ଦେଶରେ ଓଡ଼ିଶା ହେଉଛି ଚତୁର୍ଥ ସର୍ବାଧିକ ମତ୍ସ୍ୟ ଉତ୍ପାଦନକାରୀ ରାଜ୍ୟ। ରାଜ୍ୟରେ ମତ୍ସ୍ୟ ଉତ୍ପାଦନର ଅପାର ସୁଯୋଗ ଓ ସମ୍ଭାବନା ଭରି ରହିଛି। ହେଲେ ସରକାରୀ ଅଧିକାରୀଙ୍କ ଆନ୍ତରିକତା ଅଭାବରୁ ଓଡ଼ିଶାରେ ଯେତିକି ପରିମାଣର ମାଛ ଉତ୍ପାଦନ ହେବା କଥା ତାହା ହୋଇପାରୁନାହିଁ। ଏବେବି ଓଡ଼ିଶା ପଡୋଶୀ ଆନ୍ଧ୍ରପ୍ରଦେଶ ଓ ପଶ୍ଚିମବଙ୍ଗ ଭଳି ରାଜ୍ୟ ଉପରେ ନିର୍ଭର କରୁଛି। ରାଜ୍ୟରେ ବର୍ଷକୁ ୧୩.୫୦ରୁ ୧୪ଲକ୍ଷ ମେଟ୍ରିକ ଟନ ମାଛର ଚାହିଦା ଥିବାବେଳେ ଓଡ଼ିଶାରେ ତା’ର ୬୫ ପ୍ରତିଶତ ଲକ୍ଷ୍ୟ ପୂରଣ କରୁଛି। ରାଜ୍ୟରେ ପ୍ରାୟ ୯ ଲକ୍ଷ ମେଟ୍ରିକ୍ ଟନ୍ ମାଛ ଉତ୍ପାଦନ ହେଉଛି। ଏହି ପରିମାଣକୁ କିଭଳି ବୃଦ୍ଧି କରାଯିବା ସହିତ ରାଜ୍ୟର ଚାହିଦାକୁ ମେଣ୍ଟାଇ ହେବ ତାକୁ ନେଇ ରାଜ୍ୟ ସରକାରଙ୍କ ପକ୍ଷରୁ ୨ବର୍ଷ ହେଲାଣି ଅଙ୍କକଷା ସରିଛି। କେତେ ଟଙ୍କା କେଉଁ ପର୍ଯ୍ୟାୟରେ ଖର୍ଚ୍ଚ ହେବ ତାହା ଆକଳନ କରାଯିବା ସହିତ ବଜେଟରେ ଅନୁମୋଦନ ହୋଇଛି। ଟଙ୍କା ଏବେ ବ୍ୟାଙ୍କରେ ଗଡୁଛି, ହେଲେ ମତ୍ସ୍ୟ ଉତ୍ପାଦନ ବୃଦ୍ଧି ଯୋଜନାର ସଫଳ ରୂପାୟନହୋଇପାରୁନାହିଁ କି ବେକାରୀଙ୍କ ପାଇଁ ନିଯୁକ୍ତି ସୁଯୋଗ ସୃଷ୍ଟି ହୋଇପାରୁନାହିଁ।
ଗତବର୍ଷ କରୋନା ମହାମାରୀକୁ ଦୃଷ୍ଟିରେ ରଖି ରାଜ୍ୟ ସରକାର ମୋ-ପୋଖରୀ ଭଳି ବିଭିନ୍ନ ଯୋଜନାରେ ୪୪ହଜାର ମତ୍ସ୍ୟ ଚାଷୀ ଓ ସ୍ବୟଂ ସହାୟକ ଗୋଷ୍ଠୀର ମହିଳା ସଦସ୍ୟାଙ୍କୁ ୧୭୩ କୋଟି ଟଙ୍କା ଦେଇ ମାଛ ଚାଷ ବଢ଼ାଇବାକୁ ଲକ୍ଷ୍ୟ ରଖି ଥିଲେ। ଏଥିରେ ରାଜ୍ୟର ୧.୨୪ ଲକ୍ଷ ମେଟ୍ରିକ୍ ଟନ୍ ମାଛ ବଢ଼ିବ ବୋଲି ଆକଳନ କରାଯାଇଥିଲା। ମତ୍ସ୍ୟ ଓ ପଶୁ ସମ୍ପଦ ଏବଂ ଜଳସମ୍ପଦ ବିଭାଗ ପକ୍ଷରୁ ଯୁଗ୍ମ ବୈଠକ ବସି ରାଜ୍ୟର ୫ଟି ଜିଲାରେ ଥିବା ପ୍ରାୟ ୧୪ଟି ମୁହାଁଣ ଖୋଳାଇବା ପାଇଁ ସରକାର ଯୋଜନା କରିଥିଲେ। ଯୋଜନା ବାବଦ ୨୪.୫୦କୋଟି ଟଙ୍କା ବଜେଟରେ ବରାଦ ହୋଇଛି। ପ୍ରଥମ ପର୍ଯ୍ୟାୟରେ ଭଦ୍ରକର ବିଶ୍ବନାଥପୁରର ୨ଟି ମୁହାଁଣ, ହରିଶପୁରର ୨ଟି ମୁହାଁଣ ସହିତ ପୁରୀର ନାନପୁରଠାରୁ ନୂଆଗାଁ ଏବଂ ସୁନ୍ଦରଠାରୁ କଣମାଣ ଚ୍ୟାନେଲ ଖୋଳାଯିବା କଥା। ତାହାସହିତ ବାଲେଶ୍ବର,ଜଗତସିଂହପୁର, ପୁରୀ, କେନ୍ଦ୍ରାପଡାର ୮ଟି ସ୍ଥାନ ଖନନ କରାଯାଇ ଜଳର ପ୍ରବେଶ ତଥା ମିଳନ ସ୍ଥଳର ପୁନଃବିନ୍ୟାସ କରାଯାଇଥାନ୍ତା। ଯାହାଦ୍ବାରା ଜଳେର ମାଛବଢ଼ିବା ପରିବେଶ ସୃଷ୍ଟି ହୋଇଥାନ୍ତା। ଟଙ୍କା ଏବେ ଜଳସମ୍ପଦ ବିଭାଗରେ ଗଡୁଛି। ହେଲେ ଏପର୍ଯ୍ୟନ୍ତ ମୁହାଁଣ ଖୋଳା କାର୍ଯ୍ୟ ସରୁନାହିଁ କି ଚିଙ୍ଗୁଡି ଭଳି ସାମୁଦ୍ରିକ ମାଛ ଉତ୍ପାଦନ ବଢ଼ିପାରୁ ନାହିଁ। ଏହାକୁ ନେଇ ମତ୍ସ୍ୟ ସମ୍ପଦ ବିଭାଗ ପକ୍ଷରୁ ଜଳ ସମ୍ପଦ ବିଭାଗକୁ ପତ୍ର ଲେଖି ଅବଗତ କରାଯାଇଛି।
ବିଭାଗର ସୂଚନା ଅନୁଯାୟୀ ରାଜ୍ୟରେ ୪୮୦ କିଲୋମିଟର ସମୁଦ୍ର ବେଳାଭୂମି ରହିଛି। ଯେଉଁଥିରେ କି ୨୪ହଜାର ବର୍ଗ କିମିର ସାମୁଦ୍ରିକ ଜଳ ଭାଗ ରହିଛି। ଏଥିରେ କ୍ଷାରୀୟ ଜଳ ୪ଲକ୍ଷ ୧୮ହଜାର ହେକ୍ଟର ପରିମିତ ଅଞ୍ଚଳ ରହିଥିବାବେଳେ ସେଥିରୁ ମାତ୍ର ୨.୯୮ ହଜାର ହେକ୍ଟର ଅଞ୍ଚଳରେ ମାଛଚାଷ ହୋଇପାରୁଛି। ଅବଶିଷ୍ଟ ୮୦ହଜାର ହେକ୍ଟର ଚିଲିକା ଜଳ ଏବଂ ୮୧୦୦ ହେକ୍ଟର ମିଶ୍ରିତ ଜଳ ରହିଛି। ରାଜ୍ୟରେ ସାମୁଦ୍ରିକ ମତ୍ସ୍ୟଚାଷ ବୃଦ୍ଧି ସହିତ ବିଦେଶକୁ ରପ୍ତାନି କରି ବର୍ଷକୁ ୨୦ହଜାର କୋଟି ଟଙ୍କା ରାଜସ୍ବ ଆଦାୟ କରିବା ଲାଗି ସରକାର ଲକ୍ଷ୍ୟ ରଖିଛନ୍ତି। ହେଲେ ଯୋଜନା ଅନୁଯାୟୀ କାର୍ଯ୍ୟାନ୍ବୟନ ହେଉ ନ ଥିବାରୁ ତାହା ଫଳପ୍ରଦ ହୋଇପାରୁନାହିଁ। ପ୍ରଥମ ପର୍ଯ୍ୟାୟ ଅର୍ଥ ଖର୍ଚ୍ଚ ହୋଇଥିଲେ ୧୦୩୬ଜଣଙ୍କ ଲାଗି ରୋଜଗାର ସୃଷ୍ଟି ହେବା ସହିତ ରାଜ୍ୟରେ ୨୫୯ହେକ୍ଟର ଜମିରେ ବାଗଦା ଚିଙ୍ଗୁଡ଼ି ଚାଷ ହୋଇପାରିଥାନ୍ତା। ବର୍ଷକୁ ୫ହଜାର ୮୭୩ ମେଟ୍ରିକ୍ ଟନ୍ ମାଛ ଉତ୍ପାଦନ ହୋଇଥାନ୍ତା। ସେହିପରି ଦ୍ବିତୀୟ ପର୍ଯ୍ୟାୟରେ ୩୧କୋଟି ଟଙ୍କା ଖର୍ଚ୍ଚରେ ବର୍ଷକୁ ଅଧିକ ୧୦ହଜାର ୯୬୧ ମେଟ୍ରିକ ଟନ୍ ବାଗଦା ଚିଙ୍ଗୁଡ଼ି ଉତ୍ପାଦନ ହେବା ସହିତ ୧୪୩୬ ଜଣଙ୍କୁ ରୋଜଗାର ସୁଯୋଗ ମିଳିଥାନ୍ତା। ମାତ୍ର ବିଭାଗୀୟ ଅଧିକାରୀଙ୍କ ଆନ୍ତରିକତା ଅଭାବ ଏଥିରେ ପ୍ରତିବନ୍ଧକ ସାଜିଥିବା ଜଣାଯାଇଛି।