NEET-UG 2026 ପେପର୍ ଲିକ୍ ମାମଲା: ୧୪ ଅଭିଯୁକ୍ତଙ୍କ ବିରୋଧରେ ଚାର୍ଜ ଫ୍ରେମ୍ ନିର୍ଦ୍ଦେଶ

13

ନୂଆଦିଲ୍ଲୀ: NEET-UG 2026 ପେପର୍ ଲିକ୍ ମାମଲାରେ ଆଜି ରାଉଜ୍ ଆଭେନ୍ୟୁ କୋର୍ଟର ସ୍ୱତନ୍ତ୍ର ବିଚାରପତି ଅଜୟ ଗୁପ୍ତା ଏକ ଗୁରୁତ୍ୱପୂର୍ଣ୍ଣ ନିର୍ଦ୍ଦେଶ ଦେଇଛନ୍ତି। ଏହି ମାମଲାରେ ଦିଲ୍ଲୀର ଏକ ସ୍ୱତନ୍ତ୍ର ଫାଷ୍ଟ ଟ୍ରାକ୍ କୋର୍ଟ ୧୪ ଜଣ ଅଭିଯୁକ୍ତଙ୍କ ବିରୋଧରେ ଅଭିଯୋଗ (ଚାର୍ଜ) ଫ୍ରେମ୍ କରିବାକୁ ନିର୍ଦ୍ଦେଶ ଦେଇଛନ୍ତି। ଆସନ୍ତା ନଭେମ୍ବର ୨୧ ତାରିଖରେ ସମସ୍ତ ୧୪ ଜଣ ଅଭିଯୁକ୍ତଙ୍କୁ କୋର୍ଟରେ ହାଜର କରାଇ ଆନୁଷ୍ଠାନିକ ଭାବେ ଅଭିଯୋଗ ଗଠନ କରିବାକୁ କୁହାଯାଇଛି | ଏହି ମାମଲାର ବିଚାର ପ୍ରକ୍ରିୟା ଆସନ୍ତା ନଭେମ୍ବର ୨୫ ତାରିଖରୁ ଦୈନିକ ଭିତ୍ତିରେ ଆରମ୍ଭ ହେବ ବୋଲି ବିଚାରପତି ସ୍ପଷ୍ଟ କରିଛନ୍ତି। ଅଭିଯୁକ୍ତମାନଙ୍କ ବିରୋଧରେ ଅପରାଧିକ ଷଡ଼ଯନ୍ତ୍ର, ଠକେଇ, ବିଶ୍ୱାସଘାତକତା ଏବଂ ପ୍ରମାଣ ନଷ୍ଟ କରିବା ଭଳି ଦଫା ଲଗାଯାଇଛି। ଏହା ସହିତ ଦୁର୍ନୀତି ନିବାରଣ ଆଇନ, ପବ୍ଲିକ୍ ଏଗ୍‌ଜାମିନେସନ୍ ଆଇନ ୨୦୨୪ ଏବଂ କପିରାଇଟ୍ ଆଇନର ଧାରା ୬୩ ଅନୁଯାୟୀ ମଧ୍ୟ ମାମଲା ଚାଲିବ। ସୂଚନା ଥାଉ ଯେ, କେନ୍ଦ୍ରୀୟ ତଦନ୍ତ ବ୍ୟୁରୋ ପ୍ରଥମେ ୧୩ ଜଣ ଅଭିଯୁକ୍ତଙ୍କ ବିରୋଧରେ ପ୍ରାୟ ୨୦,୦୦୦ ପୃଷ୍ଠାର ଚାର୍ଜସିଟ୍ ଦାଖଲ କରିଥିଲା। ପରବର୍ତ୍ତୀ ସମୟରେ ସେପ୍ଟେମ୍ବର ୨ରେ ଗିରଫ ହୋଇଥିବା ମହାରାଷ୍ଟ୍ର ନାନ୍ଦେଡର ଶେଷରାଓ ବଜରଙ୍ଗ ସୂର୍ଯ୍ୟବଂଶୀଙ୍କ ବିରୋଧରେ ଅତିରିକ୍ତ ଚାର୍ଜସିଟ୍ ଦାଖଲ କରାଯାଇଥିଲା। ସିବିଆଇର ତଦନ୍ତ ଅନୁଯାୟୀ, ନ୍ୟାସନାଲ ଟେଷ୍ଟିଂ ଏଜେନ୍ସି (NTA)ର ୩ ଜଣ ବିଷୟ ବିଶେଷଜ୍ଞ ଦିଲ୍ଲୀ କାର୍ଯ୍ୟାଳୟରୁ ଗୋପନୀୟ ପ୍ରଶ୍ନପତ୍ର ଚୋରି କରି ମଧ୍ୟସ୍ଥି ଓ କୋଚିଂ ଅପରେଟରମାନଙ୍କୁ ଦେଇଥିଲେ।

Comments are closed, but trackbacks and pingbacks are open.