ଭୁବନେଶ୍ୱର: ପୂର୍ବ ନିର୍ଦ୍ଧାରିତ ସମୟ ଅନୁଯାୟୀ, ଆଜି ପୂର୍ବାହ୍ନ ୯ଟା ୫୧ ମିନିଟ୍ରେ ଖୋଲିଛି ଶ୍ରୀମନ୍ଦିରର ଭିତର ରତ୍ନ ଭଣ୍ଡାର । ଭିତର ରତ୍ନ ଭଣ୍ଡାର ଖୋଲାଯାଇ ସାରିଥିବା ବେଳେ ପୁରୀ ଗଜପତି ମହାରାଜା ବି ଉପସ୍ଥିତ ଥିଲେ। ସେ ପୁରୀରେ ପହଞ୍ଚିବା ପରେ ଦକ୍ଷିଣ ଦ୍ୱାର ଦେଇ ମନ୍ଦିର ଭିତରେ ପ୍ରବେଶ କରିଥିଲେ। ଏହାପରେ ସେ ଭିତର ରତ୍ନ ଭଣ୍ଡାରକୁ ଯାଇଥିଲେ । ତେବେ ରତ୍ନଭଣ୍ଡାର ଭିତରେ ସୁଡ଼ଙ୍ଗ ଥିବା କୁହାଯାଉଥିବାବେଳେ ରତ୍ନଭଣ୍ଡାରରୁ ବାହାରି ଗଜପତି ମହାରାଜା କହିଛନ୍ତି ଯେ ସୁଡ଼ଙ୍ଗ ବା ଗୁପ୍ତ ଦ୍ୱାର ଅଛି କି ନାହିଁ ତାହା ଏଏସଆଇ ଅନୁଧ୍ୟାନ କରିବ । ଏଏସଆଇ ଲେଜର ସ୍କାନିଂ କରି ସୁଡ଼ଙ୍ଗ ଅଛି କି ନାହିଁ ତାହାର ଯାଞ୍ଚ କରିବ । ସେହିପରି ସେ କହିଛନ୍ତି ଯେ ବାହାର ଓ ଭିତର ରତ୍ନଭଣ୍ଡାରର ମରାମତି ନିତ୍ୟାନ୍ତ ଆବଶ୍ୟକ । କେଉଁ କାଳରୁ କେବେ ମରାମତି ହୋଇଥିଲା କେହି କେବେ ଜାଣନ୍ତିନି । ରତ୍ନଭଣ୍ଡାର ସମ୍ପୂର୍ଣ୍ଣ ଖାଲି ହେବା ପରେ ଲେଜର ସ୍କାନିଂ କରାଯିବ । ଭିତରେ ଆଉ କିଛି ନାହିଁ ବୋଲି ସ୍ପଷ୍ଟ ହେବା ପରେ ଏଏସଆଇକୁ ହସ୍ତାନ୍ତର କରାଯିବ । ୧୯୭୧ରୁ ଏଏସଆଇ ଦାୟିତ୍ୱ ନେବା ପରେ ରତ୍ନଭଣ୍ଡାର ଆଦୌ ମରାମତି ହୋଇନାହିଁ । ମରାମତି ବେଳେ ନୀତିକାନ୍ତି ଓ ଦର୍ଶନ ଉଭୟ ପ୍ରଭାବିତ ନହେବାକୁ ଗୁରୁତ୍ୱ ଦିଆଯାଇଛି । ଏ ସମ୍ପର୍କରେ ଅନୁଧ୍ୟାନ କରି ମୁଖ୍ୟ ପ୍ରଶାସକ ମରାମତି ସମୟ ନିର୍ଦ୍ଧାରଣ କରିବେ । ମୁଖ୍ୟ ପ୍ରଶାସକଙ୍କ ଦ୍ୱାରା ନିର୍ଦ୍ଧାରିତ ସମୟରେ ହିଁ ଏଏସଆଇ ମରାମତି କରିବ ବୋଲି ଗଜପତି ମହାରାଜ କହିଛନ୍ତି । ସେହିପରି ସେ କହିଛନ୍ତି ଯେ ଉଭୟ ବାହାର ଓ ଭିତର ରତ୍ନଭଣ୍ଡାର ମରାମତି ପରେ ଅଳଙ୍କାର ଗଣତି ମଣତି କରାଯିବ । ତଦାରଖ କମିଟି ଓ ପରିଚାଳନା କମିଟିର ଉପସ୍ଥିତିରେ ଗଣତି ମଣତିି କରାଯିବ । ରତ୍ନଭଣ୍ଡାର ମରାମତି ସମ୍ପୂର୍ଣ୍ଣ ନହେବା ଯାଏଁ ଗଣତି ମଣତି କରାଯିବନି ।