କାନପୁର: ରାତିର ଗଭୀର ନିଦ ଭାଙ୍ଗିବା ପୂର୍ବରୁ ମାଡ଼ି ଆସିଥିଲା ମୃତ୍ୟୁର ଭୟଙ୍କର ବିଭୀଷିକା। ଚାରିଆଡ଼େ ଧୂଆଁମୟ ପରିବେଶ ସୃଷ୍ଟି ହୋଇ ଆଖିପିଛୁଳାକେ ଘର ଭିତରକୁ ନିଆଁ ବ୍ୟାପିଯାଇଥିଲା। ଜୀବନ ବଞ୍ଚାଇବା ପାଇଁ କିଏ ଘରୁ ବାହାରକୁ ଦୌଡ଼ିଥିଲେ ତ ଆଉ କିଏ ପାଖ ଆପାର୍ଟମେଣ୍ଟକୁ ଡେଇଁପଡ଼ିଥିଲେ, କିନ୍ତୁ ଏହି ଭୟଙ୍କର ଅଗ୍ନିକାଣ୍ଡରୁ ସମସ୍ତେ ରକ୍ଷା ପାଇପାରିଲେ ନାହିଁ। ସୋମବାର ଭୋର୍ରେ କାନପୁରର ପାଟକାପୁରସ୍ଥିତ ରାଧିକା ଆପାର୍ଟମେଣ୍ଟରେ ଘଟିଥିବା ଏହି ଅଘଟଣରେ ୪୫ ବର୍ଷୀୟା ମହିଳା ରାଖୀ ଏବଂ ୧୬ ବର୍ଷୀୟ ବାଳକ ପ୍ରାଞ୍ଜଲ ବାଥମଙ୍କ ପ୍ରାଣହାନି ଘଟିଛି। ଏହି ଦୁର୍ଘଟଣାରେ ଅନ୍ୟ ଦୁଇଜଣ ଆହତ ହୋଇ ହସ୍ପିଟାଲରେ ଚିକିତ୍ସାଧୀନ ଅଛନ୍ତି। ସୋମବାର ସକାଳ ପ୍ରାୟ ୪ଟା ୩୦ ମିନିଟ୍ ସମୟରେ ଅଧିକାଂଶ ଲୋକ ଗଭୀର ନିଦରେ ଶୋଇଥିବା ବେଳେ ରାଧିକା ଆପାର୍ଟମେଣ୍ଟରେ ହଠାତ୍ ନିଆଁ ଲାଗିଯାଇଥିଲା। ପ୍ରାଥମିକ ସୂଚନା ମୁତାବକ, ବିଦ୍ୟୁତ୍ ସର୍ଟସର୍କିଟ୍ ଯୋଗୁଁ ଏହି ଅଗ୍ନିକାଣ୍ଡ ଘଟିଥିବା ସନ୍ଦେହ କରାଯାଉଛି। ନିଆଁ ଦ୍ରୁତଗତିରେ ଆପାର୍ଟମେଣ୍ଟର ଏକାଧିକ ଫ୍ଲାଟ୍କୁ ବ୍ୟାପିଯିବାରୁ ସ୍ଥାନୀୟ ଅଞ୍ଚଳରେ ଆତଙ୍କ ଖେଳିଯାଇଥିଲା। ଘର ଭିତରେ ପ୍ରଚୁର ଧୂଆଁ ଭରିଯିବାରୁ ଶୋଇଥିବା ବାସିନ୍ଦାମାନେ ଆଶ୍ରୟ ପାଇଁ ଏଣେତେଣେ ଦୌଡ଼ିବାକୁ ବାଧ୍ୟ ହୋଇଥିଲେ।