ଭୁବନେଶ୍ୱର: ଚଳିତ ବର୍ଷ ରଜରେ ଭିଜିବ ସାରା ଓଡ଼ିଶା। ଆସନ୍ତା ୨ ରୁ ୩ ଦିନ ମଧ୍ୟରେ ରାଜ୍ୟରେ ଦକ୍ଷିଣ-ପଶ୍ଚିମ ମୌସୁମୀ ବାୟୁ ପ୍ରବେଶ କରିବା ପାଇଁ ପାଗ ଅନୁକୂଳ ରହିଛି। ଫଳରେ ରଜ ମହୋତ୍ସବ ସମୟରେ ରାଜ୍ୟର ଅଧିକାଂଶ ସ୍ଥାନରେ ବର୍ଷା ସହ ପାଗ ମନୋରମ ରହିବ। ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ରର ସୂଚନା ଅନୁସାରେ, ବର୍ତ୍ତମାନ ରାଜ୍ୟରେ ପ୍ରାକ୍-ମୌସୁମୀ ବର୍ଷା ସହ କାଳବୈଶାଖୀର ପ୍ରଭାବ ଜାରି ରହିଛି। ବିଭିନ୍ନ ଜିଲ୍ଲାରେ ଗୁଳୁଗୁଳି ସତ୍ତ୍ୱେ ମେଘୁଆ ପାଗ ସହ ବର୍ଷା, ବଜ୍ରପାତ ଓ ଝଡ଼ପବନ ହେଉଛି। ଆସନ୍ତା ୩ ଦିନ ପର୍ଯ୍ୟନ୍ତ ଦିନର ତାପମାତ୍ରାରେ ବିଶେଷ ପରିବର୍ତ୍ତନ ହେବନାହିଁ, କିନ୍ତୁ ଏହାପରେ ପାରଦ ହ୍ରାସ ପାଇବା ସହ ଅସହ୍ୟ ଗରମରୁ ତ୍ରାହି ମିଳିବ। ରଜ ଅବସରରେ ମୌସୁମୀର ଆଗମନ ଚାଷୀକୂଳ ମଧ୍ୟରେ ମଧ୍ୟ ନୂଆ ଆଶା ସଞ୍ଚାର କରିଛି।