ନୂଆଦିଲ୍ଲୀ: ଆଧ୍ୟାତ୍ମିକ ଜ୍ଞାନ, ଭାରତୀୟ ସଂସ୍କୃତି ଏବଂ ଯୁବଶକ୍ତିର ସମନ୍ୱୟରେ ଏକ ସଶକ୍ତ ରାଷ୍ଟ୍ର ଗଠନ ପାଇଁ ଦୃଢ଼ ଆହ୍ୱାନ ଦେଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ନୂଆଦିଲ୍ଲୀସ୍ଥିତ ଭାରତ ମଣ୍ଡପମ୍ଠାରେ ଆୟୋଜିତ ‘ଚିନ୍ମୟ ଅମୃତ ମହୋତ୍ସବ’ ବିଶ୍ୱ ସମ୍ମିଳନୀକୁ ଉଦ୍ଘାଟନ କରି ସେ କହିଛନ୍ତି ଯେ ଚିନ୍ମୟ ମିଶନ କେବଳ ଏକ ଅନୁଷ୍ଠାନ ନୁହେଁ, ବରଂ ଏହା ଏକ ଅମର ଚିନ୍ତାଧାରା। ଦଶନ୍ଧି ଦଶନ୍ଧି ଧରି ଏହି ମିଶନ ଭାରତର ସନାତନ ଆଧ୍ୟାତ୍ମିକ ଜ୍ଞାନକୁ ବିଶ୍ୱବ୍ୟାପୀ ପ୍ରସାର କରିବା ସହିତ ସମାଜସେବା ଏବଂ ଯୁବପିଢ଼ିର ଚରିତ୍ର ଗଠନରେ ଅତୁଳନୀୟ ଅବଦାନ ରଖିଆସୁଛି। ଏହି ଅବସରରେ ପୂଜ୍ୟ ସ୍ୱାମୀ ଚିନ୍ମୟାନନ୍ଦଙ୍କ ସ୍ମୃତିଚାରଣ କରି ପ୍ରଧାନମନ୍ତ୍ରୀ ଏକ ଭାବପ୍ରବଣ ଅନୁଭୂତି ବାଣ୍ଟିଥିଲେ। କାର୍ଯ୍ୟକ୍ରମରେ ହୋଲୋବଟ୍ ମାଧ୍ୟମରେ ଗୁରୁଦେବଙ୍କ ସହ ଆଲୋଚନାର ଅନୁଭବ ତାଙ୍କୁ ୧୯୯୩ ମସିହାର ସେହି ସ୍ମରଣୀୟ ଦିନଗୁଡ଼ିକ କଥା ମନେ ପକାଇ ଦେଇଥିଲା। ବଡ଼ୋଦରାରେ ଗୁରୁଦେବଙ୍କ ସହ ସାକ୍ଷାତ, ତାଙ୍କର ସ୍ନେହପୂର୍ଣ୍ଣ ବ୍ୟବହାର ଏବଂ ଆଶୀର୍ବାଦକୁ ସ୍ମରଣ କରି ଶ୍ରୀ ମୋଦୀ କହିଥିଲେ ଯେ ଏହା ତାଙ୍କ ଜୀବନର ଏକ ଅତ୍ୟନ୍ତ ଆବେଗିକ ମୁହୂର୍ତ୍ତ ଥିଲା। ଆଧୁନିକ ପ୍ରଯୁକ୍ତିବିଦ୍ୟା କିପରି ଅତୀତର ସୁନ୍ଦର ସ୍ମୃତିକୁ ପୁନର୍ବାର ଜୀବନ୍ତ କରିପାରେ, ଏହା ତାହାର ଏକ ଜ୍ୱଳନ୍ତ ଉଦାହରଣ ବୋଲି ସେ ମତପ୍ରକାଶ କରିଥିଲେ।