ଘର ଭିତରେ ପଶିଗଲା ଦ୍ରୁତଗାମୀ କାର୍, ଅଳ୍ପକେ ବର୍ତ୍ତିଲେ ପରିବାରର ୪ ସଦସ୍ୟ

19

ଗଜପତି: ଭୋର୍‌ ସମୟରେ ଘରେ ଗଭୀର ନିଦରେ ଶୋଇଥିବା ବେଳେ ହଠାତ୍‌ ମାଡ଼ିଆସିଥିଲା ଏକ ଦ୍ରୁତଗାମୀ କାର୍‌। ରାସ୍ତାକଡ଼ରେ ଥିବା ଘରର କାନ୍ଥ ଭାଙ୍ଗି ସିଧାସଳଖ ଭିତରକୁ ଗାଡ଼ିଟି ପଶିଯାଇଥିଲା। ଏହି ଭୟାବହ ଦୁର୍ଘଟଣାରେ ଘରର ଆସବାବପତ୍ର ସମେତ ଦୁଇଟି ସିଲେଇ ମେସିନ୍‌ ଓ ଫ୍ରିଜ୍‌ ଭାଙ୍ଗି ସମ୍ପୂର୍ଣ୍ଣ ନଷ୍ଟ ହୋଇଯାଇଛି। ତେବେ ଭାଗ୍ୟବଶତଃ ଘରେ ଶୋଇଥିବା ପରିବାରର ୪ ଜଣ ସଦସ୍ୟ ଅଳ୍ପକେ ମୃତ୍ୟୁମୁଖରୁ ବର୍ତ୍ତିଯାଇଛନ୍ତି। ଗଜପତି ଜିଲ୍ଲା ମୋହନା ଥାନା ଅନ୍ତର୍ଗତ ପିଣ୍ଡିକି ଗାଁରେ ଏଭଳି ଏକ ଅଘଟଣ ଘଟିଛି। ମିଳିଥିବା ସୂଚନା ଅନୁଯାୟୀ, ଭୋର୍‌ ସମୟରେ ଏକ କାର୍‌ ମୋହନାରୁ ଚାନ୍ଦିପୁଟ ଅଭିମୁଖେ ଯାଉଥିବା ବେଳେ ପିଣ୍ଡିକି ଗାଁ ନିକଟରେ ଚାଳକ ଗାଡ଼ି ଉପରୁ ଭାରସାମ୍ୟ ହରାଇଥିଲେ। ଫଳରେ କାର୍‌ଟି ନିୟନ୍ତ୍ରଣଚ୍ୟୁତ ହୋଇ ରାସ୍ତାକଡ଼ରେ ଥିବା ହରପ୍ରସାଦ ବିଷୋୟୀଙ୍କ ଘର ଭିତରକୁ ପଶିଯାଇଥିଲା। ହଠାତ୍‌ ଏଭଳି ଶବ୍ଦ ହେବାରୁ ଚାରିଆଡ଼େ ଆତଙ୍କ ଖେଳିଯାଇଥିଲା ଏବଂ ଘରର ଆସବାବପତ୍ର ଛିନ୍‌ଛତ୍ର ହୋଇଯାଇଥିଲା। ତେବେ ଦୁର୍ଘଟଣା ସମୟରେ ହରପ୍ରସାଦ, ତାଙ୍କ ପତ୍ନୀ, ପୁଅ ଓ ଝିଅ ଘରର ପଛପଟେ ଥିବା ଅନ୍ୟ ଏକ କୋଠରିରେ ଶୋଇଥିବାରୁ ଏକ ବଡ଼ଧରଣର ପ୍ରାଣହାନି ଟଳିଯାଇଛି।

Comments are closed, but trackbacks and pingbacks are open.