ଭୁବନେଶ୍ବର: ଗଞ୍ଜାମ ଜିଲ୍ଲାରେ ସାମୁଦ୍ରିକ ଝଡ଼ ‘ଅର୍ଣ୍ଣବ’ ପ୍ରଭାବରେ ସୃଷ୍ଟି ହୋଇଥିବା ବନ୍ୟା ପରିସ୍ଥିତି ଓ ଏହାର ପରିଚାଳନାକୁ ନେଇ ରାଜନୈତିକ ବୟାନବାଜି ଜୋର ଧରିଛି। ଶାସକ ଓ ବିରୋଧୀ ଦଳ ମଧ୍ୟରେ ଆରୋପ-ପ୍ରତ୍ୟାରୋପ ଚାଲିଥିବାବେଳେ ରାଜସ୍ୱ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ ସାମ୍ବାଦିକ ସମ୍ମିଳନୀରେ ସରକାରଙ୍କ ପକ୍ଷ ରଖିଛନ୍ତି। ପ୍ରଶାସନିକ ପ୍ରସ୍ତୁତି ଏବଂ ଉଦ୍ଧାର ଓ ରିଲିଫ୍ କାର୍ଯ୍ୟର ତଥ୍ୟ ଉପସ୍ଥାପନ କରିବା ସହ ସେ ପୂର୍ବ ସରକାରଙ୍କ ଦୀର୍ଘକାଳୀନ ଅବହେଳାକୁ ଏହି ବିପର୍ଯ୍ୟୟ ପାଇଁ ଦାୟୀ କରିଛନ୍ତି। ମନ୍ତ୍ରୀଙ୍କ ସୂଚନା ଅନୁଯାୟୀ, ଅକ୍ଟୋବର ୨୮ରୁ ୩୦ ତାରିଖ ମଧ୍ୟରେ ଲଗାତାର ଅସ୍ୱାଭାବିକ ବର୍ଷା ଯୋଗୁଁ ଜିଲ୍ଲାରେ ସ୍ଥିତି ଗମ୍ଭୀର ହୋଇଥିଲା। ପାଣିପାଗ ବିଭାଗର ପୂର୍ବାନୁମାନ ମୁତାବକ ପ୍ରଶାସନ ପ୍ରସ୍ତୁତ ଥିଲେ ହେଁ ଆକଳନଠାରୁ ବହୁ ଅଧିକ ବର୍ଷା ପରିସ୍ଥିତିକୁ ଜଟିଳ କରିଥିଲା। ତିନି ଦିନରେ ସମଗ୍ର ଜିଲ୍ଲାରେ ୩୩୭.୬ ମିଲିମିଟର ବର୍ଷା ରେକର୍ଡ କରାଯାଇଥିବାବେଳେ ଅକ୍ଟୋବର ୨୮ରେ ୮୩.୧ ମିମି, ୨୯ରେ ୧୯୧ ମିମି ଏବଂ ୩୦ ତାରିଖରେ ୬୩.୪ ମିମି ବର୍ଷା ହୋଇଛି। ପାତ୍ରପୁର ବ୍ଲକ୍ରେ ତିନି ଦିନରେ ୮୦୮.୪ ମିମି ବର୍ଷା ରେକର୍ଡ ହୋଇଥିବାବେଳେ କେବଳ ଅକ୍ଟୋବର ୨୯ ତାରିଖରେ ୫୪୬ ମିମି ବର୍ଷା ହୋଇଥିଲା। ଏହି ପ୍ରଚଣ୍ଡ ବର୍ଷା ଯୋଗୁଁ ନଦୀନାଳର ଜଳସ୍ତର ହଠାତ୍ ବୃଦ୍ଧି ପାଇ ବ୍ୟାପକ ଅଞ୍ଚଳ ଜଳମଗ୍ନ ହୋଇଯାଇଥିଲା।