କେନ୍ଦ୍ରାପଡ଼ା ଛାତ୍ରୀ ଜୀବନ୍ତ ଦଗ୍ଧ ମାମଲା: ପ୍ରେମିକ ଅଟକ, ଆସିଲା ସାଂଘାତିକ ଅଭିଯୋଗ

ଭୁବନେଶ୍ବର: କେନ୍ଦ୍ରାପଡ଼ା ଜିଲ୍ଲା ପଟ୍ଟାମୁଣ୍ଡାଇରେ ଜଣେ ଛାତ୍ରୀଙ୍କ ଜୀବନ୍ତଦଗ୍ଧ ମାମଲାରେ ଛାତ୍ରୀଙ୍କ ପୁରୁଷ ବନ୍ଧୁଙ୍କୁ ପୋଲିସ ଅଟକ ରଖି ତଦନ୍ତ ଆରମ୍ଭ କରିଛି। ଅଭିଯୁକ୍ତ ଯୁବକଙ୍କୁ ଚେନ୍ନାଇରୁ ଧରାଯାଇଥିବାବେଳେ ଓଡ଼ିଶା ଆଣିବା ପାଇଁ ପୋଲିସ ପ୍ରୟାସ ଜାରି ରଖିଛି। ଅଭିଯୁକ୍ତ ଯୁବକଙ୍କ ନାଁରେ ଛାତ୍ରୀଙ୍କୁ ବ୍ଲାକ୍‌ମେଲିଂ କରିଥିବା ଅଭିଯୋଗ ରହିଛି। ଅପର ପକ୍ଷରେ ଅଭିଯୁକ୍ତର ମା’ ଓ ଭଉଣୀ ଅଭିଯୋଗ କରିଛନ୍ତି ଯେ ତାଙ୍କ ପୁଅକୁ ଫସାଇଦିଆଯାଇଛି। ପୋଲିସ ସୂତ୍ରରୁ ଜଣାପଡ଼ିଛି ଯେ, ଛାତ୍ରୀଙ୍କ ସହ ଯୁବକଙ୍କର ପୂର୍ବରୁ ବନ୍ଧୁତ୍ୱ ଥିଲା ଏବଂ ଏହି ସମ୍ପର୍କକୁ ନେଇ କିଛି ବିବାଦ ସୃଷ୍ଟି ହୋଇଥିଲା। ଏହା ଘଟଣାର ମୂଳ କାରଣ ହୋଇଥାଇପାରେ ବୋଲି ପୋଲିସ ଅନୁମାନ କରୁଛି। ଘଟଣା ସମ୍ପର୍କରେ ସ୍ଥାନୀୟ ପୋଲିସ ଅଧିକାରୀ କହିଛନ୍ତି, “ଆମେ ଅଭିଯୁକ୍ତଙ୍କୁ ଅଟକ ରଖି ତଦନ୍ତ ଚଳାଇଛୁ। ବ୍ଲାକ୍‌ମେଲିଂ ଅଭିଯୋଗ ସମେତ ଅନ୍ୟାନ୍ୟ ଦିଗକୁ ମଧ୍ୟ ଖୋଳତାଡ଼ କରାଯାଉଛି। ଛାତ୍ରୀଙ୍କ ମୃତ୍ୟୁର ପ୍ରକୃତ କାରଣ ଜାଣିବା ପାଇଁ ପୋଷ୍ଟମର୍ଟମ ରିପୋର୍ଟ ଏବଂ ଅନ୍ୟାନ୍ୟ ପ୍ରମାଣ ସଂଗ୍ରହ କରାଯାଉଛି।” ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ଦେଖାଦେଇଛି। ଛାତ୍ରୀଙ୍କ ପରିବାର ଓ ସ୍ଥାନୀୟ ଲୋକେ ଏହି ଘଟଣାର ନିଷ୍ପତ୍ତି ପାଇଁ ଦୃଢ଼ କାର୍ଯ୍ୟାନୁଷ୍ଠାନ ଦାବି କରିଛନ୍ତି। ପୋଲିସ ଏହି ମାମଲାରେ ସମସ୍ତ ଦିଗକୁ ଗମ୍ଭୀରତାର ସହ ତଦନ୍ତ କରୁଥିବା ଜଣାଇଛି। ଏହି ଘଟଣା ସମାଜରେ ମହିଳା ସୁରକ୍ଷା ଏବଂ ବ୍ଲାକ୍‌ମେଲିଂ ଭଳି ଅପରାଧକୁ ନେଇ ପୁଣି ଥରେ ଚର୍ଚ୍ଚାକୁ ଆଣିଛି। ତଦନ୍ତ ପରେ ଅଧିକ ତଥ୍ୟ ସାମ୍ନାକୁ ଆସିବ ବୋଲି ଆଶା କରାଯାଉଛି। ଅପର ପକ୍ଷରେ ପୁଅକୁ ଫସାଇ ଦିଆଯାଇଥିବା ଅଟକ ଯୁବକଙ୍କ ମା’ ସାଙ୍ଘାତିକ ଅଭିଯୋଗ କରିଛନ୍ତି। ଉଭୟପୁଅ-ଝିଅ ପରସ୍ପରକୁ ଭଲ ପାଉଥିଲେ। ଏହି କଥା ଝିଅଙ୍କ ମା’ ବାପା ଜାଣିଛନ୍ତି। ଭିଡିଓ ଭାଇରାଲ ଅଭିଯୋଗ ସମ୍ପୂର୍ଣ୍ଣ ମିଛ। ମୋ ପୁଅକୁ ଫସାଇ ଦିଆଯାଇଥିବା ଯୁବକଙ୍କ ମା’ ଗଣମାଧ୍ୟମ ଆଗରେ ଅଭିଯୋଗ କହିଛନ୍ତି। ଝିଅକୁ ତାଙ୍କର ମା’ ବାପା ମାରିଛନ୍ତି, ବନ୍ଧା ଅବସ୍ଥାରେ ଝିଅର ମୃତଦେହ ମିଳିଥିଲା। ୨୦ ଲକ୍ଷ ଟଙ୍କା ପାଇଁ ତାଙ୍କ ବାପା ଝିଅକୁ ମାରିଛନ୍ତି। ମୋ ପୁଅ ନିର୍ଦ୍ଦୋଷ, ୩ ମାସ ହେଲା ଚେନ୍ନାଇରେ ଥିଲା। ତାଙ୍କ ଘର ଲୋକ ଝିଅକୁ ମାଡ଼ ମାରୁଥିଲେ। ଅନ୍ୟପକ୍ଷେ ନ୍ୟାୟ ନ ମିଳିଲେ ଆତ୍ମହତ୍ୟା କରିବେ ବୋଲି ଅଟକ ଯୁବକଙ୍କ ମା’ କଡ଼ା ଚେତାବନୀ ଦେଇଛନ୍ତି।