ମହାନଦୀରେ ଗାଧୋଇବା ବେଳେ ଅଘଟଣ; ବୁଡ଼ିଯାଇ ନାବାଳକଙ୍କ ମୃତ୍ୟୁ

କଟକ: ମହାନଦୀରେ ଗାଧୋଉଥିବା ବେଳେ ପାଣିରେ ବୁଡ଼ି ଜଣେ ନାବାଳକଙ୍କ ଦୁଃଖଦ ମୃତ୍ୟୁ ଘଟିଛି। କଟକ ଜିଲ୍ଲା ଆଠଗଡ଼ ଅଞ୍ଚଳର ଧବଳେଶ୍ୱର ତାପେଣ୍ଡା ମହାନଦୀ ଘାଟରେ ଏହି ଅଘଟଣ ଘଟିଛି। ମୃତ ନାବାଳକ ଜଣକ ବିଡ଼ାନାସୀ ଥାନା ଅନ୍ତର୍ଗତ ତୁଳସୀପୁର ଅଞ୍ଚଳର ଇରଫାନ ଅଲ୍ଲୀ ବୋଲି ପରିଚୟ ମିଳିଛି। ମିଳିଥିବା ସୂଚନା ଅନୁଯାୟୀ, ତିନି ଜଣ ସାଙ୍ଗ ଏକ ଦୁଇଚକିଆ ଯାନ ଯୋଗେ ଧବଳେଶ୍ୱର ତାପେଣ୍ଡା ମହାନଦୀ ଘାଟକୁ ଗାଧୋଇବା ପାଇଁ ଆସିଥିଲେ। ନଦୀରେ ଗାଧୋଉଥିବା ସମୟରେ ଅସାବଧାନତାବଶତଃ ଇରଫାନଙ୍କ ଗୋଡ଼ ଖସିଯିବାରୁ ସେ ଗଭୀର ପାଣିରେ ବୁଡ଼ି ଯାଇଥିଲେ। ଖବର ପାଇ ବିଡ଼ାନାସୀ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲା। ଦୀର୍ଘ ସମୟର ଖୋଜାଖୋଜି ପରେ ନାବାଳକଙ୍କୁ ଅଚେତ ଅବସ୍ଥାରେ ପାଣିରୁ ଉଦ୍ଧାର କରାଯାଇ ତୁରନ୍ତ କଟକ ବଡ଼ ଡାକ୍ତରଖାନାକୁ ନିଆଯାଇଥିଲା। ମାତ୍ର ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ମୃତ ନାବାଳକ ଜଣକ ବିଦ୍ୟାଳୟ ପୋଷାକ ପିନ୍ଧିଥିବା ସୂଚନା ମିଳିଛି। ଘଟଣାସ୍ଥଳରେ ଚୌଦ୍ୱାର ଓ ଗୁରୁଡ଼ିଝାଟିଆ ପୋଲିସ ପହଞ୍ଚି ତଦନ୍ତ ଜାରି ରଖିଛି। ଇରଫାନଙ୍କ ଅକାଳ ବିୟୋଗରେ ତୁଳସୀପୁର ସମେତ ସମଗ୍ର ଅଞ୍ଚଳରେ ଶୋକର ଛାୟା ଖେଳିଯାଇଛି।