ଭୁବନେଶ୍ବର: ପ୍ରବର୍ତ୍ତନ ନିର୍ଦ୍ଦେଶାଳୟ ‘ଇଡି’ ଓ ‘ସିବିଆଇ’ ପରି କେନ୍ଦ୍ରୀୟ ତଦନ୍ତକାରୀ ସଂସ୍ଥାକୁ ରାଜନୈତିକ ଉଦ୍ଦେଶ୍ୟରେ ବ୍ୟବହାର କରୁଛି କେନ୍ଦ୍ରର ବିଜେପି ସରକାର । ଏହି ଅଭିଯୋଗ ସହ କଂଗ୍ରେସ ସାରା ଦେଶରେ ୨୨ ତାରିଖରେ ଇଡି କାର୍ୟ୍ୟାଳୟ ଘେରାଉ ଡାକରା ଦେଇଛି । ଓଡିଶା କଂଗ୍ରେସ ମଧ୍ୟ ଭୁବନେଶ୍ବର ସ୍ଥିତ ‘ଇଡି’ କାର୍ୟ୍ୟାଳୟ ଘେରିବ । ଏଥିପାଇଁ କଂଗ୍ରେସ ଭବନରେ ଆୟୋଜିତ ବୈଠକରେ କାର୍ୟ୍ୟଖସଡା ପ୍ରସ୍ତୁତ କରାଯାଇଛି । ରବିବାର କଂଗ୍ରେସ ଭବନରେ ଆୟୋଜିତ ଆଜି ଏକ ସାମ୍ବାଦିକ ସମିଳନୀରେ ଦଳର ଅନ୍ୟତମ ବରିଷ୍ଠ ନେତା ମହମ୍ମଦ ମୋକିମ କହିଛନ୍ତି,‘‘ରାହୁଲ ଗାନ୍ଧୀଙ୍କ ନିର୍ଦ୍ଦେଶ କ୍ରମେ ୨୨ ତାରିଖରେ ସାରା ଭାରତରେ ସମସ୍ତ ‘ଇଡି’ ଅଫିସ ଘେରାଉ କରାଯିବ । ଓଡ଼ିଶାରେ ମଧ୍ୟ୍ୟ କଂଗ୍ରେସ ‘ଇଡି’ ଅଫିସ ସମୁଖରେ ବିରୋଧ ପଦର୍ଶନ କରିବ । ପୂର୍ବାହ୍ନ ୧୧ଟାରୁ ଏହି ଆନ୍ଦୋଳନ ଆରମ୍ଭ ହେବ । ଦେଶରେ କେନ୍ଦ୍ର ସରକାର ଯେଉଁଭଳି ଭାବରେ ‘ଇଡି’ ଓ ‘ସିବିଆଇ’ ବ୍ୟବହାର କରୁଛି, ତାହା ଅନୁଚିତ । ଏହାକୁ ବିରୋଧ କରି ଆମେ ଇଡି ଅଫିସ ସମୁଖରେ ବିକ୍ଷୋଭ କରିବୁ । ଓଡ଼ିଶାରେ ବିଜେପି ସରକାର ଚାଲିଛି । କିନ୍ତୁ ସରକାର ଯେଉଁଭଳି ଚାଲିବା କଥା ତାହା ଚାଲୁନାହିଁ । ବିଜେଡି ମଧ୍ୟ୍ୟ ବିରୋଧୀ ଦଳ ଭୂମିକା ଠିକ୍ ଭାବରେ ନେଇପାରୁନାହିଁ । ରାଜ୍ୟବାସୀଙ୍କ ହିତ ପାଇଁ ସର୍ବଦା କଂଗ୍ରେସ ଦଳ ଲଢେଇ ଜାରି ରଖିବ ।” ଲୋକସଭାରେ ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କ ଉପରେ ପ୍ରବର୍ତ୍ତନ ନିର୍ଦ୍ଦେଶାଳୟର ମନମୁଖୀ ବ୍ୟବହାର ,ରାହୁଲଙ୍କୁ ବିଭିନ୍ନ ଉପାୟରେ ହଇରାଣ ହରକତ କରାଯାଉଥିବା ଦଳ ଅଭିଯୋଗ କରିଆସିଛି । ଗତକାଲି ଏହି ସମ୍ପର୍କରେ ଏକ ଗୁରୁତ୍ବପୂର୍ଣ୍ଣ ବୈଠକ ରାଜ୍ୟ କାର୍ୟ୍ୟାଳୟରେ ବସିଥିଲା । ଏଥିରେ ମହମ୍ମଦ ମୋକିମଙ୍କ ନେତୃତ୍ବରେ ଆକ୍ସନପ୍ଲାନ ପ୍ରସ୍ତୁତ କରାଯାଇଛି । ଏହି ଘେରାଓ କାର୍ୟ୍ୟକ୍ରମର ସଂଯୋଜକ ଦାୟିତ୍ବ ଗ୍ରହଣ କରିଛନ୍ତି ମୋକିମ । ସାରା ରାଜ୍ୟରୁ ପ୍ରାୟ ୩୦ ହଜାରରୁ ଅଧିକ କଂଗ୍ରେସ କର୍ମୀ ଓ ନେତା ଭୁବନେଶ୍ୱର ଆସିବେ ।