ଫୁଲକୋବି ଚାଷ

ଫୁଲକୋବି ପ୍ରଥମେ ସାଇପ୍ରସ ଏବଂ ଭୂମଧ୍ୟସାଗର ଅଞ୍ଚଳରେ ଜନ୍ମ ନେଇଥିବା କଥା କେହିକେହି ମତ ଦିଅନ୍ତି । ଆମ ଦେଶରେ ଶୀତଦିନେ ଚାଷ କରାଯାଉଥିବା ପନିପରିବାମାନଙ୍କ ମଧ୍ୟରେ ଫୁଲକୋବି ପ୍ରମୁଖ ସ୍ଥାନ ଗ୍ରହଣ କରିଛି । ଫୁଲକୋବିର କଢ଼କୁ ପରିବା ହିସାବରେ ବ୍ୟବହାର କରାଯାଏ । ଫୁଲକୋବିରେ ଶତକଡ଼ା ୯୦.୮ ଭାଗ ଜଳୀୟ ଅଂଶ ରହିଥାଏ । ଏଥି ସହିତ ଶତକଡ଼ା ୨.୬ ପୁଷ୍ଟିସାର, ୧.୯ ଭାଗ ଖଣିଜ ଲବଣ ଏବଂ ୧.୨ ଭାଗ ତନ୍ତୁଜାତୀୟ ପଦାର୍ଥ ଥାଏ ।
ଫୁଲକୋବିର ଅନେକ ନୂଆନୂଆ କିସମ ବାହାରିଲାଣି । କିସମମାନଙ୍କ ମଧ୍ୟରେ ଅର୍ଲି ସିନ୍ଥେଟିକ୍‌ଏ ଅର୍ଲି କୁଆଁରୀ, ପୁଷା କଟକି, କାର୍ତ୍ତିକା, ସୁପର ସ୍ନୋବଲ ଆଦି ଚାଷ କରାଯାଇପାରିବ । ଏସବୁ କିସମ ୮୦-୯୦ ଦିନ ଭିତରେ ଅମଳ ହୋଇଥାଏ । ମଧ୍ୟମ ଧରଣର କିସମଗୁଡ଼ିକ ୧୦୦ ଦିନରେ ଅମଳ ହୋଇଥାଏ । ସ୍ନୋବଲ-୧୬, ଜାପାନିଜ୍ ସିନ୍ଥେଟିକ୍‌, ଇମ୍ପ୍ରୁଭଡ୍ ଜାପାନିଜ୍‌, ମଧୁମତୀ ଆଦି କିସମ ଏହି ଶ୍ରେଣୀର ଅନ୍ତର୍ଭୁକ୍ତ । । ଅମରାବତୀ, ଲେଟ ସ୍ନୋବଲ ଏବଂ ସିଓ-୧ କିସମଗୁଡ଼ିକ ଅମଳ ହେବାପାଇଁ ୧୧୦-୧୨୦ ଦିନ ଲାଗିଥାଏ । ହିମାନୀ, ସ୍ୱାତୀ, ପୁନମ, ହିମଗିରି, ମହାରାଜା, ହିମକାର୍ତ୍ତିକ, ଗାର୍ଡ଼ିଆନ୍ ଆଦି ସଙ୍କର ଜାତୀୟ କିସମ ଚାଷ କଲେ ଭଲ ଅମଳ ମିଳିଥାଏ
ଉର୍ବରା ତଥା ନିଗିଡ଼ା ମାଟିରେ ଫୁଲକୋବିରୁ ଅଧିକ ଅମଳ ମିଳିଥାଏ । ଦୋରସା ମାଟି ଏହି ଫସଲ ପାଇଁ ଖୁବ୍ ଉପଯୋଗୀ । ଅତ୍ୟଧିକ ଅମ୍ଳ ମାଟିରେ ଫୁଲକୋବି ଭଲ ହୁଏନାହିଁ । ମାଟିର ଅମ୍ଳତା ୫.୫ରୁ ୬.୬ ମଧ୍ୟରେ ରହିବା ଭଲ । ଆମ ରାଜ୍ୟରେ ଫୁଲକୋବି ଶୀତଦିନେ ଚାଷ କରାଯାଏ । ସେପ୍ଟେମ୍ବର-ଅକ୍ଟୋବର ମାସ ମଧ୍ୟରେ ଫୁଲକୋବି ଲଗାଇଲେ ଭଲ ଅମଳ ମିଳିଥାଏ । ଆଭ୍ୟନ୍ତରୀଣ ଜିଲ୍ଲାମାନଙ୍କରେ ଏହି ଫସଲ ଶୀଘ୍ର ଲଗାଯାଇ ପାରିବ ।
ଏକ ଏକର ଜମିରେ ଲଗାଇବା ପାଇଁ ୨୦୦ ଗ୍ରାମ ବିହନ ଦରକାର । ଏହାକୁ ୪୦ ବର୍ଗ ମିଟର ବା ୧ ଡେସିମିଲ ଜମିରେ ତଳି ପକାଯାଇଥାଏ । ସଙ୍କର ଜାତୀୟ କିସମ ବ୍ୟବହାର କରୁଥିଲେ ଏକର ପିଛା ୧୫୦ ଗ୍ରାମ ବିହନ ଦରକାର ହୋଇଥାଏ । ଚାରାହଗୁଡ଼ିକ ତିନି ସପ୍ତାହରେ ହୋଇଗଲେ ରୋଇବା ପାଇଁ ଉପଯୁକ୍ତ ହୁଏ ।
ଚାରା ରୋଇବା ପୂର୍ବରୁ ଜମିକୁ ଭଲ ଭାବେ ହଳ କରି ମାଟି ଗୁଣ୍ଡ କରିଦେବା ଆବଶ୍ୟକ । ଶେଷ ଓଡ଼ ଚାଷ ବେଳେ ଏକର ପିଛା ୧୦ ଟନ୍ ସଢ଼ା ଗୋବର ଖତ ପ୍ରୟୋଗ କରିବା ଉଚିତ । ଧାଡ଼ିକୁ ଧାଡ଼ି ୬୦ ସେଣ୍ଟିମିଟର ଓ ଗଛକୁ ଗଛ ୩୦-୪୫ ସେଣ୍ଟିମିଟର ବ୍ୟବଧାନରେ ଚାରା ଲଗାଇବାକୁ ହୁଏ । ସଅଳ କିସମର ବିହନ ଚାଷ କରୁଥିଲେ ଧାଡ଼ିକୁ ଧାଡ଼ି ୪୫ ସେଣ୍ଟିମିଟର ଓ ଗଛକୁ ଗଛ ୩୦ ସେଣ୍ଟିମିଟର ବ୍ୟବଧାନରେ ଚାରା ରୁଆଯାଏ ।
ଏକ କ୍ୱିଣ୍ଟାଲ ଫୁଲକୋବି ଅମଳ ହେବାପାଇଁ ପ୍ରାୟ ୦.୫ କି.ଗ୍ରା. ଯବକ୍ଷାର, ୦.୨ କି.ଗ୍ରା. ଫସଫରସ ଓ ୦.୭ କି.ଗ୍ରା. ପଟାସ ସାର ଦରକାର ହୋଇଥାଏ । ଅଧିକ ଅମଳ ପାଇବା ପାଇଁ ଫୁଲକୋବି ଫସଲରେ ଅନୁମୋଦିତ ପରିମାଣର ସାହର ପ୍ରୟୋଗ କରିବା ଦରକାର । ଏକର ପିଛା ୫ ଟନ୍ ସଢ଼ା ଗୋବର ଖତ ବା କମ୍ପୋଷ୍ଟ ଦେବାକୁ ହୋଇଥାଏ । ଏଥି ସହିତ ଚାରା ଲଗାଇବା ବେଳେ ଏକର ପିଛା ୨୪ କିଲୋଗ୍ରାମ ଯବକ୍ଷାର, ୨୫ କିଲୋଗ୍ରାମ ଫସଫରସ ଓ ୧୬ କିଲୋଗ୍ରାମ ପଟାସ ସାର ପ୍ରୟୋଗ କରାଯାଏ । ଏହି ସାର ପାଇବା ପାଇଁ ଏକର ପ୍ରତି ୧୫୦ କି.ଗ୍ରା. ସିଙ୍ଗଲ ସୁପର ଫସଫେଟ୍ ଓ ୨୭ କି.ଗ୍ରା. ମ୍ୟୁରେଟ୍ ଅଫ୍ ପଟାସ ସହିତ ୫୨ କି.ଗ୍ରା. ୟୁରିଆ ବା ୯୬ କି.ଗ୍ରା. କାଲସିୟମ ଆମୋନିଅମ ନାଇଟ୍ରେଟ୍ ବା ୧୨୦ କି.ଗ୍ରା. ଆମୋନିଅମ ସଲଫେଟ ମିଶାଇ ବ୍ୟବହାର କରିବାକୁ ପଡ଼ିବ । ଏହି ସାର ବଦଳରେ ଏକର ପ୍ରତି ୨୭ କି.ଗ୍ରା. ମ୍ୟୁରେଟ୍ ଅଫ୍ ପଟାସ ସହିତ ୮୬ କି.ଗ୍ର।।. ଗ୍ରେମୋର (୨୮-୨୮-୦) କିମ୍ବା ୧୨୦ କି.ଗ୍ରା. ସୁଫଳା (୨୦-୨୦-୦) ସାର ମିଶାଯାଇପାରେ । ଏହା ବଦଳରେ ପ୍ରତି ୫୨ କି.ଗ୍ର।।. ଡିଏପି, ୨୭ କି.ଗ୍ର. ମ୍ୟୁରେଟ୍ ଅଫ୍ ପଟାସ ଓ ୩୨ କି.ଗ୍ରା. ୟୁରିଆ ଦରକାର ହେବ । ଏହା ବଦଳରେ ଏକର ପିଛା ୬୨ କି.ଗ୍ରା. ଏନପିକେ (୧୦-୨୬-୨୬), ୩୯ କି.ଗ୍ରା. ୟୁରିଆ ଓ ୫୦ କି.ଗ୍ରା. ସିଙ୍ଗଲ ସୁପର ଫସଫେଟ୍ ପ୍ରୟୋଗ କରିବାକୁ ପଡ଼ିବ । ଏହା ବଦଳରେ ଏକର ପ୍ରତି ୬୯ କି.ଗ୍ରା. ମ୍ୟୁରେଟ୍ ଗ୍ରେମୋର (୧୪-୩୫-୧୪), ୩୧ କି.ଗ୍ରା. ୟୁରିଆ ଏବଂ ୧୧ କି.ଗ୍ରା. ମ୍ୟୁରେଟ୍ ଅଫ୍ ପଟାସ ପ୍ରୟୋଗ କରିବାକୁ ପଡ଼ିବ । ଏହି ସାର ବଦଳରେ ଏକର ପିଚା ୧୦୭ କି.ଗ୍ରା. ଶ୍ୟାମଳା, ୫୦ କି.ଗ୍ରା. ସିଙ୍ଗଲ ସୁପର ଫସଫେଟ୍ ଓ ୧୭ କି.ଗ୍ରା. ୟୁରିଆ ପ୍ରୟୋଗ କରିବାକୁ ପଡ଼ିବ । ଏହାର ଏକ ମାସ ପରେ ଏକର ପିଛା ୨୪ କିଲୋଗ୍ରାମ ଯବକ୍ଷାର ଓ ୮ କିଲୋଗ୍ରାମ ପଟାସ ସାର ଦେବା ଦରକାର । ଏହି ସାର ପାଇବା ପାଇଁ ଏକର ପ୍ରତି ୧୩ କି.ଗ୍ରା. ମ୍ୟୁରେଟ୍ ଅଫ୍ ପଟାସ ସହିତ ୫୨ କି.ଗ୍ରା. ୟୁରିଆ କିମ୍ବା ୯୬ କି.ଗ୍ରା. କାଲସିଅମ ଆମେନିୟମ ନାଇଟ୍ରେଟ୍ କିମ୍ବା ୧୨୦ କି.ଗ୍ରା. ଆମୋନିଅମ ସଲଫେଟ ବ୍ୟବହାର କରିବାକୁ ହେବ ।
ଫୁଲକୋବି ଫସଲରେ ବୋରନ ଅଭାବ ହେଲେ ଅମଳ କମିଯାଏ । ତେଣୁ ଏକର ପିଛା ୫୦୦ ଗ୍ରାମ ବୋରନ ବା ବୋରାକ୍‌ସକୁ ୨୦୦ ଲିଟର ପାଣି ସହ ମିଶାଇ ସ୍ପ୍ରେ କରାଯିବା ଦରକାର । ବେଳେବେଳେ ମଲିବଡେନମ୍‌ର ଅଭାବ ମଧ୍ୟ ଦେଖାଯାଏ । ଏହାକୁ ଦୂର କରିବା ପାଇଁ ଏକର ପିଛା ୪୦୦-୬୦୦ ଗ୍ରାମ ସୋଡ଼ିୟମ୍ ମଲିବଡେଟ୍ ପ୍ରୟୋଗ କରାଯାଇପାରେ ।
ମଝିରେ ମଝିରେ କିଆରିକୁ ଖୁସାଇ ଦେଲେ ଖାସ ମରିଯାଏ । ଫୁଲକୋବିର ଚେର ଅଧିକ ଗଭୀରକୁ ଯାଏ ନାହିଁ । ତେରୁ ବେଶି ଗଭୀରତା ପର୍ଯ୍ୟନ୍ତ ଖୁସାଇବା ଦରକାର ନାହିଁ । ଚାରା ରୋଇବାର ଏକ ମାସ ପରେ ଗଛ ମୂଳକୁ ହୁଡ଼ା ଟେକିଦେବା ଉଚିତ । ବେଳେବେଳେ ଖରାତେଜରେ କୋବିଗୁଡ଼ିକର ଗୁଣାତ୍ମକ ମାନ ହ୍ରାସ ପାଇଥଶଏ । ଏ ସମସ୍ୟାରୁ ରକ୍ଷଶ ପାଇବା ପାଇଁ କୋମିର କଢ଼କୁ ପତ୍ର ଦ୍ୱାରା ଘୋଡ଼ାଇଦେବା ଉଚିତ । କୋବିର ବାହାର ପତ୍ରକୁ କଢ଼ ଉପରେ ବାନ୍ଧିଦେଲେ ଖରା ପ୍ରଭାବରେ କୋବିର ରଙ୍ଗ ଖରାପ ହୁଏନାହିଁ । ଘାସ ଦମନ ପାଇଁ ଚାରୋ ରୋଇବା ବେଳେ ଏକର ପିଛା ୮୦୦ ମି.ଲି. ବାସାଲିନ୍ ଔଷଧ ପ୍ରୟୋଗ କରାଯାଇପାରିବ । ପାଣିର ଅଭାବ ହେଲେ ଅମଳ ବାଧାପ୍ରାପ୍ତ ହୁଏ । ମାଟିର ବତରକୁ ଚାହିଁ ପାଣି ମଡ଼ାଇବା ଉଚିତ । ପ୍ରାରମ୍ଭିକ ଅବସ୍ଥାରେ ଦୁଇ ସପ୍ତାହରେ ଥରେ ପାଣି ମଡ଼ାଯାଏ । କିନ୍ତୁ ପରବର୍ତ୍ତୀ ସମୟରେ ଗଛ ବଡ଼ହେଲେ ସପ୍ତାହରେ ଥରେ ପାଣି ମଡ଼ାଯାଏ । କିନ୍ତୁ ପରବର୍ତ୍ତୀ ସମୟରେ ଗଛ ବଡ଼ହେଲେ ସପ୍ତାହକୁ ଥରେ ଜଳସେଚନ ଦରକାର ହୋଇଥାଏ । ଏହି ଫସଲ ପାଇଁ ପ୍ରାୟ ୬୦ ସେଣ୍ଟିମିଟର ଜଳସେଚନ ଦରକାର ହୋଇଥାଏ । ମୋଟରେ ପ୍ରାୟ ୬-୮ ଥର ପାଣି ମଡ଼ାଇବା ଆବଶ୍ୟକ ।
ବନ୍ଧାକୋବି ଶୂକ, କୋହବି ବିନ୍ଧାପୋକ ଏବଂ ଠିକିରିଅ ପୋକ ଫୁଲକୋବିର ବିଶେଷ କ୍ଷତି ଘଟାଇଥାଆନ୍ତି । ଏସବୁ ପୋକ ପତ୍ରକୁ ଖାଇବା ସହିତ କୋବରେ କ୍ଷତ ସୃଷ୍ଟି କରନ୍ତି । ଏମାନଙ୍କୁ ଦମନ କରିବା ପନାଇଁ ଏକର ପିଛା ୨୫୦ ଗ୍ରାମ କେଲଡାନ ବା ପାଦାନ ବା ଜୋସ କିମ୍ବା ୪୦୦ ମିଲିଲିଟର ମାଲାଥିଅନ କିମ୍ବା ୩୦୦ ମିଲିଲିଟର ସ୍ପିନୋସାଡ ଔଷଧକୁ ୨୦୦ ଲିଟର ପାଣି ସହ ମିଶାଇ ସ୍ପ୍ରେ କରିବା ଦରକାର । ଫୁଲକୋବିର ପତ୍ରପୋଡ଼ା ରୋଗ ହେଲେ ପତ୍ର ଉପରେ ବାଦାମୀ ମିଶା କଳାଚିହ୍ନ ଦେଖାଯାଏ । ଏହି ରୋଗ ନ ହେବା ପାଇଁ ବୁଣିବା ପୂର୍ବରୁ ବିହନକୁ କିଲୋଗ୍ରାମ ପ୍ରତି ୩ ଗ୍ରାମ ଥିରାମ ସହିତ ଗୋଳାଇ ବିଶୋଧନ କରିବା ଦରକାର । ଫସଲରେ ରୋଗ ଦେଖାଦେଲେ ଏକର ପିଛା ୫୦୦ ଗ୍ରାମ ଇଣ୍ଡୋଫିଲ ଏମ୍‌-୪୫ ବା କୋସାଇଡ୍ ଔଷଧକୁ ୨୦୦ ଲିଟର ପାଣି ସହ ମିଶାଇ ସ୍ପ୍ରେ କରିବା ଦରକାର ।
ମଧ୍ୟମ ତଥା ବିଳମ୍ବ କିସମର ଫୁଲକୋବି ଭଲ ଅମଳ ଦେଇଥାଏ । ସଅଳ କିସମରୁ କମ ଅମଳ ମିଳିଥାଏ । ଭଲ ଭାବେ ଚାଷ କଲେ ଏକର ପିଛା ୭୦-୮୦ କ୍ୱିଣ୍ଟାଲ ଫୁଲକୋବି ଅମଳା ହୋଇପାରିବ ।