ଭୁବନେଶ୍ୱର: କ୍ୟାପିଟାଲ ହସ୍ପିଟାଲର ଜଣେ ଡାକ୍ତରଙ୍କ ଜମିକୁ ଜାଲିଆତି କରି ଏକାଧିକ ଥର ବିକ୍ରି କରିବା ମାମଲାରେ ବଡ଼ଗଡ଼ ଥାନା ପୋଲିସ ଭୁବନେଶ୍ୱର ଜିଲ୍ଲା ସବ୍-ରେଜିଷ୍ଟ୍ରାର ଅଫିସରେ କାର୍ଯ୍ୟରତ ଡାଟା ଏଣ୍ଟ୍ରି ଅପରେଟରଙ୍କ ସହ ଆଉ ୨ ଜଣଙ୍କୁ ପୋଲିସ ଆଜି ଗିରଫ କରିଛି । ଗିରଫ ଅଭିଯୁକ୍ତମାନେ ହେଲେ ମଞ୍ଚେଶ୍ୱର ଥାନା ଅନ୍ତର୍ଗତ ଜିଜିପି କଲୋନିରେ ରହୁଥିବା ଅମିତ କୁମାର ସାହୁ (୩୮), ଲକ୍ଷ୍ମୀସାଗର ଥାନା ଅନ୍ତର୍ଗତ ଚିନ୍ତାମଣିଶ୍ୱର ଅଞ୍ଚଳର ଜାମିନୀକାନ୍ତ ରାଉତ (୪୦) ଓ ଡାଟା ଏଣ୍ଟ୍ରି ଅପରେଟର ତଥା ଗଞ୍ଜାମ ଜିଲ୍ଲା ଖଲ୍ଲିକୋଟ ଅଞ୍ଚଳର ପ୍ରୟାଗ ଗୌଡ଼ (୩୯) । ଅଭିଯୁକ୍ତମାନଙ୍କ ଠାରୁ ଜାଲିଆତି ସମ୍ବନ୍ଧୀୟ ବିଭିନ୍ନ କାଗଜପତ୍ର ଜବତ କରାଯାଇ କୋର୍ଟଚାଲାଣ କରାଯାଇଛି । ଜାମିନ ନାମଞ୍ଜୁର ପରେ ସମସ୍ତଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି । ଅଭିଯୋଗକାରୀ ଡାକ୍ତର ସୀମାନ୍ତ ଦାସଙ୍କ ଏତଲାକ୍ରମେ ପୋଲିସ କାର୍ଯ୍ୟାନୁଷ୍ଠାନ ନେଇଛି । ବଡ଼ଗଡ଼ ଥାନା ପକ୍ଷରୁ ଏନେଇ ମାମଲା (ନଂ.୭୫୩/୨୦୨୬) ରୁଜୁ କରାଯାଇଛି । ବଡ଼ଗଡ଼ ପୋଲିସ ଠାରୁ ମିଳିଥିବା ସୂଚନା ଅନୁଯାୟୀ, ଭୁବନେଶ୍ୱରର ଲକ୍ଷ୍ମୀସାଗର ମୌଜା ଅନ୍ତର୍ଗତ ପ୍ଲଟ୍ ନଂ-୧୮୨୫/୩୪୨୯ (୧୭୪୦ ବର୍ଗଫୁଟ୍) ଜମିଟି ଜାମିନୀକାନ୍ତଙ୍କ ନାମରେ ରେକର୍ଡଭୁକ୍ତ ଥିଲା । ଜମି ବନ୍ଧା ପକାଇ ସେ ଆନ୍ଧ୍ର ବ୍ୟାଙ୍କରୁ ୨୨ ଲକ୍ଷ ଟଙ୍କା ଋଣ ନେଇଥିଲେ । ତେବେ ସେ ନିୟମିତ ଭାବେ ଋଣର ମାସିକ କିସ୍ତି (EMI) ପରିଶୋଧ କରିବାରେ ବିଫଳ ହେବାରୁ, ଆନ୍ଧ୍ର ବ୍ୟାଙ୍କ ସହ ମିଶ୍ରଣ ହୋଇଥିବା ୟୁନିଅନ୍ ବ୍ୟାଙ୍କ ପକ୍ଷରୁ ଉକ୍ତ ଜମିକୁ ନିଲାମ କରାଯାଇଥିଲା । ଏହି ନିଲାମ ପ୍ରକ୍ରିୟାରେ ସର୍ବାଧିକ ମୂଲ୍ୟ ଦେଇଥିବାରୁ ସୀମାନ୍ତ ଦାସଙ୍କ ନାମରେ ଜମିଟି ହସ୍ତାନ୍ତର କରାଯାଇଥିଲା । ଏହା ମଧ୍ୟରେ ପୂର୍ବତନ ଜମି ମାଲିକ ଜାମିନୀକାନ୍ତ ଷଡ଼ଯନ୍ତ୍ର ରଚିଥିଲେ । ସେ ଅମିତ ଓ ଡାଟା ଏଣ୍ଟ୍ରି ଅପରେଟର ପ୍ରୟାଗ ଏବଂ ଭୁବନେଶ୍ୱର ସବ୍-ରେଜିଷ୍ଟ୍ରାର କାର୍ଯ୍ୟାଳୟର ଅନ୍ୟ କେତେକ କର୍ମଚାରୀଙ୍କ ସହ ମିଶି ଠକେଇ ଯୋଜନା କରିଥିଲେ । ଏହି ଷଡ଼ଯନ୍ତ୍ର ଅନୁଯାୟୀ, ଜାମିନୀକାନ୍ତ ନିଜକୁ ସୀମାନ୍ତ ଦାସ ବୋଲି ପରିଚୟ ଦେଇଥିଲେ । ଏଥିସହ ଆଧାର କାର୍ଡ ଭଳି ଜାଲ୍ ଦସ୍ତାବିଜ୍ ପ୍ରସ୍ତୁତ କରି ଉକ୍ତ ଜମିକୁ ଅମିତଙ୍କ ନାମରେ ବିକ୍ରି କରିଥିଲେ । ପରବର୍ତ୍ତୀ ସମୟରେ ଅମିତ ଉକ୍ତ ଜମିକୁ ସସ୍ମିତା ଜେନାଙ୍କୁ ବିକ୍ରି କରିଥିବା ଅଭିଯୋଗ ହୋଇଛି । ତେବେ ଏଭଳି ଜାଲ ଘଟଣା ଜଣାପଡିବା ପରେ ଡାକ୍ତର ସୀମାନ୍ତ ଥାନାର ଦ୍ୱାରସ୍ଥ ହୋଇଥିଲେ ।
Comments are closed, but trackbacks and pingbacks are open.