ଭୁବନେଶ୍ୱର: ମିଶନଶକ୍ତିରେ ଗୈରିକରଣ ପ୍ରସଙ୍ଗକୁ ନେଇ ଗୃହ ହୁଲସ୍ତୁଲ ହୋଇଛି। ବିରୋଧୀ ବିଜେଡି ଓ କଂଗ୍ରେସ ସଦସ୍ୟଙ୍କ ହଟ୍ଟଗୋଳ ଓ ନାରାବାଜି କାରଣରୁ ପ୍ରଥମାର୍ଦ୍ଧ ବୈଠକ ଅଧା ମିନିଟ୍ ଚାଲିପାରିନାହିଁ। ଦ୍ୱିତୀୟାର୍ଦ୍ଧ ବୈଠକରେ ବି ବିରୋଧୀ ଅନୁରୁୂପ ଆଚରଣ ପ୍ରଦର୍ଶନ କରିବାରୁ ବାଚସ୍ପତି ସୁରମା ପାଢ଼ୀ ଚେତାବନୀ ଦେଇଛନ୍ତି। ସେ କହିଛନ୍ତି, ପବିତ୍ର ଗୃହରେ ଏମିତି ବିଶୃଙ୍ଖଳା କଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଏଥିରେ ଅସନ୍ତାଷ ବ୍ୟକ୍ତ କରି ବିରୋଧୀମାନେ କକ୍ଷତ୍ୟାଗ କରିଥିଲେ। ବଜେଟ୍ ଅଧିବେଶନର ବୁଧବାର ଥିଲା ଷଷ୍ଠ ଦିନ। ଧାର୍ଯ୍ୟ ସାଢ଼େ ୧୦ରେ ବାଚସ୍ପତି ସୁରମା ପାଢ଼ୀ ଗୃହ ପରିଚାଳନା ପାଇଁ ଆସନକୁ ଆସିବା କ୍ଷଣି କଂଗ୍ରେସ ଓ ବିଜେଡି ସଭ୍ୟମାନେ ମିଶନ ଶକ୍ତିକୁ ଗୈରୀକରଣ କରିଥିବା ଅଭିଯୋଗ କରି ଅସନ୍ତାଷ ବ୍ୟକ୍ତ କରିଥିଲେ। ଉଭୟ ଦଳର ସଭ୍ୟମାନେ ବାଚସ୍ପତିଙ୍କ ପୋଡ଼ିଅମ ସମ୍ମୁଖକୁ ଆସି ସରକାରୀ ବିରୋଧୀ ନାରାବାଜି ଦେଇ ହୋହାଲ୍ଲା କରିଥିଲେ। ଏଭଳି ହଙ୍ଗମା ଯୋଗୁଁ ଗୃହ ହୁଲସ୍ତୁଲ ହୋଇଥିଲା। ଗୃହ ଚଳାଇବା ଆଉ ସମ୍ଭବ ହୋଇନଥିଲା। ଫଳରେ ବାଚସ୍ପତି ଶ୍ରୀମତୀ ପାଢ଼ୀ ବିରୋଧୀ ସଭ୍ୟଙ୍କୁ ବାରମ୍ବାର ନିଜ ଆସନକୁ ଯିବାକୁ ଅନୁରୋଧ କରିଥିଲେ ହେଁ ସେମାନେ ତାହାକୁ ଗ୍ରହଣ କରିନଥିଲେ। ତେବେ ବିଜେଡି ସଭ୍ୟମାନେ ସ୍ୱତନ୍ତ୍ର ଆଲୋଚନା ଦାବିରେ ଅଡ଼ି ବସିିଥିଲେ। ହେଲେ ବାଚସ୍ପତି ରାଜି ନହେବାରୁ ବିଜେଡି ସଦସ୍ୟ ବିଧାନସଭାରୁ ପଟୁଆରରେ ବାହାରି ବିଧାନସଭା ପରିସରରେ ଥିବା ଗାନ୍ଧୀମୂର୍ତ୍ତି ତଳେ ପ୍ଲାକାର୍ଡ ଧରି ଧାରଣାରେ ବସିିଥିଲେ। ବିରୋଧୀଙ୍କ ହଟ୍ଟଗୋଳ କାରଣରୁ ପ୍ରଶ୍ନକାଳ, ଶୂନ୍ୟକାଳ ଓ ମୂଲତବୀ ଆଲୋଚନା ହୋଇପାରିନାହିଁ। ଫଳରେ ବାଚସ୍ପତି ଶ୍ରୀମତୀ ପାଢ଼ୀ ପୂର୍ବାହ୍ନ ୧୦ଟା୩୧ରୁ ଅପରାହ୍ଣ ୪ଟା ଯାଏଁ ଗୃହ ମୁଲତବି କରିଥିଲେ। ଅପରାହ୍ଣ ବୈଠକ ହେବା ମାତ୍ରେ ଅନୁରୂପ ଭାବେ ବିରୋଧୀସଭ୍ୟମାନେ ମିଶନଶକ୍ତିକୁ ଗୈରୀକରଣ କରିଥିବା ଅଭିଯୋଗ କରି ବାଚସ୍ପତିଙ୍କ ପୋଡିଅମ୍ ସମ୍ମୁଖରେ ସରକାରୀ ବିରୋଧୀ ନାରାବାଜି ସହ ହଟ୍ଟଗୋଳ କରିଥିଲେ। ଏଥିରେ ଖପ୍ପା ହୋଇ ହୋଇଥିଲେ ବାଚସ୍ପତି। ଏମିତି ବିଶୃଙ୍ଖଳା କଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ହୋହାଲ୍ଲା କରୁଥିବା ସଭ୍ୟଙ୍କୁ ବାଚସ୍ପତି ଚେତାବନୀ ଦେଇଥିଲେ। ପରେ ବିରୋଧୀମାନେ ଅସନ୍ତୁଷ୍ଟ ହୋଇ କକ୍ଷତ୍ୟାଗ କରିଥିଲେ। ଗୃହ ବାହାରେ ଧାରଣାରତ ବିଜେଡି ବିଧାୟିକା ଶୁଭାସିନୀ ଜେନା ‘ନିତିଦିନ’କୁ କହିଥିଲେ, ପୂର୍ବତନ ମୁଖ୍ୟମନ୍ତ୍ରୀ ତଥା ବିରୋଧୀ ଦଳ ନେତା ନବୀନ ପଟ୍ଟନାୟକ ମିଶନଶକ୍ତି ମହିଳାଙ୍କୁ ସଶକ୍ତ କରିବା ନିମନ୍ତେ ବଡ଼ ପଦଷକ୍ଷପ ନେଇଥିଲେ। ସେଥିପାଇଁ ରାଜ୍ୟରେ ୭୦ ଲକ୍ଷ ମହିଳା ରୋଜଗାରକ୍ଷମ ହୋଇଥିଲେ। ମାତ୍ର ବିଜେପି ସରକାର ମିଶନ ଶକ୍ତିକୁ ବନ୍ଦ୍ କରିବାକୁ ଚକ୍ରାନ୍ତ କରିଛି ଓ ନିଜ ଇଚ୍ଛା ଅନୁସାରେ ମିଶନ ଶକ୍ତିକୁ ଗୈରିକ କରିବାକୁ ଚେଷ୍ଟା କରିଛି। ଏହାକୁ ଆମେ ଦୃଢ଼ ନିନ୍ଦା କରୁଛୁ। ତେଣୁ ଗାନ୍ଧୀମୂର୍ତ୍ତୀ ତଳେ ଧାରଣା ଦେଇଛୁ ବୋଲି ଶ୍ରୀମତୀ ଜେନା ପ୍ରକାଶ କରିଥିଲେ।