ସସ୍ପେନ୍ସ ରେ ରୋହିତଙ୍କ ଅଧିନାୟକ ପଦ

ଦିନିକିଆ ବିଶ୍ୱକପ କ୍ରିକେଟରେ ରୋହିତ ଶର୍ମା ନେତୃତ୍ୱରେ ଭାରତ ଜବରଦସ୍ତ ପ୍ରଦର୍ଶନ କରିଥିଲେ ମଧ୍ୟ ଫାଇନାଲ ହର୍ଡଲ୍ସ ପାର କରିପାରି ନ ଥିଲା । ପ୍ରଶଂସକମାନେ ଏତେ ମାତ୍ରାରେ ତାଙ୍କ ନେତୃତ୍ୱକୁ ଭରୋଷା କରି ନେଇଥିଲା ଯେ, ଭାରତ ବିଶ୍ୱକପ ଜିତିବା ବ୍ୟତୀତ ସେମାନେ ଅନ୍ୟ କିଛି ଚିନ୍ତା କରୁ ନ ଥିଲେ । ଫାଇନାଲରେ ଅଷ୍ଟ୍ରେଲିଆଠାରୁ ହାରିବା ପ୍ରଶଂସକଙ୍କୁ ନିରାଶ କରିଛି । ଏହା ପରେ ଦକ୍ଷିଣ ଆଫ୍ରିକା ବିପକ୍ଷ ସିରିଜ ପାଇଁ ଚୟନ କମିଟି ୩ଟି ଯାକ ଫର୍ମାଟରେ ଭିନ୍ନ ଭିନ୍ନ ଅଧିନାୟକ ଚୟନ କରିଛନ୍ତି । ଯାହାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ରୋହିତ ଶର୍ମା ଓ ବିରାଟ କୋହଲିଙ୍କୁ ସୀମିତ ଓଭର ମୁକାବିଲା ପାଇଁ ବିଶ୍ରାମ ଦିଆଯାଇଛି । ଟି୨୦ ବିଶ୍ୱକପ ପୂର୍ବରୁ ଭାରତ ୮ଟି ଆନ୍ତର୍ଜାତୀୟ ମ୍ୟାଚ ଖେଳିବ । ଅପରପକ୍ଷରେ ଆଇପିଏଲରେ ହାର୍ଦ୍ଦିକ ପାଣ୍ଡ୍ୟା ଏଥର ମୁମ୍ବାଇ ଇଣ୍ଡିଆନ୍ସ ପକ୍ଷରୁ ଖେଳିବେ । ରୋହିତ ଓ ହାର୍ଦ୍ଦିକଙ୍କ ମଧ୍ୟରେ ଯିଏ ଅଧିନାୟକ ହେବ ସେଥିରୁ ଟି୨୦ ବିଶ୍ୱକପ ନେତୃତ୍ୱ ନେଇ ବାଦଲ ହଟପାରେ । ରୋହିତଙ୍କ ନେତୃତ୍ୱରେ ହାର୍ଦ୍ଦିକ ଖେଳିବେ ବୋଲି ଅନୁମାନ କରାଯାଉଛି ।

ଅନ୍ୟ ଅର୍ଥରେ ଆନ୍ତର୍ଜାତୀୟ ମ୍ୟାଚ ଅପେକ୍ଷା ବିସିସିଆଇ ଆଇପିଏଲକୁ ଟି୨୦ ବିଶ୍ୱକପ ପ୍ରସ୍ତୁତି ଭାବେ ବ୍ୟବହାର କରିବ । ୧୦ ନଭେମ୍ବର ୨୦୨୨ ପରଠାରୁ ରୋହିତ ଓ ବିରାଟ କୌଣସି ଆନ୍ତର୍ଜାତୀୟ ଟି୨୦ ମ୍ୟାଚ ଖେଳି ନାହାନ୍ତି । ଟି୨୦ ବିଶ୍ୱକପ ୨୦୨୨ ସେମିରେ ଇଂଲଣ୍ଡ ବିପକ୍ଷରେ ସେମାନେ ଏହି ମ୍ୟାଚ ଖେଳିଥିଲେ ।

କ୍ରିକେଟ ସମୀକ୍ଷକଙ୍କ ମତରେ ରୋହିତ ଓ ବିରାଟଙ୍କୁ ଟି୨୦ ବିଶ୍ୱକପରେ ନ ଖେଳାଇବା ଅଥବା ସେମାନେ ଖେଳିବେ ନାହିଁ ୨ଟି ଯାକ ଘଟଣାରେ ଭାରତର କ୍ଷତି ହେବ । ଯୁବ ପିଢ଼ୀ ସହିତ ଅଭିଜ୍ଞତାର ସମନ୍ୱୟ ଦଳକୁ ଶୃଙ୍ଖଳିତ କରିବ ବୋଲି ଆଶା । ରୋହିତ ଓ କୋହଲି ମାନସିକ ଚାପରୁ ମୁକୁଳିବା ପାଇଁ ସାମୟିକ ଭାବେ ବ୍ରେକ ନେଇଛନ୍ତି ନାଁ ଏହି ଫର୍ମାଟରୁ ଦୂରେଇ ଯିବା ପାଇଁ ଚିନ୍ତା କରୁଛନ୍ତି ତାହା ହିଁ ସବୁଠାରୁ ବଡ ସସ୍ପେନ୍ସ ।