ଜଗତସିଂହପୁର,: ଗଭୀର ସମୁଦ୍ର ମଧ୍ୟରେ ଯାନ୍ତ୍ରିକ ତ୍ରୁଟି ଯୋଗୁଁ ବୁଡ଼ିଯିବାକୁ ବସିଥିବା ଏକ ବିଶାଳ ମାଲବାହୀ ଜାହାଜ ଏବଂ ଏଥିରେ ଥିବା ୨୭ ଜଣ କର୍ମଚାରୀଙ୍କ ଜୀବନ ବଞ୍ଚାଇ ପାରାଦୀପ ବନ୍ଦର କର୍ତ୍ତୃପକ୍ଷ ଦେବଦୂତ ସାଜିଛନ୍ତି। ପାରାଦୀପ ବନ୍ଦରଠାରୁ ପ୍ରାୟ ୯୦ କିଲୋମିଟର ଦୂର ସମୁଦ୍ର ଭିତରେ ଜାହାଜଟି ହଠାତ୍ ଅଚଳ ହୋଇପଡ଼ିବା ସହ ଏହାର ପ୍ରୋପେଲର୍ ଦଣ୍ଡ ଭାଙ୍ଗିଯାଇଥିଲା। ଫଳରେ ଜାହାଜ ଭିତରକୁ ଦ୍ରୁତ ଗତିରେ ସମୁଦ୍ରର ପାଣି ପଶିବା ଆରମ୍ଭ ହୋଇଥିଲା ଏବଂ ଜାହାଜ ସମେତ ସମସ୍ତ ୨୭ ଜଣ କର୍ମଚାରୀଙ୍କ ଜୀବନ ଘୋର ବିପଦ ମଧ୍ୟକୁ ଠେଲି ହୋଇଯାଇଥିଲା। ମିଳିଥିବା ସୂଚନା ଅନୁଯାୟୀ, ‘ଏମ୍ଭି ବିଶ୍ୱ ଉଦୟ’ ନାମକ ଏହି ଜାହାଜଟି ପଶ୍ଚିମବଙ୍ଗର ହଳଦିଆ ବନ୍ଦରରୁ ବାହାରି ଆଫ୍ରିକାର ମୋଜାମ୍ବିକ୍ ବନ୍ଦର ଅଭିମୁଖେ କୋଇଲା ଆଣିବା ପାଇଁ ଯାତ୍ରା କରୁଥିଲା। ତେବେ ପାରାଦୀପ ଉପକୂଳ ଅତିକ୍ରମ କରୁଥିବା ବେଳେ ଗଭୀର ସମୁଦ୍ରରେ ହଠାତ୍ ଏହି ଅଘଟଣ ଘଟିଥିଲା। ଜାହାଜର ପ୍ରୋପେଲର୍ ଦଣ୍ଡ ଭାଙ୍ଗିଯିବାରୁ ଏହା ଆଗକୁ ବଢ଼ିପାରିନଥିଲା ଏବଂ ଭିତରେ ପାଣି ଭର୍ତ୍ତି ହେବା ଯୋଗୁଁ ବୁଡ଼ିବା ଅବସ୍ଥାକୁ ଚାଲିଆସିଥିଲା। ଏହି ଜରୁରୀକାଳୀନ ପରିସ୍ଥିତି ସମ୍ପର୍କରେ ଭାରତୀୟ ଜାହାଜ ଚଳାଚଳ ନିଗମ ପକ୍ଷରୁ ତୁରନ୍ତ ପାରାଦୀପ ବନ୍ଦର କର୍ତ୍ତୃପକ୍ଷଙ୍କୁ ଅବଗତ କରାଯାଇଥିଲା। ସୂଚନା ପାଇବା ମାତ୍ରେ ପାରାଦୀପ ବନ୍ଦର କର୍ତ୍ତୃପକ୍ଷ ତତ୍ପରତା ଦେଖାଇ ତ୍ୱରିତ ଉଦ୍ଧାର ଅଭିଯାନ ଆରମ୍ଭ କରିଥିଲେ। ବନ୍ଦର କର୍ତ୍ତୃପକ୍ଷଙ୍କ ସମୟୋଚିତ ଓ ସାହସିକ ପଦକ୍ଷେପ ଯୋଗୁଁ ଜାହାଜଟି ସମୁଦ୍ର ଗର୍ଭରେ ଲୀନ ହେବାରୁ ବର୍ତ୍ତିଯାଇଥିବା ବେଳେ ଏଥିରେ ଥିବା ସମସ୍ତ ୨୭ ଜଣ କର୍ମଚାରୀଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଛି।