ପରିଚୟ ପତ୍ର ନ ଦେଖି ଦୁଇ ହଜାର ଟଙ୍କିଆ ନୋଟ ବଦଳାଇବା ବିରୋଧରେ ଆବେଦନ ଉପରେ ଦିଲ୍ଲୀ ହାଇକୋର୍ଟ ରାୟ ସଂରକ୍ଷିତ ରଖି ଛନ୍ତି। ଆବେଦନକାରୀ କହିଛନ୍ତି , ପରିଚୟ ପତ୍ର ନ ଦେଖି ନୋଟ ବଦଳାଇବା ଦ୍ୱାରା ଦୁର୍ନୀତିଗ୍ରସ୍ତ ଲୋକେ ଉପକୃତ ହେବେ। ବିତର୍କ ସମୟରେ ଏହାର ଜବାବ ଦେଇ ରିଜର୍ଭ ବ୍ୟାଙ୍କ କହିଛି ଆର୍ଥିକ ଏବଂ ମୁଦ୍ରା ନୀତି ମାମଲାରେ କୋର୍ଟ ହସ୍ତକ୍ଷେପ କରନ୍ତି ନାହିଁ। ଏହା ସୁପ୍ରିମକୋର୍ଟର ଏକ ପୁରୁଣା ନିଷ୍ପତ୍ତି।
ଓକିଲ ଅଶ୍ୱିନୀ ଉପାଧ୍ୟାୟଙ୍କ ଦ୍ୱାରା ଦାଖଲ ହୋଇଥିବା ଆବେଦନ ଉପରେ ଦିଲ୍ଲୀ ହାଇକୋର୍ଟର ମୁଖ୍ୟ ବିଚାରପତି ସତୀଶ ଚନ୍ଦ୍ର ଶର୍ମା ଏବଂ ଜଷ୍ଟିସ ସୁବ୍ରମଣ୍ୟମ ପ୍ରସାଦ ଏହି ଆବେଦନ ଉପରେ ରାୟ ସଂରକ୍ଷିତ ରଖିଛନ୍ତି। ୩ ଲକ୍ଷ କୋଟିରୁ ଅଧିକ ମୂଲ୍ୟର ୨୦୦୦ ଟଙ୍କିଆ ନୋଟ ଦୁର୍ନୀତିଗ୍ରସ୍ତ, ମାଫିଆ କିମ୍ବା ଜାତୀୟ ବିରୋଧୀ ବାହିନୀଙ୍କ ପାଖରେ ଥିବା ସନ୍ଦେହ କରାଯାଉଛି ବୋଲି ଆବେଦନକାରୀ କହିଛନ୍ତି। ଏପରି ପରିସ୍ଥିତିରେ, ପରିଚୟ ପତ୍ର ନ ଦେଖି ନୋଟ ବଦଳାଇବା ଦ୍ୱାରା ସେମାନେ ଉପକୃତ ହେବେ ।
ଆବେଦନକାରୀ କହିଛନ୍ତି ଆଜି ଭାରତରେ ଏପରି ପରିବାର ନାହିଁ ଯାହାଙ୍କର ବ୍ୟାଙ୍କ ଆକାଉଣ୍ଟ ନାହିଁ। ତେଣୁ, ୨୦୦୦ ନୋଟ ସିଧାସଳଖ ବ୍ୟାଙ୍କ ଆକାଉଣ୍ଟରେ ଜମା ହେବା ଉଚିତ। ଏହା ମଧ୍ୟ ନିଶ୍ଚିତ ହେବା ଉଚିତ ଜଣେ ବ୍ୟକ୍ତି କେବଳ ନିଜ ଆକାଉଣ୍ଟରେ ନୋଟ ଜମା କରିପାରିବେ ଏବଂ ଅନ୍ୟର ଆକାଉଣ୍ଟରେ ନୁହେଁ। ଏହା ଦ୍ୱାରା ବେଆଇନ କାରବାର ବନ୍ଦ ହୋଇ ପାରିବ । ଉପାଧ୍ୟାୟ କହିଛନ୍ତି ଏକ ସମୟରେ ୨୦ ହଜାର ପର୍ଯ୍ୟନ୍ତ ବିନିମୟ ପାଇଁ ଅନୁମତି ଦିଆଯାଇଛି। ଏହିପରି, ଜଣେ ମାଫିଆ ଗୋଟିଏ ଦିନରେ ଲକ୍ଷ ଲକ୍ଷ ଟଙ୍କା ବଦଳାଇ ପାରିବେ।
ଶୁଣାଣି ସମୟରେ ବରିଷ୍ଠ ଓକିଲ ପରାଗ ତ୍ରିପାଠୀ ରିଜର୍ଭ ବ୍ୟାଙ୍କ ପକ୍ଷରୁ ହାଜର ହୋଇଥିଲେ।
ସେ ୧୯୮୧ ’ଆର.କେ ଗର୍ଗ ବନାମ ଭାରତ ସରକାର’ ମାମଲାର ନିଷ୍ପତ୍ତିର ଉଦାହରଣ ଦେଇଛନ୍ତି। ତାଙ୍କର ଯୁକ୍ତି ଥିଲା କୋର୍ଟ ଆର୍ଥିକ ନୀତିରେ ହସ୍ତକ୍ଷେପ କରିପାରିବେ ନାହିଁ। ଅନ୍ୟ କିଛି ନିଷ୍ପତ୍ତି ଦର୍ଶାଇ ତ୍ରିପାଠୀ ଏହା ମଧ୍ୟ କହିଛନ୍ତି ନୋଟ ଜାରି ଏବଂ ପ୍ରତ୍ୟାହାର କରିବା ରିଜର୍ଭ ବ୍ୟାଙ୍କର ଅଧିକାର। କୋର୍ଟ ଏଥିରେ ହସ୍ତକ୍ଷେପ କରିବା ଉଚିତ ନୁହେଁ।