ଡିସେମ୍ବର ୫ ରୁ ୩ ଜିଲ୍ଲାରେ ଖୋଲିବ ଧାନ ମଣ୍ଡି

ଭୁବନେଶ୍ୱର: ରାଜ୍ୟର ଚାଷୀକୂଳ ପାଇଁ ଏକ ବଡ଼ ଖବର ସାମ୍ନାକୁ ଆସିଛି। ଚଳିତ ଖରିଫ୍ ଋତୁରେ ଧାନ ଅମଳ ଏବଂ ସଂଗ୍ରହ ବ୍ୟବସ୍ଥାକୁ ତ୍ୱରାନ୍ୱିତ କରିବା ପାଇଁ ପ୍ରଥମ ପର୍ଯ୍ୟାୟରେ ରାଜ୍ୟର ୩ଟି ଜିଲ୍ଲାରେ ମଣ୍ଡି ଖୋଲିବା ନେଇ ସମବାୟ ମନ୍ତ୍ରୀ ପ୍ରଦୀପ ବଳସାମନ୍ତ ସରକାରୀ ଭାବେ ତାରିଖ ଘୋଷଣା କରିଛନ୍ତି। ଚଳିତ ଖରିଫ୍ ଋତୁରେ ରାଜ୍ୟର ଚାଷୀମାନଙ୍କୁ ସୁବିଧା ଯାଗାଇଦେବା ଏବଂ ସମୟାନୁବର୍ତୀ ଧାନ କ୍ରୟ ନିମନ୍ତେ ପ୍ରଥମ ପର୍ଯ୍ୟାୟରେ ରାଜ୍ୟର ୩ଟି ପ୍ରମୁଖ ଜିଲ୍ଲାରେ ଧାନ ମଣ୍ଡି ଖୋଲିବା ତାରିଖ ଚୂଡ଼ାନ୍ତ ହୋଇଛି। ସମବାୟ ମନ୍ତ୍ରୀ ପ୍ରଦୀପ ବଳସାମନ୍ତଙ୍କ ସୂଚନା ଅନୁଯାୟୀ, ଚଳିତ ବର୍ଷ ଗତବର୍ଷ ତୁଳନାରେ ୧୦ ଦିନ ପୂର୍ବରୁ ଅର୍ଥାତ୍ ଡିସେମ୍ବର ୫ ତାରିଖରୁ ମଣ୍ଡି କାର୍ଯ୍ୟକ୍ଷମ ହେବ। ମନ୍ତ୍ରୀଙ୍କ ସୂଚନା ମୁତାବକ, କଳାହାଣ୍ଡି ଜିଲ୍ଲାରେ ଡିସେମ୍ବର ୫ ତାରିଖରୁ ପ୍ରଥମେ ମଣ୍ଡି ଖୋଲିବ। ସେହିପରି ସୁବର୍ଣ୍ଣପୁର (ସୋନପୁର) ଜିଲ୍ଲାରେ ଡିସେମ୍ବର ୧୧ ତାରିଖରୁ ଏବଂ ବଲାଙ୍ଗୀର ଜିଲ୍ଲାରେ ଡିସେମ୍ବର ୧୪ ତାରିଖରୁ ଧାନ ସଂଗ୍ରହ ପ୍ରକ୍ରିୟା ଆରମ୍ଭ ହେବ।

ଚଳିତ ବର୍ଷ ଲଗାତାର ବର୍ଷା ଜାରି ରହିବା ଏବଂ ପର୍ଯ୍ୟାପ୍ତ ଖରା ନ ପଡ଼ିବା କାରଣରୁ କ୍ଷେତରେ ଧାନ ଠିକ୍ ସମୟରେ ପାଚି ପାରି ନଥିଲା। ଫଳରେ ଧାନ ଅମଳ ପ୍ରକ୍ରିୟାରେ ସାମାନ୍ୟ ବିଳମ୍ବ ଦେଖାଦେଇଥିଲା। ତେବେ ଧାନ ସମ୍ପୂର୍ଣ୍ଣ ପାଚିଲା ପରେ ହିଁ ଅମଳ କରିବା ପାଇଁ କୃଷି ବିଭାଗ ପକ୍ଷରୁ ପରାମର୍ଶ ଦିଆଯାଇଛି। ସୂଚନାଯୋଗ୍ୟ ଯେ, ଗତବର୍ଷ ଡିସେମ୍ବର ୧୫ ସୁଦ୍ଧା ମଣ୍ଡି ଖୋଲିଥିବା ବେଳେ ଚଳିତ ବର୍ଷ ଚାଷୀଙ୍କ ସୁବିଧାକୁ ଦୃଷ୍ଟିରେ ରଖି ଡିସେମ୍ବର ୫ରୁ ହିଁ ପ୍ରକ୍ରିୟା ଆରମ୍ଭ କରାଯାଉଛି। ଧାନ ସଂଗ୍ରହ ପାଇଁ ପୂର୍ବରୁ ପ୍ରଚଳିତ ଥିବା ସମସ୍ତ ସ୍ୱଚ୍ଛ ଏବଂ ସହଜ ବ୍ୟବସ୍ଥାକୁ ହିଁ ବଳବତ୍ତର ରଖାଯିବ। ଜିଲ୍ଲାସ୍ତରୀୟ ଧାନ ସଂଗ୍ରହ କମିଟି ବୈଠକରେ ହୋଇଥିବା ଆଲୋଚନା ଓ ନିଷ୍ପତ୍ତି ଆଧାରରେ ଏହି ପଦକ୍ଷେପ ନିଆଯାଇଛି, ଯାହାଦ୍ୱାରା ଚାଷୀମାନେ ସେମାନଙ୍କ ଉତ୍ପାଦିତ ଧାନର ଯଥାର୍ଥ ମୂଲ୍ୟ ସଠିକ୍ ସମୟରେ ପାଇପାରିବେ।