ଉମରକୋଟ (ଭିଓଭି): ସାଧାରଣ ନିର୍ବାଚନ ତାରିଖ ଘୋଷଣା ହେବା ପରେ ପ୍ରଶାସନ ତତ୍ପର ହୋଇ ଉଠିଛି। ନବରଙ୍ଗପୁର ଜିଲ୍ଲା ଉମରକୋଟ ନିର୍ବାଚନ ମଣ୍ଡଳୀରେ ଶାନ୍ତିପୂର୍ଣ୍ଣ ଭାବେ ଆସନ୍ତା ବିଧାନସଭା ଓ ଲୋକସଭା ନିର୍ବାଚନ ଆୟୋଜନ ନିମନ୍ତେ ଉମରକୋଟ ପୋଲିସ ପ୍ରଶାସନ ତରଫରୁ ପ୍ରକ୍ରିୟା ଆରମ୍ଭ କରାଯାଇଛି। ନବରଙ୍ଗପୁର ଏସପି ରୋହିତବର୍ମାଙ୍କ ନିର୍ଦ୍ଦେଶକ୍ରମେ ଉମରକୋଟ ପୋଲିସ ଏସଡିପିଓ ମଧୁଶିକ୍ତା ମିଶ୍ରଙ୍କ ନେତୃତ୍ୱ ଓ ସିଆରପିଏଫ୍ ଯବାନଙ୍କ ମିଳିତ ଆନୁକୂଲ୍ୟରେ ସ୍ଥାନୀୟ ମ୍ୟୁନିସିପାଲିଟି ଓ ବ୍ଲକ୍ ସଦରର ସମସ୍ତ ଅଞ୍ଚଳରେ ଫ୍ଲାଗ ମାର୍ଚ୍ଚ କରାଯାଇଛି। ଆଗାମୀ ନିର୍ବାଚନକୁ ନେଇ ଏହି ଫ୍ଲାଗ ମାର୍ଚ୍ଚ କରାଯାଇଥିବା ବେଳେ ସମ୍ବେଦନଶୀଳ ବୁଥଗୁଡ଼ିକରେ ଶାନ୍ତି ପୂର୍ଣ୍ଣ ମତଦାନ ପାଇଁ ସ୍ବତନ୍ତ୍ର ବ୍ୟବସ୍ଥା ସହ ଅସାମାଜିକ କାର୍ଯ୍ୟକଳାପ ଓ ବେଆଇନ ମଦ ବିକ୍ରି ବନ୍ଦ୍ କରାଯିବା ଉପରେ ଗୁରୁତ୍ଵ ଦିଆଯିବ। ଏଥି ସହ ବିଭିନ୍ନ ପ୍ରକାରର ଅପରାଧ, ନିର୍ବାଚନୀ ହିଂସା ଉପରେ ପୋଲିସର ନଜର ରହିବ ବୋଲି ଉମରକୋଟ ଏସଡିପିଓ ମଧୁଶିକ୍ତା ମିଶ୍ର ପ୍ରକାଶ କରିଛନ୍ତି। ଏସଡିପିଓ ମଧୁ ଶିକ୍ତା ମିଶ୍ରଙ୍କ ସହ ତହସିଲଦାର ମାଗବାନ ବାଗ, ଗୋଷ୍ଠୀ ଉନ୍ନୟନ ଅଧିକାରୀ ପ୍ରୀତିରଞ୍ଜନ ରଥ, ଆଇଆଇସି ଡମ୍ବରୁଧର ପ୍ରଧାନ, ଏସଆଇ ଅକ୍ଷୟ ମିଶ୍ର, ପ୍ରକାଶ ମିଶ୍ର, ଶିବଜୀ ପଣ୍ଡା, ସୌମେନ୍ଦ୍ର ସେଠ, ପ୍ରତିମା ଟେଟେ, ସିଆରପିଏଫ୍ କମାଣ୍ଡାଣ୍ଟ ଅଜୟ କୁମାରଙ୍କ ସମେତ ବହୁ ସିଆରପିଏଫ୍ ଫୋର୍ସ, ଥାନାର ପୋଲିସ କର୍ମଚାରୀ ଓ ଗୋଟିଏ ପ୍ଲାଟୁନ ଆଇଆରବି ଯବାନ ଏହି ଫ୍ଲାଗ ମାର୍ଚ୍ଚରେ ଯୋଗ ଦେଇଥିଲେ।
