ନୂଆଦିଲ୍ଲୀ: ପହଲଗାମ ଆତଙ୍କବାଦୀ ଆକ୍ରମଣ ପରେ ଭାରତ ଏବଂ ପାକିସ୍ତାନ ମଧ୍ୟରେ ସମ୍ପର୍କ ପୁଣି ଥରେ ଶେଷ ସୀମାରେ ପହଞ୍ଚିଛି । ଭାରତ ‘ଅପରେସନ ସିନ୍ଧୁ’ (Operation Sindhu) ମାଧ୍ୟମରେ ବିଶ୍ୱକୁ ଏକ ସ୍ପଷ୍ଟ ବାର୍ତ୍ତା ଦେଇସାରିଛି ଯେ, ଦେଶ ନିଜର ସୁରକ୍ଷା ପାଇଁ ଯେକୌଣସି ଚରମ ପଦକ୍ଷେପ ନେବାକୁ ପ୍ରସ୍ତୁତ । ଏହି ପରିପ୍ରେକ୍ଷୀରେ ପାକିସ୍ତାନର କ୍ରମାଗତ ଉସ୍କାନିମୂଳକ କାର୍ଯ୍ୟକଳାପକୁ ନେଇ ଭାରତୀୟ ସେନା ମୁଖ୍ୟ ଜେନେରାଲ୍ ଉପେନ୍ଦ୍ର ଦ୍ୱିବେଦୀ କଡ଼ା ଚେତାବନୀ ଦେଇଛନ୍ତି । ପାକିସ୍ତାନ ଯଦି ତୁରନ୍ତ ଆତଙ୍କବାଦୀ କାର୍ଯ୍ୟକଳାପ ବନ୍ଦ ନକରେ, ତେବେ ଇତିହାସ ପୃଷ୍ଠାରେ ତାର ଭୂଗୋଳ ବଦଳିଯିବାର ଆଶଙ୍କା ରହିଛି ବୋଲି ସେନା ମୁଖ୍ୟ କହିଛନ୍ତି । ଏକ ବିଶେଷ କାର୍ଯ୍ୟକ୍ରମରେ ପାକିସ୍ତାନର ସୀମାପାର ଆତଙ୍କବାଦ ସମ୍ପର୍କିତ ପ୍ରଶ୍ନର ଉତ୍ତର ଦେଇ ସେନା ମୁଖ୍ୟ ଏଭଳି କଡ଼ା ଆଭିମୁଖ୍ୟ ପ୍ରଦର୍ଶନ କରିଛନ୍ତି । ‘ସେନା ସଂଳାପ’ କାର୍ଯ୍ୟକ୍ରମରେ ଯୋଗଦେଇ ଜେନେରାଲ୍ ଦ୍ୱିବେଦୀ ସୈନିକମାନଙ୍କ ଭାବନା ଓ ସେମାନଙ୍କ ତ୍ୟାଗ ସମ୍ପର୍କରେ ମଧ୍ୟ ଆଲୋକପାତ କରିଥିଲେ । ସେ କହିଛନ୍ତି, “ଯେକୌଣସି ସାମରିକ ଅଧିକାରୀଙ୍କ ପାଇଁ ସବୁଠାରୁ ଆନନ୍ଦର ମୂହୁର୍ତ୍ତ ହେଉଛି ସେତେବେଳେ, ଯେତେବେଳେ ସୈନିକମାନେ ତାଙ୍କୁ ସ୍ୱୀକାର କରନ୍ତି ଏବଂ ତାଙ୍କ ଉପରେ ସମ୍ପୂର୍ଣ୍ଣ ଭରସା ରଖନ୍ତି । ଏକ ସଫଳ ଅପରେସନ ପରେ ଯେତେବେଳେ ଜଣେ ସୈନିକ ନିଜ ଅଫିସରଙ୍କୁ ଆଲିଙ୍ଗନ କରେ, ସେତେବେଳେ ସେଠାରେ କୌଣସି ପଦବୀ ବା ପଦାନୁକ୍ରମର ପ୍ରାଚୀର ନଥାଏ; ଉଭୟ ପରସ୍ପରକୁ କେବଳ ଜଣେ ସହଯୋଗୀ ଯୋଦ୍ଧା ବୋଲି ମନେକରନ୍ତି ।”
Comments are closed, but trackbacks and pingbacks are open.