ନୂଆଦିଲ୍ଲୀ: ଆଜି ଜମ୍ମୁ-କାଶ୍ମୀରର ପୁଞ୍ଚ ଜିଲ୍ଲାରେ ନିୟନ୍ତ୍ରଣ ରେଖା (ଏଲଓସି) ପାର୍ଶ୍ୱରେ ଥିବା ଭାରତୀୟ ପୋଷ୍ଟ ଉପରେ ପାକିସ୍ତାନୀ ସୈନ୍ୟମାନେ ବିନା କାରଣରେ ଗୁଳି ଚଳାଇଛନ୍ତି। ଏହା ପରେ ଭାରତୀୟ ସେନା ସେମାନଙ୍କୁ ଉପଯୁକ୍ତ ଜବାବ ଦେଇଛି। ବିନା କାରଣରେ ପାକିସ୍ଥାନ ସେନାଙ୍କ ଗୁଳିମାଡ ପାଇଁ ଭାରତୀୟ ସୈନିକଙ୍କ ଗୁଳି ଚଳାଇଥିଲେ। ଫଳରେ ପାକିସ୍ତାନକୁ ବହୁତ କ୍ଷୟକ୍ଷତି ହୋଇଥିବାର ଜଣାପଡିଛି। ଆଜି ଭାରତୀୟ ସୁରକ୍ଷା ଅଧିକାରୀମାନେ ଏହି ସୂଚନା ଦେଇଛନ୍ତି। ଅଧିକାରୀମାନେ କହିଛନ୍ତି ଯେ ପାକିସ୍ତାନୀ ସୈନ୍ୟମାନେ ନିୟନ୍ତ୍ରଣ ରେଖାର ତାରକୁଣ୍ଡି ସେକ୍ଟରରେ ଏକ ଆଗୁଆ ପୋଷ୍ଟ ଉପରେ ବିନା କାରଣରେ ଗୁଳି ଚଳାଇଥିଲେ। ଭାରତୀୟ ସେନା କଡ଼ା ଜବାବ ଦେଇଥିଲା ଏବଂ ଶତ୍ରୁ ବାହିନୀର ପ୍ରବଳ କ୍ଷତି ହୋଇଛି। ଅନ୍ୟପକ୍ଷରେ, ଅଧିକାରୀମାନେ କହିଛନ୍ତି ଯେ ଆଜି ସେହି ଅଞ୍ଚଳରେ ଏକ ଲ୍ୟାଣ୍ଡମାଇନ୍ ଉପରେ ପାଦ ଦେବା ପରେ ଭାରତୀୟ ସେନାର ଜଣେ ଜୁନିଅର କମିଶନଡ୍ ଅଫିସର (ଜେସିଓ) ସାମାନ୍ୟ ଆହତ ହୋଇଛନ୍ତି। ଆହତ ଅଧିକାରୀଙ୍କୁ ସେନା ହସ୍ପିଟାଲକୁ ପଠାଯାଇଛି। ଅଧିକାରୀମାନେ ଏହା ମଧ୍ୟ କହିଛନ୍ତି ଯେ ଗତ ସପ୍ତାହରେ ସୀମା ପାରରୁ ଶତ୍ରୁତାପୂର୍ଣ୍ଣ କାର୍ଯ୍ୟକଳାପ ବୃଦ୍ଧି ପାଇଥିବାରୁ ନିୟନ୍ତ୍ରଣ ରେଖାରେ ପରିସ୍ଥିତି ଉତ୍ତେଜନାପୂର୍ଣ୍ଣ ରହିଛି। ଏହା ଚଳିତ ବର୍ଷର ପ୍ରଥମ ଅସ୍ତ୍ରବିରତି ଉଲ୍ଲଂଘନ ଏବଂ ପାଞ୍ଚ ଦିନ ମଧ୍ୟରେ ସୀମା ଆରପାରିରେ ଚତୁର୍ଥ ଘଟଣା। ସୋମବାର ଦିନ, ରାଜୌରୀ ଜିଲ୍ଲାର ନୌଶେରା ସେକ୍ଟରର କଳାଲ ଅଞ୍ଚଳରେ ସୀମା ପାରରୁ ଗୁଳିଚାଳନା ହେବାରୁ ଜଣେ ସୈନିକ ଆହତ ହୋଇଥିଲେ। ଫେବୃଆରୀ ୮ ତାରିଖରେ ରାଜୌରୀର କେରି ସେକ୍ଟରରେ ଆତଙ୍କବାଦୀମାନେ ଭାରତୀୟ ସେନାର ଏକ ପାଟ୍ରୋଲିଂ ପାର୍ଟି ଉପରେ ଗୁଳି ମଧ୍ୟ ଚଳାଇଥିଲେ। ଆତଙ୍କବାଦୀମାନେ ଭାରତୀୟ ସୀମାରେ ପ୍ରବେଶ କରିବା ପାଇଁ ସୁଯୋଗ ଅପେକ୍ଷାରେ ଥିଲେ। ଫେବୃଆରୀ ୪ ଏବଂ ୫ ରାତିରେ କୃଷ୍ଣା ଘାଟି ସେକ୍ଟରରେ ହୋଇଥିବା ଲ୍ୟାଣ୍ଡମାଇନ୍ ବିସ୍ଫୋରଣରେ ଆତଙ୍କବାଦୀଙ୍କ କ୍ଷତି ହୋଇଥିଲା। ସେମାନେ ଭାରତୀୟ ସୀମା ଭିତରକୁ ପ୍ରବେଶ କରିବାକୁ ଚେଷ୍ଟା କରୁଥିଲେ। ଫେବୃଆରୀ ୧୦ ତାରିଖରେ, ଜମ୍ମୁସ୍ଥିତ ହ୍ୱାଇଟ୍ ନାଇଟ୍ କର୍ପସର ଜେନେରାଲ ଅଫିସର କମାଣ୍ଡିଂ (ଜିଓସି) ଲେଫ୍ଟନାଣ୍ଟ ଜେନେରାଲ ନବୀନ ସଚଦେବ ରାଜୌରୀ ଜିଲ୍ଲାରେ ନିୟନ୍ତ୍ରଣ ରେଖା ସମୀକ୍ଷା କରିଥିଲେ। ସୀମା ଅଞ୍ଚଳରେ ଉତ୍ତେଜନ ଲାଗିରହିଥିବାରୁ ସେଠାର ସୁରକ୍ଷା ଆହୁରି କଡାକଡି କରାଯାଇଥିବାର ଜଣାପଡିଛି।
Comments are closed, but trackbacks and pingbacks are open.