ନୂଆଦିଲ୍ଲୀ: ଦେଶରେ ନକଲି ସିମ୍ କାର୍ଡ ଜରିଆରେ ଠକେଇ ଏବଂ ଏ ସମ୍ପର୍କିତ ଅନ୍ୟାନ୍ୟ ଅପରାଧ ଉପରେ ସରକାର କଟକଣା ଲଗାଇବାକୁ ଯାଉଛନ୍ତି। ସଂସଦର ଉଭୟ ଗୃହରେ ଟେଲିକମ୍ ବିଧେୟକ ୨୦୨୩ ପାରିତ ହୋଇଛି। ଏହି ବିଧେୟକରେ ନକଲି ସିମ୍ କିଣିଲେ ୩ ବର୍ଷ ଜେଲ୍ ଏବଂ ୫୦ ଲକ୍ଷ ଟଙ୍କା ପର୍ଯ୍ୟନ୍ତ ଜୋରିମାନା ବ୍ୟବସ୍ଥା ରହିଛି। ରାଷ୍ଟ୍ରପତି ଏଥିରେ ଦସ୍ତଖତ କରିବା ପରେ ଏହି ବିଧେୟକ ଆଇନରେ ପରିଣତ ହେବ।
ଏହି ବିଲ୍ ସରକାରଙ୍କୁ ଜାତୀୟ ସୁରକ୍ଷା କାରଣରୁ କୌଣସି ଟେଲିକମ୍ ସେବା କିମ୍ବା ନେଟୱର୍କକୁ ନିଜ ଅଧୀନକୁ ନେବା ସହ ପରିଚାଳନା କରିବା ଓ ସ୍ଥଗିତ ରଖିବାକୁ ଅନୁମତି ପ୍ରଦାନ କରିଛି। ଜନସାଧାରଣଙ୍କ ସୁରକ୍ଷା ପାଇଁ ଆବଶ୍ୟକ ପଡ଼ିଲେ ସରକାର ଟେଲିକମ୍ ନେଟୱର୍କରେ ବାର୍ତ୍ତାଗୁଡିକୁ ଅଟକାଇ ପାରିବେ। ଏଥିସହ ନକଲି ସିମ୍ ବ୍ୟବହାର କଲେ ୩ ବର୍ଷ ଜେଲ୍ ଓ ୫୦ ଲକ୍ଷ ଟଙ୍କା ପର୍ଯ୍ୟନ୍ତ ଜୋରିମାନାର ଦଣ୍ଡ ବ୍ୟବସ୍ଥା ଏହି ବିଲ୍ରେ ରହିଛି।
ନୂତନ ଟେଲିକମ୍ୟୁନିକେସନ ବିଲ୍ ୧୩୮ ବର୍ଷ ପୁରୁଣା ଭାରତୀୟ ଟେଲିଗ୍ରାଫ୍ ଅଧିନିୟମର ସ୍ଥାନ ନେବ। ଭାରତୀୟ ଟେଲିଗ୍ରାଫ୍ ଅଧିନିୟମ ବର୍ତ୍ତମାନ ଟେଲିକମ୍ କ୍ଷେତ୍ରକୁ ନିୟନ୍ତ୍ରଣ କରୁଛି। ଏହି ବିଧେୟକ ଦି ଇଣ୍ଡିଆନ ୱାୟରଲେସ୍ ଟେଲିଗ୍ରାଫ୍ ଆକ୍ଟ ୧୯୩୩ ଓ ଟେଲିଗ୍ରାଫ୍ ୱାୟର୍ସ ଆକ୍ଟ ୧୯୫୦ର ସ୍ଥାନ ମଧ୍ୟ ନେବ। ଏହାସହ ଭାରତୀୟ ଦୂରସଞ୍ଚାର ନିୟାମକ ପ୍ରାଧିକରଣ(ଟ୍ରାଇ) ଆକ୍ଟ ୧୯୯୭କୁ ମଧ୍ୟ ସଂଶୋଧନ କରିବ।
ଏହି ବିଧେୟକରେ ଟେଲିକମ୍ କମ୍ପାନୀଗୁଡ଼ିକୁ ଗ୍ରାହକମାନଙ୍କୁ ସିମ୍ କାର୍ଡ ଦେବା ପୂର୍ବରୁ ବାଧ୍ୟତାମୂଳକ ଭାବେ ବାୟୋମେଟ୍ରିକ୍ ଚିହ୍ନଟ କରିବାକୁ କୁହାଯାଇଛି। ଏହା ବ୍ୟତୀତ ଓଟିଟି ପ୍ଲାଟଫର୍ମ ଯେପରିକି ଇ-କମର୍ସ, ଅନ୍ଲାଇନ ମେସେଜିଂକୁ ଟେଲିକମ୍ ସେବା ପରିଭାଷାରୁ ବାଦ୍ ଦିଆଯାଇଛି। ଏହି ବିଲ୍ ଲାଇସେନ୍ସ ବ୍ୟବସ୍ଥାରେ ମଧ୍ୟ ପରିବର୍ତ୍ତନ ଆଣିବ। ବର୍ତ୍ତମାନ ସେବା ପ୍ରଦାନକାରୀଙ୍କୁ ବିଭିନ୍ନ ପ୍ରକାରର ସେବା ପାଇଁ ଭିନ୍ନ ଭିନ୍ନ ଲାଇସେନ୍ସ ହାସଲ କରିବାକୁ ପଡ଼ୁଛି। କିନ୍ତୁ ଥରେ ଏହି ବିଲ୍ ଆଇନରେ ପରିଣତ ହେବା ପରେ ଲାଇସେନ୍ସ ପ୍ରଦାନରେ ସମାନତା ରହିବ। ଟେଲିକମ୍ ସେବା ପ୍ରଦାନ କରୁଥିବା କମ୍ପାନୀକୁ ଏକ ଅନଲାଇନ୍ ମେକାନିଜିମ୍ ତିଆରି କରିବାକୁ ପଡିବ, ଯଦ୍ବାରା ଉପଭୋକ୍ତାମାନେ ଅନଲାଇନରେ ସେମାନଙ୍କର ଅଭିଯୋଗ ଦାଖଲ କରିପାରିବେ।
ଏହି ନୂତନ ବିଲ୍ ଆମେରିକୀୟ ବ୍ୟବସାୟୀ ଏଲନ୍ ମସ୍କଙ୍କ ଷ୍ଟାରଲିଙ୍କ ପରି ବିଦେଶୀ କମ୍ପାନୀଗୁଡିକ ପାଇଁ ଲାଭଦାୟକ ସାବ୍ୟସ୍ତ ହେବ। ତେବେ ଜିଓ ଏହାଦ୍ବାରା କ୍ଷତି ସହିପାରେ।
Comments are closed, but trackbacks and pingbacks are open.