ଭୁବନେଶ୍ବର: ଲାଞ୍ଜିଗଡରେ ଥିବା ବେଦାନ୍ତ କଂପାନୀର ରେଡ ମଡ ପଣ୍ଡ ଭୁଷିଡି ପଡିଛି। ଫଳରେ ସେହି ଅଞ୍ଚଳରେ ଥିବା ଶହଶହ ଏକର ଜମିରେ ନାଲିପାଣି ମାଡିଯାଇଛି। ଫଳରେ ସ୍ଥାନୀୟ ଅଞ୍ଚଳରେ ଉତ୍ତେଜନା ସୃଷ୍ଟି ହୋଇଛି। ମୁଖ୍ୟତଃ ବେଦାନ୍ତ କଂପାନୀର ରେଡ ମଡ ପଣ୍ଡର ଠିକଭାବେ ରକ୍ଷାଣ ବେକ୍ଷଣ ହୋଇ ନ ଥିବାରୁ ଏପରି ଅସୁବିଧା ଘଟିଲା ବୋଲି ଅଭିଯୋଗ କରାଯାଇଛି। ଘଟଣାରୁ ଜଣାପଡିଛି ଯେ, ଲାଞ୍ଜିଗଡସ୍ଥିତ ବେଦାନ୍ତ କଂପାନୀର ରେଡମଡ ପଣ୍ଡ ବସନ୍ତପଡାରେ ନିର୍ମାଣ କରାଯାଇଛି। ଏହାର ବନ୍ଧକୁ ଠିକ ଭାବେ ତଦାରଖ କରାଯାଇ ନ ଥିବାରୁ ପ୍ରବଳ ବର୍ଷାରେ ତାହା ଭୁଷୁଡି ପଡିଛି। ଏହାଦ୍ବାରା ବସନ୍ତପଡା ସମେତ ବନ୍ଧଗୁଡା, ତୁରିଗୁଡାରେ ହେକ୍ଟର ହେକ୍ଟର ଚାଷ ଜମିରେ କାଦୁଅ ପାଣି ମାଡି ଯାଇଛି। ଲାଲ୍ ମାଟି ପାଣି ମାଡି ଯାଇଥିବାରୁ ବନ୍ୟା ଭଳି ପରିସ୍ଥିତି ସୃଷ୍ଟି ହୋଇଛି। ବେଦାନ୍ତ କଂପାନୀର ଏପରି ଖାମଖିଆଲ ନୀତି ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ସୃଷ୍ଟି ହୋଇଛି। ତୁରନ୍ତ ବେଦାନ୍ତ କଂପାନୀ ଏହାର କ୍ଷତିପୂରଣ ଦେଉ ବୋଲି ସ୍ଥାନୀୟ ଲୋକମାନେ ଦାବୀ କରିଛନ୍ତି।