ଭୁବନେଶ୍ବର: ପୁରୀ ଜିଲ୍ଲା ଗୋପ ଥାନା ଅନ୍ତର୍ଗତ ବଣିଆ ସାହି ନିକଟସ୍ଥ କୁଶଭଦ୍ରା ନଦୀ ଘାଟରେ ଏକ ଅଭାବନୀୟ ଓ ହୃଦୟବିଦାରକ ଘଟଣା ଘଟିଛି। ନିଜ ପୁଅକୁ ଗଭୀର ପାଣିରୁ ବଞ୍ଚାଇବାକୁ ଯାଇ ସ୍ୱାଗତିକା ପୃଷ୍ଟି (୪୫) ନାମକ ଜଣେ ମହିଳାଙ୍କର ନଦୀରେ ବୁଡ଼ି ମୃତ୍ୟୁ ଘଟିଛି। ଏହି ଦୁଃଖଦ ଘଟଣା ପରେ ସମଗ୍ର ଅଞ୍ଚଳରେ ଶୋକର ଛାୟା ଖେଳିଯାଇଛି। ମିଳିଥିବା ସୂଚନା ଅନୁଯାୟୀ, ମୃତ ମହିଳା ଜଣକ ନିଜ ଭାଇଙ୍କ ଶୁଦ୍ଧିକ୍ରିୟା କାର୍ଯ୍ୟକ୍ରମରେ ଯୋଗଦେବା ପାଇଁ ପରିବାର ସଦସ୍ୟଙ୍କ ସହ କୁଶଭଦ୍ରା ନଦୀକୁ ସ୍ନାନ କରିବାକୁ ଯାଇଥିଲେ। ନଦୀ ଘାଟରେ ଗାଧୋଉଥିବା ସମୟରେ ଅସାବଧାନତାବଶତଃ ତାଙ୍କ ପୁଅ ଗଭୀର ପାଣିକୁ ଖସି ପଡ଼ି ବୁଡ଼ି ଯାଉଥିଲେ। ଏହା ଦେଖି ମାଆ ସ୍ୱାଗତିକା ନିଜ ଜୀବନକୁ ବାଜି ଲଗାଇ ତୁରନ୍ତ ପୁଅକୁ ଉଦ୍ଧାର କରିବା ପାଇଁ ନଦୀକୁ ଡେଇଁ ପଡ଼ିଥିଲେ। ତେବେ ପୁଅକୁ ବଞ୍ଚାଇବାକୁ ଚେଷ୍ଟା କରୁଥିବା ବେଳେ ସେ ନିଜେ ପ୍ରଖର ସ୍ରୋତ ଓ ଗଭୀର ପାଣିରେ ବୁଡ଼ି ନିଖୋଜ ହୋଇଯାଇଥିଲେ। ଘଟଣା ସମ୍ପର୍କରେ ଖବର ପାଇ ଗୋପ ଅଗ୍ନିଶମ ବାହିନୀ ତୁରନ୍ତ ଘଟଣାସ୍ଥଳରେ ପହଞ୍ଚି ନଦୀରେ ଖୋଜାଖୋଜି ଓ ଉଦ୍ଧାର କାର୍ଯ୍ୟ ଆରମ୍ଭ କରିଥିଲା। ଦୀର୍ଘ ସମୟର ପ୍ରୟାସ ପରେ ଅଗ୍ନିଶମ କର୍ମଚାରୀମାନେ ମହିଳାଙ୍କୁ ପାଣିରୁ ଉଦ୍ଧାର କରି ଚିକିତ୍ସା ନିମନ୍ତେ ଗୋପ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ନେଇଥିଲେ। ମାତ୍ର ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଶୁଦ୍ଧିକ୍ରିୟା ଭଳି ଏକ ଶୋକସନ୍ତପ୍ତ ପରିବେଶ ମଧ୍ୟରେ ପୁଣି ଜଣେ ସଦସ୍ୟଙ୍କ ଅକାଳ ବିୟୋଗ ପରିବାର ଲୋକଙ୍କୁ ସମ୍ପୂର୍ଣ୍ଣ ଭାବେ ଭାଙ୍ଗି ଦେଇଛି।