ନୂଆଦିଲ୍ଲୀ: ଆଇପିଏଲ୍ ୨୦୨୬ ଟ୍ରଫି ହାସଲ କରିବା ପରେ ଚାମ୍ପିଅନ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ (ଆରସିବି) ଦଳ ହୋଟେଲରେ ପହଞ୍ଚିବା ପରେ ଏକ ଚିତ୍ତାକର୍ଷକ ଦୃଶ୍ୟ ଦେଖିବାକୁ ମିଳିଛି। ହୋଟେଲ ପରିସରରେ ସମଗ୍ର ଦଳକୁ ରାଜକୀୟ ଢଙ୍ଗରେ ଭବ୍ୟ ସ୍ୱାଗତ କରାଯାଇଥିଲା। ଏହି ବିଜୟ ଉତ୍ସବ ମାହୋଲରେ ଦଳର ଷ୍ଟାର୍ ଅଲରାଉଣ୍ଡର କ୍ରୁଣାଳ ପାଣ୍ଡ୍ୟା ପୂରା ଫର୍ମରେ ନଜର ଆସିଥିଲେ। ସେ ଆଇପିଏଲ୍ ଟ୍ରଫିକୁ ନିଜ ମୁଣ୍ଡ ଉପରେ ଟେକି ଧରି ଢୋଲର ତାଳେ ତାଳେ ଜବରଦସ୍ତ ଭାଙ୍ଗଡ଼ା ନାଚ କରିଥିଲେ। କ୍ରୁଣାଳଙ୍କ ଏଭଳି ଉତ୍ସାହ ଦେଖି ରନମେସିନ ବିରାଟ କୋହଲି ମଧ୍ୟ ନିଜକୁ ରୋକି ପାରିନଥିଲେ। ସେ ମଧ୍ୟ କ୍ରୁଣାଳଙ୍କ ସହ ମିଶି ପାଦରେ ପାଦ ମିଳାଇ ଏଭଳି ନାଚିଥିଲେ ଯେ, ସେଠାରେ ଉପସ୍ଥିତ ସମସ୍ତେ ଝୁମି ଉଠିଥିଲେ। ଆଇପିଏଲ୍ ୨୦୨୬ର ଚାମ୍ପିଅନ ଆରସିବି ନିଜର ଅଫିସିଆଲ ସୋସିଆଲ ମିଡିଆ ହ୍ୟାଣ୍ଡେଲରେ ଏହି ଭବ୍ୟ ସ୍ୱାଗତର ଏକ ସୁନ୍ଦର ଭିଡିଓ ସେୟାର କରିଛି। ଭିଡିଓରେ ଦେଖିବାକୁ ମିଳିଛି ଯେ, ହୋଟେଲ ଲବିରେ ଖେଳାଳିମାନଙ୍କୁ ସ୍ୱାଗତ କରିବା ପାଇଁ ଢୋଲ-ନଗାଡ଼ାର ବିଶେଷ ବ୍ୟବସ୍ଥା କରାଯାଇଥିଲା। ବିଜୟର ଏହି ମହାଉତ୍ସବରେ କ୍ରୁଣାଳ ଓ ବିରାଟଙ୍କ ଜୋଶଭରା ରୂପ ଦେଖି ସେଠାରେ ଉପସ୍ଥିତ ସମସ୍ତ ଖେଳାଳି ଏବଂ ହୋଟେଲ କର୍ମଚାରୀ ମଧ୍ୟ ବେଶ୍ ଉତ୍ସାହିତ ହୋଇପଡ଼ିଥିଲେ।