ଭୁବନେଶ୍ୱର: ଏଚ୍ଏମ୍ପିଭି ଭାଇରସକୁ ନେଇ ଚାରିଆଡ଼େ ଏବେ ଭୟର ବାତାବରଣ। ଦେଶରେ ଜଣଙ୍କ ପରେ ଜଣେ ଆକ୍ରାନ୍ତ ଚିହ୍ନଟ ହେଉଛନ୍ତି। କିନ୍ତୁ ଓଡ଼ିଶାରେ ବର୍ତ୍ତମାନ ସୁଦ୍ଧା ଏଚ୍ଏମ୍ପିଭି ଆକ୍ରାନ୍ତ ଚିହ୍ନଟ ହୋଇନାହାନ୍ତି। ତେବେ ଏହି ଭାଇରସକୁ ନେଇ ରାଜ୍ୟ ସରକାର ପୂରା ପ୍ରସ୍ତୁତ ଅଛନ୍ତି। ଏହାକୁ ନେଇ କୌଣସି ପ୍ରକାର ଡରିବାର ନାହିଁ। ସ୍ପେଶାଲ ଆଡଭାଇଜରୀ ଜାରି କରାଯାଇନାହିଁ ବୋଲି ଜନସ୍ୱାସ୍ଥ୍ୟ ନିର୍ଦ୍ଦେଶକ ନୀଳକଣ୍ଠ ମିଶ୍ର କହିଛନ୍ତି।ସେ ଆହୁରି ମଧ୍ୟ କହିଛନ୍ତି ଯେ ‘କେନ୍ଦ୍ର ସରକାର ନୂଆ ଭାଇରସକୁ ନେଇ କୌଣସି ଆଡଭାଇଜରୀ ଜାରି କରିନାହାନ୍ତି। ତେଣୁ ଆମେବି କରିନାହୁଁ। କିଛି ଡରିବାର ନାହିଁ। ଥଣ୍ଡା, କାଶ ସାଧାରଣ କଥା। ବର୍ତ୍ତମାନ କୌଣସି ରିପୋର୍ଟ ଆସିନାହିଁ। ସମସ୍ତେ ଏନେଇ ଆଲର୍ଟ ଅଛନ୍ତି। ସର୍ଭେଲାନ୍ସ ନେଇ ଆମର ଆଇଡିଏସ୍ପି ଓ ଏନ୍ସିଡିସି କାମ କରୁଛି। ଶୀତ ଦିନରେ ଥଣ୍ଡା, ଜ୍ୱର ଓ କାଶ ଅଧିକ ହୁଏ। ଡବ୍ଲ୍ୟୁଏଚଓ ରିପୋର୍ଟ ଅନୁସାରେ ଚାଇନାରେ ବି କେସ କମିଛି। ଭାରତରେ ବି କମୁଛି। ଓଡ଼ିଶାରେ ଏ ଯାଏଁ କୌଣସି କେସ୍ ଆସିନି। ବ୍ୟସ୍ତ ହେବାରେ କିଛି ନାହିଁ। କେସ୍ ବଢ଼ିଲେ, ସେ ସମୟରେ ଦେଖାଯିବ। ରାଜ୍ୟ ସରକାର ପ୍ରସ୍ତୁତ ଅଛନ୍ତି। ” ଜନସ୍ୱାସ୍ଥ୍ୟ ନିର୍ଦ୍ଦେଶକ ଶ୍ରୀ ମିଶ୍ର ଆହୁରି ମଧ୍ୟ କହିଛନ୍ତି ଯେ ହେଲଥ ଏମରଜେନ୍ସି ଅପରେସନ ସେଣ୍ଟର ଖୋଲିବା ନେଇ କେନ୍ଦ୍ର ସରକାର ସହ ଏମଓୟୁ ହୋଇଛି। ଏହି ସେଣ୍ଟର ୨୪ ଘଣ୍ଟା କାମ କରିବ। ସାରା ରାଜ୍ୟର ସ୍ୱାସ୍ଥ୍ୟ ଡାଟା ନେଇ ଏକ ଡାସ୍ବୋର୍ଡ ପ୍ରସ୍ତୁତ ହେବ। ଏହା ରାଜ୍ୟ ଅଧୀନରେ କାମ କରିବ। ଖୁବଶୀଘ୍ର ଏହା କାମ ଆରମ୍ଭ ହେବ ।