ପାଟନା: ବିହାରର ଅରରିଆ ଜିଲ୍ଲାରେ ଏକ ଭୟଙ୍କର ସଡ଼କ ଦୁର୍ଘଟଣାରେ ୬ ଜଣଙ୍କର ମୃତ୍ୟୁ ଘଟିଛି। ତାରାବାରି ଥାନା ଅନ୍ତର୍ଗତ ବିଡ଼ି ବ୍ରିଜ୍ ନିକଟରେ ଏକ ସ୍କର୍ପିଓ ଭାରସାମ୍ୟ ହରାଇ ନଦୀକୁ ଖସିପଡ଼ିବାରୁ ଏହି ଅଘଟଣ ଘଟିଛି। ବୁଧବାର ବିଳମ୍ବିତ ରାତିରେ ଏହି ଦୁର୍ଘଟଣା ଘଟିଥିବା ସୂଚନା ମିଳିଛି। ମିଳିଥିବା ସୂଚନା ଅନୁଯାୟୀ, ଦୁର୍ଘଟଣାଗ୍ରସ୍ତ ସ୍କର୍ପିଓରେ ଥିବା ଯାତ୍ରୀମାନେ ସୁପୌଲ ଜିଲ୍ଲାର ପିପ୍ରାରୁ ସିକଟିର ଭାପଟିଆକୁ ଏକ ତିଳକ ଉତ୍ସବରେ ଯୋଗଦେବାକୁ ଆସିଥିଲେ। ଉତ୍ସବ ସାରି ଘରକୁ ଫେରୁଥିବା ବେଳେ ବ୍ରିଜ୍ ନିକଟରେ ଥିବା ଏକ ତୀକ୍ଷ୍ଣ ବୁଲାଣିରେ ଗାଡ଼ିଟି ହଠାତ୍ ନିୟନ୍ତ୍ରଣ ହରାଇ ସିଧାସଳଖ ମାରିଆ ନଦୀ ମଧ୍ୟକୁ ଖସି ପଡ଼ିଥିଲା। ଦୁର୍ଘଟଣା ପରେ ଘଟଣାସ୍ଥଳରେ ସ୍ଥାନୀୟ ଲୋକଙ୍କ ଭିଡ଼ ଜମିବା ସହ ଉତ୍ତେଜନା ଦେଖାଦେଇଥିଲା। ଖବର ପାଇ ପୋଲିସ ଓ ସ୍ଥାନୀୟ ଲୋକଙ୍କ ସହାୟତାରେ ତୁରନ୍ତ ଉଦ୍ଧାର କାର୍ଯ୍ୟ ଆରମ୍ଭ ହୋଇଥିଲା। ତେବେ ଗାଡ଼ିରେ ଥିବା ୭ ଜଣଙ୍କ ମଧ୍ୟରୁ ୬ ଜଣଙ୍କର ମୃତ୍ୟୁ ହୋଇଥିବା ବେଳେ ଜଣଙ୍କୁ ଜୀବିତ ଅବସ୍ଥାରେ ଉଦ୍ଧାର କରାଯାଇଛି। ଏହି ଦୁର୍ଘଟଣାରେ ପ୍ରାଣ ହରାଇଥିବା ସମସ୍ତ ବ୍ୟକ୍ତି ସୁପୌଲ ଜିଲ୍ଲାର ଥୁମ୍ହା ଗାଁର ବାସିନ୍ଦା ବୋଲି ଜଣାପଡ଼ିଛି। ଗୋଟିଏ ଗାଁର ୬ ଜଣଙ୍କ ଅକାଳ ବିୟୋଗ ପରେ ସମଗ୍ର ଅଞ୍ଚଳରେ ଶୋକର ଛାୟା ଖେଳିଯାଇଛି ଏବଂ ବିବାହ ଘରର ଖୁସି ମାହୋଲ କାନ୍ଦବୋବାଳିରେ ପରିଣତ ହୋଇଛି। ଅରରିଆ ଏସପି ଜିତେନ୍ଦ୍ର କୁମାର ଏହି ଘଟଣାରେ ଗଭୀର ଦୁଃଖ ପ୍ରକାଶ କରିବା ସହ ବ୍ୟବଚ୍ଛେଦ ପରେ ସମସ୍ତ ମୃତଦେହ ପରିବାର ଲୋକଙ୍କୁ ହସ୍ତାନ୍ତର କରାଯାଉଥିବା ସୂଚନା ଦେଇଛନ୍ତି।