ପୁରୀ: ବର୍ଷକୁ ମାତ୍ର ଥରେ ମିଳୁଥିବା ମା’ ରାଧାରାଣୀଙ୍କ ଦୁର୍ଲଭ ରାଧାପାଦ ଦର୍ଶନ ପାଇଁ ଲକ୍ଷାଧିକ ଶ୍ରଦ୍ଧାଳୁଙ୍କ ସମାଗମ ହେବାକୁ ଥିବାରୁ ପ୍ରଶାସନ ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଛି। ନଭେମ୍ବର ୧୮ ତାରିଖରେ ଅଁଳା ନବମୀ ଅବସରରେ ସୁରୁଖୁରୁରେ ଦର୍ଶନ ଓ ଭିଡ଼ ନିୟନ୍ତ୍ରଣ ପାଇଁ ୨୬ ପ୍ଲାଟୁନ୍ ପୋଲିସ ଫୋର୍ସ ମୁତୟନ ହେବେ। ଆଇଜି ସତ୍ୟଜିତ ନାୟକ ସୁରକ୍ଷା ବ୍ୟବସ୍ଥାର ସମୀକ୍ଷା କରି ଏନେଇ ସୂଚନା ଦେଇଛନ୍ତି। ସୁରକ୍ଷା ଦାୟିତ୍ୱରେ ୨ ଜଣ ଅତିରିକ୍ତ ଏସ୍ପି, ୧୧ ଜଣ ଡିଏସ୍ପି ଓ ଡେପୁଟି କମାଣ୍ଡାଣ୍ଟ, ୨୧ ଜଣ ଇନ୍ସପେକ୍ଟର ଏବଂ ୭୦ ଜଣ ଏଏସ୍ଆଇ ପାହ୍ୟାର ଅଧିକାରୀ ନିୟୋଜିତ ହେବେ। ମନ୍ଦିର ପରିସରରେ ଶୃଙ୍ଖଳିତ ଦର୍ଶନ ପାଇଁ ୬ ଧାଡ଼ି ବିଶିଷ୍ଟ ଜିଗ୍ଜାଗ୍ ବ୍ୟାରିକେଡ୍ ବ୍ୟବସ୍ଥା କରାଯାଇଛି। ଭକ୍ତମାନେ ନିର୍ଦ୍ଧାରିତ ପ୍ରବେଶ ଓ ପ୍ରସ୍ଥାନ ପଥ ଦେଇ ଯାତାୟାତ କରିବେ। ଧାଡ଼ିରେ ଅପେକ୍ଷା କରୁଥିବା ଭକ୍ତଙ୍କୁ ଖରା ଓ ବର୍ଷାରୁ ସୁରକ୍ଷା ଦେବା ପାଇଁ ବ୍ୟାରିକେଡ୍ ଉପରେ ଛାତର ବ୍ୟବସ୍ଥା କରାଯାଇଛି। ମୋବାଇଲ୍ ଫୋନ୍ ଓ ଜୋତା ରଖିବା ପାଇଁ ମଧ୍ୟ ନୂଆ ଷ୍ଟାଣ୍ଡ୍ ସ୍ଥାପନ କରାଯାଇଛି। ପୋଲିସ କର୍ମଚାରୀଙ୍କୁ ସହଯୋଗ କରିବା ସହ କେବଳ ନିର୍ଦ୍ଧାରିତ ପାର୍କିଂ ସ୍ଥାନରେ ଗାଡ଼ି ରଖିବାକୁ ପରାମର୍ଶ ଦିଆଯାଇଛି। ଅଁଳା ନବମୀରେ ପ୍ରବଳ ଭିଡ଼କୁ ଦୃଷ୍ଟିରେ ରଖି ପୁରୀ ପୋଲିସ ପକ୍ଷରୁ ଭକ୍ତ ଓ ଯାତ୍ରୀଙ୍କୁ ନିର୍ଦ୍ଧାରିତ ଟ୍ରାଫିକ୍ ନିୟମ ମାନିବାକୁ ଅନୁରୋଧ କରାଯାଇଛି।