ନୂଆଦିଲ୍ଲୀ: ମହାଦେବ ଅନଲାଇନ୍ ବୁକ୍ ବେଟିଂ ଆପ୍ର ନେଟୱର୍କ ଉପରେ ଦେଶବ୍ୟାପୀ ଚଢ଼ାଉ କରିଛି CBI। ଗତ କିଛି ଦିନ ମଧ୍ୟରେ ୬ଟି ରାଜ୍ୟର ୩୩ଟି ସ୍ଥାନରେ ରେଡ୍ କରିଛି ତଦନ୍ତକାରୀ ଟିମ୍। ଏହି ଚଢ଼ାଉରେ ଅନେକ ବେଆଇନ୍ ବେଟିଂ ପ୍ୟାନେଲ୍ର ପର୍ଦ୍ଦାଫାଶ ହୋଇଛି। ଏହି ସମୟରେ କେତେକ ସ୍ଥାନରେ ଲାଇଭ୍ ବେଟିଂ ଓ ଅନଲାଇନ୍ ଜୁଆ କାରବାର ଚାଲୁଥିବା ଧରାପଡ଼ିଥିଲା। ତୁରନ୍ତ ସେହି ପ୍ୟାନେଲ୍ଗୁଡ଼ିକୁ ବନ୍ଦ କରାଯାଇଥିଲା। ଚଢ଼ାଉ ବେଳେ ବିଭିନ୍ନ ସ୍ଥାନରୁ ମୋବାଇଲ୍ ଫୋନ୍, ଡିଜିଟାଲ୍ ଡିଭାଇସ୍ ଏବଂ ଅନେକ ଗୁରୁତ୍ୱପୂର୍ଣ୍ଣ ଦସ୍ତାବିଜ୍ ଜବତ ହୋଇଛି। ତଦନ୍ତ ଅନୁସାରେ, ମହାଦେବ ଆପ୍ ର ମୁଖ୍ୟ ନେଟୱର୍କ ବିଦେଶରୁ ପରିଚାଳିତ ହେଉଥିବା ବେଳେ ଭାରତରେ ରହିଥିଲା ପ୍ୟାନେଲ୍ ଅପରେଟରଙ୍କ ବଡ଼ ଚେନ୍। ଏହି ଅପରେଟରମାନେ ଗ୍ରାହକଙ୍କ ପାଇଁ ବେଟିଂ ଆଇଡି ତିଆରି କରୁଥିଲେ। ଅନ୍ୟ ବ୍ୟକ୍ତିଙ୍କ ନାଁରେ ଖୋଲାଯାଇଥିବା କିମ୍ବା ଭଡ଼ାରେ ନିଆଯାଇଥିବା ବ୍ୟାଙ୍କ ଆକାଉଣ୍ଟରେ ଟଙ୍କା ଜମା କରାଯାଉଥିଲା। ପରେ ହାୱାଲା ଚ୍ୟାନେଲ୍ ଜରିଆରେ ଏହି ଟଙ୍କା ବିଦେଶକୁ ପଠାଯାଉଥିବା ସନ୍ଦେହ କରାଯାଇଛି। ଏହି ମାମଲାରେ CBI ଦୁଇଟି FIR ରୁଜୁ କରି ତଦନ୍ତ ଜାରି ରଖିଛି। ଅନ୍ୟପଟେ ନଭେମ୍ବର ୧୩ରେ ପ୍ରବର୍ତ୍ତନ ନିର୍ଦ୍ଦେଶାଳୟ (ED) ମଧ୍ୟ ସୌରଭ ଚନ୍ଦ୍ରାକରଙ୍କୁ ଗିରଫ କରି ମନି ଲଣ୍ଡରିଂ ମାମଲାରେ ପଚରାଉଚରା ପାଇଁ ହେପାଜତକୁ ନେଇଛି। ଏବେ CBIର ନଜର ଏହି ନେଟୱର୍କର ଅନ୍ୟ ଅଭିଯୁକ୍ତ, ବିଦେଶରେ ରହିଥିବା ସହଯୋଗୀ ଏବଂ କାରବାରକୁ ସହଯୋଗ କରିଥିବା ସନ୍ଦିଗ୍ଧ ସରକାରୀ କର୍ମଚାରୀଙ୍କ ଉପରେ।
Comments are closed, but trackbacks and pingbacks are open.