ନୂଆଦିଲ୍ଲୀ:ଯଦି ସରକାରୀ ଡାକ୍ତରଖାନାର ଡାକ୍ତର କିମ୍ବା ସ୍ୱାସ୍ଥ୍ୟକର୍ମୀଙ୍କୁ କେହି ଶାରୀରିକ ଆଘାତ ଦେବାକୁ ଚେଷ୍ଟା କରେ କି ଆଘାତ ଦିଏ, ସେ କ୍ଷେତ୍ରରେ ଆକ୍ରମଣକାରୀଙ୍କୁ ଗିରଫ କରି କୋର୍ଟ ଚାଲାଣ କରିବ ପୁଲିସ। କେନ୍ଦ୍ର ସ୍ୱାସ୍ଥ୍ୟ କଲ୍ୟାଣ ମନ୍ତ୍ରାଳୟ ଏ ନେଇ ବିଜ୍ଞପ୍ତି ପ୍ରକାଶ କରିଛି। ବିଜ୍ଞପ୍ତି ଅନୁଯାୟୀ, ଦେଶରେ ଥିବା ସରକାରୀ ଡାକ୍ତରଖାନା ଗୁଡିକରେ ଦିନକୁ ଦିନ କାର୍ୟ୍ୟରତ ଡାକ୍ତର ଓ ସ୍ୱାସ୍ଥ୍ୟକର୍ମୀଙ୍କ ଉପରେ ଆକ୍ରମଣ ବୃଦ୍ଧି ପାଉଛି। ସେମାନଙ୍କ ଉପରେ ହେଉଥିବା ଆକ୍ରମଣ ଯୋଗୁ ସେମାନେ ମଧ୍ୟ ଆହତ ହେଉଛନ୍ତି। ଅନେକ ସମୟରେ ରୋଗୀ ଓ ରୋଗୀଙ୍କ ସମ୍ପର୍କୀୟ ଡାକ୍ତର ଓ ସ୍ୱାସ୍ଥ୍ୟକର୍ମୀଙ୍କ ସହ ପାଟିତୁଣ୍ଡ କରିବା ଠାରୁ ଆରମ୍ଭ କରି ମାଡପିଟ ଓ ଗଣ୍ଡଗୋଳ ମଧ୍ୟ ହେଉଛି। ଏହାକୁ ଦୃଷ୍ଟିରେ ରଖି ଏଣିକି କାର୍ୟ୍ୟ କ୍ଷେତ୍ରରେ ଏଭଳି ପରିସ୍ଥିତି ଉପୁଜିଲେ, ସମ୍ପୃକ୍ତ ହସ୍ପିଟାଲର ମୁଖ୍ୟ ୬ ଘଣ୍ଟା ମଧ୍ୟରେ ନିକଟସ୍ଥ ପୁଲିସ ଷ୍ଟେସନରେ ଏତଲା ଦାୟର କରିବେ। କେନ୍ଦ୍ର ସ୍ୱାସ୍ଥ୍ୟ ସେବା ନିର୍ଦ୍ଦେଶାଳୟ ପକ୍ଷରୁ ଏ ନେଇ ସମସ୍ତ ମେଡିକାଲ କଲେଜ ଓ ହସ୍ପିଟାଲର ଅଧ୍ୟକ୍ଷ କିମ୍ବା ନିର୍ଦ୍ଦେଶକ, ସମସ୍ତ ଏମସ ଏବଂ କେନ୍ଦ୍ର ସରକାରଙ୍କ ଅଧିନସ୍ତ ସମସ୍ତ ହସ୍ପିଟାଲ ଓ ପ୍ରତିଷ୍ଠାନକୁ ଅବଗତ କରାଯାଇଛି।
Comments are closed, but trackbacks and pingbacks are open.