ପୁରୀ: ଗତ ଅଗଷ୍ଟ ୧୧ରେ ପୁରୀ ତାନ୍ତ୍ରିକ ହତ୍ୟା ଘଟଣା ଉପରୁ ପରଦା ଉଠାଇଛି ପୋଲିସ । ଟଙ୍କା ନଫେରାଇବାରୁ ୬୧ ବର୍ଷୀୟ ପର୍ଶୁରାମ ପ୍ରଧାନଙ୍କୁ କରାଯାଇଥିଲା ହତ୍ୟା । ଏହି ଘଟଣାରେ ୩ ଜଣଙ୍କୁ ଗିରଫ କରିଛି ପୁରୀ ପୋଲିସ । ପୁରୀ ଏସପି ପ୍ରତୀକ ସିଂହ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି । ଏସପିଙ୍କ ନିର୍ଦ୍ଦେଶ କ୍ରମେ ଗଠିତ ଏକାଧିକ ଟିମ୍ ସିସିଟିଭି ଓ ବୈଷୟିକ ତଥ୍ୟ ଆଧାରରେ ୩ ଜଣ ଅଭିଯୁକ୍ତକୁ ପୋଲିସ୍ ଗିରଫ କରିଛି । ଗିରଫ ଅଭିଯୁକ୍ତ ହେଲେ ଖୋର୍ଦ୍ଧା ସଦର ଥାନା ଅନ୍ତର୍ଗତ ତାପଙ୍ଗ ଅଞ୍ଚଳର ରାଜ କିଶୋର ସାହୁ (୩୨), ସୁରେଶ ସାହୁ (୨୨) ଓ କେନ୍ଦ୍ରାପଡ଼ାର ସତ୍ୟବ୍ରତ ମଲିକ୍ । ସେମାନଙ୍କ ଠାରୁ ୨ ଟି ମୋବାଇଲ୍ ଫୋନ୍, ହତ୍ୟାରେ ବ୍ୟବହୃତ ଛୁରୀ, ଗୋଟିଏ ବାଇକ୍ ଜବତ ହୋଇଛି । ତେବେ ହତ୍ୟା ପଛରେ ପ୍ରେମ, ପ୍ରତାରଣା, ଟଙ୍କା ଆଦାୟକୁ କେନ୍ଦ୍ର କରି ଏହି ଘଟଣା ଘଟିଥିବା ପୁରୀ ଏସପି ପ୍ରତୀକ ସିଂହ ସୂଚନା ଦେଇଛନ୍ତି । ଏସପି ପ୍ରତୀକ ସିଂହ କହିଛନ୍ତି, କଣାସ ମନ୍ଦାରବସ୍ତ ଅଞ୍ଚଳର ପର୍ଶୁରାମ ପ୍ରଧାନ ଗାଁରେ ଏକ ଦେବୀ ମନ୍ଦିର କରି ପୂଜା ସାଧନା କରୁଥିଲେ । ଲୋକଙ୍କ ସବୁ ସମସ୍ୟା ସମାଧାନ କରିଦେବେ ବୋଲି ପ୍ରଚାର କରୁଥିଲେ । ତେବେ ଖୋର୍ଦ୍ଧା ସଦର ବାଣିଆ ଟାଙ୍ଗୀର ରାଜ୍ କିଶୋର ସାହୁ ତାଙ୍କ ପରିବାରରେ ଲାଗି ରହିଥିବା ଅଶାନ୍ତି ଦୂର ପାଇଁ ସେ ତାନ୍ତ୍ରିକ ପର୍ଶୁରାମଙ୍କ ସହ ଯୋଗାଯୋଗ କରିଥିଲେ । ଏଥିପାଇଁ ରାଜ୍ କିଶୋର ୧୯ ହଜାର ଟଙ୍କା ଦେଇଥିଲେ । ମାତ୍ର ତାନ୍ତ୍ରିକ ପର୍ଶୁରାମ ଏକ ଖେଳ ଖେଳିଥିଲେ | ରାଜ୍ କିଶୋରଙ୍କ ଜମିରେ ଏକ ସୁନା ଦୁର୍ଗା ମୂର୍ତ୍ତୀ ସମେତ ସୁନା ଅଳଙ୍କାର ଭର୍ତ୍ତି ହାଣ୍ଡି ଥିବା କହିଥିଲେ । ଏହାକୁ ଖୋଳି ଉଦ୍ଧାର ପାଇଁ ତାନ୍ତ୍ରିକ ପର୍ଶୁରାମ ରାଜ୍ କିଶୋର ଠାରୁ ୨ ଲକ୍ଷ ଟଙ୍କା ନେଇଥିଲେ । ହେଲେ ପ୍ରତିଶ୍ରୁତି ମୁତାବକ ତାନ୍ତ୍ରିକ ପର୍ଶୁରାମ କିଛି କାର୍ଯ୍ଯ କଲେ ନାହିଁ । ତାନ୍ତ୍ରିକ ପର୍ଶୁରାମ ରାଜ୍ କିଶୋରକୁ ପ୍ରତାରଣା କରିବାରୁ ରାଜ କିଶୋର ତାନ୍ତ୍ରିକ ପର୍ଶୁରାମକୁ ହତ୍ୟା କରିବା ପାଇଁ ଯୋଜନା କରିଥିଲା।