ବ୍ୟାଡମିଣ୍ଟନରେ ପରିବର୍ତ୍ତନ: ୨୦୨୭ରୁ ବଦଳିବ ସ୍କୋରିଂ ନିୟମ, ୨୧ ବଦଳରେ ୧୫ ପଏଣ୍ଟରେ ହେବ ନିଷ୍ପତ୍ତି

ନୂଆଦିଲ୍ଲୀ: ବିଶ୍ୱ ବ୍ୟାଡମିଣ୍ଟନ ଇତିହାସରେ ଏକ ବଡ଼ ପରିବର୍ତ୍ତନ ହେବାକୁ ଯାଉଛି। ବ୍ୟାଡମିଣ୍ଟନ ୱାର୍ଲ୍ଡ ଫେଡେରେସନ୍ (BWF) ଶନିବାର ଖେଳର ସ୍କୋରିଂ ନିୟମରେ ବ୍ୟାପକ ପରିବର୍ତ୍ତନକୁ ମଞ୍ଜୁରୀ ଦେଇଛି। ଡେନମାର୍କର ହର୍ସନ୍ସରେ ଅନୁଷ୍ଠିତ ବାର୍ଷିକ ସାଧାରଣ ବୈଠକରେ ‘୩x୧୫’ (3×15) ସ୍କୋରିଂ ସିଷ୍ଟମକୁ ଆଧିକାରିକ ଭାବେ ଗ୍ରହଣ କରାଯାଇଛି। ଏହି ନୂଆ ନିୟମ ୨୦୨୭ ଜାନୁଆରୀ ୪ ତାରିଖରୁ ସାରା ବିଶ୍ୱରେ ଲାଗୁ ହେବ। ଏହି ନିଷ୍ପତ୍ତି ସହିତ ପ୍ରାୟ ୨୦ ବର୍ଷ ଧରି ଚାଲିଆସୁଥିବା ‘୩x୨୧’ ପଏଣ୍ଟ ଫର୍ମାଟର ଅନ୍ତ ଘଟିବ। ନୂଆ ନିୟମ ଅନୁଯାୟୀ, ବର୍ତ୍ତମାନ ମ୍ୟାଚ୍ ୨୧ ପଏଣ୍ଟ ବଦଳରେ ୧୫ ପଏଣ୍ଟ ବିଶିଷ୍ଟ ତିନୋଟି ସେଟ୍‌ରେ ଖେଳାଯିବ। BWF ଅନୁଯାୟୀ, ଏହି ଛୋଟ ଫର୍ମାଟ୍ ଦ୍ୱାରା ଶେଡ୍ୟୁଲିଂରେ ସୁଧାର ଆସିବା ସହ ଖେଳରେ ଅଧିକ ରୋମାଞ୍ଚକର ମୁହୂର୍ତ୍ତ ସୃଷ୍ଟି ହେବ। ଏହାସହ ଖେଳାଳିମାନଙ୍କ କ୍ଳାନ୍ତି କମାଇବା ଓ ସେମାନଙ୍କ ସ୍ୱାସ୍ଥ୍ୟାବସ୍ଥାରେ ସୁଧାର ଆଣିବାରେ ଏହା ସହାୟକ ହେବ। BWF ଅଧ୍ୟକ୍ଷା ଖୁନିଙ୍ଗ୍ ପଟାମା ଲିସୱାଦତ୍ରାକୁଲ୍ ଏହି ପରିବର୍ତ୍ତନକୁ ବ୍ୟାଡମିଣ୍ଟନର ଭବିଷ୍ୟତ ପାଇଁ ଏକ ଗୁରୁତ୍ୱପୂର୍ଣ୍ଣ ମୋଡ଼ ବୋଲି କହିଛନ୍ତି। ସେ କହିଛନ୍ତି, “ଆମେ ଆଗାମୀ ପିଢ଼ି ପାଇଁ ଏହି ଖେଳକୁ ଅଧିକ ଆକର୍ଷଣୀୟ କରିବାକୁ ଚାହୁଁଛୁ। ୩x୧୫ ସ୍କୋରିଂ ସିଷ୍ଟମର ମୁଖ୍ୟ ଉଦ୍ଦେଶ୍ୟ ହେଉଛି ପ୍ରତିଯୋଗିତାକୁ ଅଧିକ ରୋମାଞ୍ଚକର କରିବା, ମ୍ୟାଚ୍ ସମୟକୁ ସୀମିତ ରଖିବା ଏବଂ ଖେଳାଳିଙ୍କୁ ଶାରୀରିକ ରିକଭରି ପାଇଁ ଅଧିକ ସୁଯୋଗ ପ୍ରଦାନ କରିବା।”