇ ଆଲୋଚନା କରିଥିଲେ। ପରବର୍ତ୍ତୀ ସମୟରେ ପ୍ରତିନିଧି ମଣ୍ଡଳୀ ମଞ୍ଚେଶ୍ୱରସ୍ଥିତ ଚାଉଳ ଏଟିଏମ୍  ପରିଦର୍ଶନ କରି ଏହାର କାର୍ଯ୍ୟକାରିତା ଜାଣି ଖୁସି ପ୍ରକାଶ କରିଥିଲେ। ଗସ୍ତ କାଳରେ ସେମାନେ ରାଜ୍ୟର ବରିଷ୍ଠ ଅଧିକାରୀଙ୍କ ସହ ସୌଜନ୍ୟମୂଳକ ସାକ୍ଷାତ କରିବା ସହ କ୍ଷେତ୍ରସ୍ତରୀୟ ଅଧିକାରୀଙ୍କ ସହ ବିଭିନ୍ନ ବିଷୟରେ ଆଲୋଚନା କରିଥିଲେ।

Comments are closed, but trackbacks and pingbacks are open.