ହାଇଦ୍ରାବାଦ: ଭାରତୀୟ ମହାକାଶ ଗବେଷଣା ସଂସ୍ଥା (ISRO) ଚନ୍ଦ୍ରଯାନ-3ର ସମସ୍ତ ତଥ୍ୟକୁ ସାର୍ବଜନୀନ କରିଛି । ଏହାସହିତ ଉକ୍ତ ତଥ୍ୟକୁ ଆଧାର କରି ଚନ୍ଦ୍ର ଉପରେ ଗବେଷଣା କରିବାକୁ ଏବଂ ଅକ୍ଟୋବର 21, 2025 ସୁଦ୍ଧା ପ୍ରସ୍ତାବ ଦାଖଲ କରିବାକୁ ଆମନ୍ତ୍ରଣ କରିଛି । 2023 ଜୁଲାଇ 14ରେ ଲଞ୍ଚ କରାଯାଇଥିବା ଏହି ମିଶନର ଲ୍ୟାଣ୍ଡର ଏବଂ ରୋଭର ଦ୍ୱାରା କରାଯାଇଥିବା ପରୀକ୍ଷଣରୁ ତଥ୍ୟକୁ ବ୍ୟବହାର କରିବା ଲକ୍ଷ୍ୟରେ ଇସ୍ରୋ ବୈଜ୍ଞାନିକମାନଙ୍କ ଆଗରେ ଏହି ପ୍ରସ୍ତାବ ରଖିଛି । ଇସ୍ରୋ ଭାରତର ସ୍ୱୀକୃତିପ୍ରାପ୍ତ ଶିକ୍ଷାନୁଷ୍ଠାନ, ଗବେଷଣା ପ୍ରତିଷ୍ଠାନ, ବିଶ୍ୱବିଦ୍ୟାଳୟ, କଲେଜ ଏବଂ ସରକାରୀ ସଂଗଠନର ଅଧ୍ୟାପକ ଏବଂ ଗବେଷକଙ୍କଠାରୁ ପ୍ରସ୍ତାବ ଆହ୍ବାନ କରୁଛି । ତେବେ ଏହି ପ୍ରସ୍ତାବ ଦାଖଲ କରିବାର ଶେଷ ତାରିଖ ଅକ୍ଟୋବର 21, 2025 ରହିଛି । ଯେଉଁ ଗବେଷକମାନେ ଚନ୍ଦ୍ର ଉପରେ ଗବେଷଣା କରିବାକୁ ଇଚ୍ଛୁକ ସେମାନେ ପ୍ରସ୍ତାବ ଦାଖଲ କରି ଚନ୍ଦ୍ରଯାନ-3 ଲ୍ୟାଣ୍ଡର ଓ ରୋଭର ଦ୍ୱାରା ସଂଗ୍ରହ କରାଯାଇଥିବା ତଥ୍ୟକୁ ବ୍ୟବହାର କରି ଗବେଷଣା କରିପାରିବେ ।
ଇସ୍ରୋ ଅନୁଯାୟୀ, ଚନ୍ଦ୍ରଯାନ-1 ଏବଂ ଚନ୍ଦ୍ରଯାନ-2 କକ୍ଷପଥରୁ ମିଳିଥିବା ତଥ୍ୟକୁ ଭାରତୀୟ ଗବେଷକମାନେ ଚନ୍ଦ୍ରପୃଷ୍ଠ ଏବଂ ଉପ-ପୃଷ୍ଠ ଅଧ୍ୟୟନ କରିବା, ମୌଳିକ ଏବଂ ଖଣିଜ ଗଠନ ବିଶ୍ଳେଷଣ କରିବା ଏବଂ ଚନ୍ଦ୍ର ଏକ୍ସୋସ୍ଫିୟର ତଦନ୍ତ କରିବା ପାଇଁ ବ୍ୟାପକ ଭାବରେ ବ୍ୟବହାର କରିଛନ୍ତି ।ଚନ୍ଦ୍ରଯାନ-3 ଲ୍ୟାଣ୍ଡର ଏବଂ ରୋଭର ପେଲୋଡ୍ ଦ୍ବାରା ସଂଗୃହିତ ତଥ୍ୟ ବର୍ତ୍ତମାନ ସାର୍ବଜନୀନ ଭାବରେ ଉପଲବ୍ଧ ହୋଇଛି । ଇସ୍ରୋ ଏହି ତଥ୍ୟର ଅଧିକ ବିଶ୍ଳେଷଣ ପାଇଁ ବୈଜ୍ଞାନିକ ପ୍ରସ୍ତାବଗୁଡ଼ିକୁ ଆମନ୍ତ୍ରଣ କରୁଛି, ଯାହାକୁ pradan.issdc.gov.inରେ ଭାରତୀୟ ମହାକାଶ ବିଜ୍ଞାନ ତଥ୍ୟ କେନ୍ଦ୍ର (ISSDC)ର PRADAN ପୋର୍ଟାଲ୍ ମାଧ୍ୟମରେ ଉପଲବ୍ଧ କରାଯିବ ।
Comments are closed, but trackbacks and pingbacks are open.